fbpx

ပုသိမ်စက်မှုဇုန် လုပ်သား ၅၀၀၀ ကို ကိုရိုနာဗိုင်းရပ်စ် အသိပညာပေးစာစောင်များ ပေးဝေ

ဧရာဝတီတိုင်း၊ ပုသိမ်မြို့၊ အမှတ် ၁၃ ရပ်ကွက် စက်မှုဇုန်မှာရှိတဲ့ Myanmar Knitting အထည်ချုပ်စက်ရုံက လုပ်သား ၅၀၀၀ ကျော်ကို ကိုရိုနာဗိုင်းရပ်စ် အသိပညာပေး လက်ကမ်းစာ ဆောင်ပေးဝေတာတွေကို ဒီနေ့မနက်ပိုင်းက ပြုလုပ်ခဲ့ပါတယ်။

အလုပ်သမားအချင်းချင်း ရိုင်းပင်းကူညီရေးအဖွဲ့မှ အငြင်းပွားမှု ဖြေရှင်းရေးတာဝန်ခံ ဒေါ်ခခက “အလုပ်သမားတွေနဲ့တကွ သူတို့ရဲ့ မိသားစုတွေ ဒီရောဂါနဲ့ ပတ်သက်လို့ ကျန်းမာရေးအသိ ပညာရရှိပြီး သံသယလူနာတွေ့လာရင်လည်း ဘယ်လိုမျိုးတွေ ဆောင်ရွက်ရမယ်ဆိုတာ စနစ် တကျ သိရှိဈေချင်လို့ ပေးဝေဖြစ်တာပါ” လို့ ဒီဗွီဘီကို ပြောပါတယ်။

ကိုရိုနာဗိုင်းရပ်စ် ရောဂါအသိပညာပေးလုပ်ငန်းတွေ ဆောင်ရွက်ဖို့အတွက် အရပ်ဘက် အဖွဲ့အစည်းတွေ၊ အဖွဲ့ချုပ်တွေ၊ လူမှုဖူလုံရေးအဖွဲ့နဲ့ လုပ်ငန်းရှင်တွေအားလုံး စုစည်းပြီး ကြိုတင်ကာကွယ်မှု အစီအစဉ်လုပ်ဖို့ အစည်းဝေးတွေပြုလုပ်ပြီး အသိပညာပေးမှုအအစီစဉ်တွေ ထဲက လက်ကမ်းစာစောင်ပေးတဲ့အစီစဉ်ကို အရင်ဆုံးလုပ်ဖြစ်တာလို့ ဆိုပါတယ်။

စက်ရုံလုပ်သား မနွယ်ဇင်က “ဒီလို လက်ကမ်းစာစောင်လေးတွေ ဖြန့်ပေးတော့ သမီးတို့ အိမ်ပြန်သွားရင်လည်း အိမ်က မိသားစုက ဒီစာရွက်လေးတွေဖတ်ပြီး ရောဂါနဲ့ပတ်သက်ပြီး ကာကွယ်နိုင်တဲ့ နည်းလမ်းတွေကို သိနိုင်တာပေါ့။ အမြဲစက်ရုံထဲမှာ အချိန်ကုန်နေရတဲ့ သမီးတို့ကို ခုလိုလုပ်ပေးတာ ပိုကောင်းပါတယ်” လို့ ဒီဗွီဘီ ကိုပြောပါတယ်။

အလုပ်သမားအချင်းချင်းရိုင်းပင်းကူညီရေးအဖွဲ့က ဦးဆောင်ပြီး စက်ရုံက မန်နေဂျာတွေ၊ တာဝန်ရှိသူတွေ၊ စက်ရုံအလုပ်သမားသမဂ္ဂအဖွဲ့က ခေါင်းဆောင်တွေက စက်ရုံရှေ့မှာ အလုပ် သမား ၅ ထောင်နီးပါကို ကိုရိုနာဗိုင်းရပ်စ် အသိပညာပေးလက်ကမ်းစာစောင်တွေ ဖြန့်ဝေပေးခဲ့ကြတာပါ။

ဒါ့အပြင် ကိုရိုနာဗိုင်းရပ်စ် ရောဂါနဲ့ကာကွယ်ရေးအတွက် လက်ကမ်းစာစောင်တွေဝေတာ၊ သင်တန်းတွေပေးတာ၊ ဟောပြောတာတွေ ပြုလုပ်သွားဖို့ရှိပြီး လူမှုဖူလုံရေးက အသိပညာပေးလက်ကမ်း စာစောင် ၁၅၀၀၀ ထောက်ပံ့ပေးထားတဲ့အတွက် နောက်ရက်တွေမှာလည်း အခြားစက်ရုံတွေကို အသိပညာပေးစာစောင်တွေ ဆက်လက်ပေးဝေသွားမယ်လို့ အလုပ်သမားအချင်းချင်း ရိုင်းပင်းကူညီရေးအဖွဲ့က တာဝန်ရှိသူက ပြောပါတယ်။

ပုသိမ်စက်မှုဇုန်မှာ အထည်ချုပ်စက်ရုံ ၈ ရုံရှိပြီး ဧရာဝတီတိုင်းအတွင်းက လာရောက် အလုပ် လုပ်တဲ့ အထည်ချုပ်အလုပ်သမား ၁ သောင်းကျော်ရှိတဲ့အတွက် နောက်ရက်တွေမှာ ၁ ရက်ကို ၁ ရုံနှုန်းနဲ့အသိပညာပေး လက်ကမ်းစာစောင်တွေ ဆက်လက်ဖြန်ဝေသွားမယ်လို့ ဆိုပါတယ်။

မင်းထက်မုန်း (ပုသိမ်)

Tags:

Source : DVB