fbpx

နိုင်ငံ့သားကောင်းတွေဆိုတာ တိုင်းပြည်၏ ပါရမီဖြည့်ဖက်

ကိုရိုနာဗိုင်းရပ်စ် မြန်မာနိုင်ငံတွင် စတင်တွေ့ရှိသည့်သတင်းအတည်ပြု ထွက်ပေါ်လာပြီးနောက် မြန်မာ့လူ့အဖွဲ့အစည်းတွင် လှုပ်လှုပ်ရွရွဖြစ်ခဲ့ကြသော်လည်း ဖြစ်လာနိုင်သည့် အကျပ်အတည်းများနှင့် ဘေးဒုက္ခများအတွက် ကူညီပံ့ပိုးလိုသော စေတနာရှင်များလည်း အမြောက်အမြားထွက်ပေါ်လာသည်မှာ တစ်နည်းတစ်ဖုံ ဝမ်းသာစရာပင်။ 
ကိုရိုနာဗိုင်းရပ်စ်ကာကွယ်ထိန်းချုပ်ရန်အတွက် မိမိတို့ဆန္ဒအလျောက် ကျရာနေရာမှ ဝင်ရောက်တာဝန်ထမ်းဆောင်လိုသည့် ဆရာဝန်များပေါ်လာသလို သူနာပြုအမြောက်အမြားလည်းပေါ်လာသည်။ မြဝတီဘက်သို့ထွက်သွားသည့် သူနာပြု များကိုကြည့်ရသည်မှာ စိုးရိမ်ထိတ်လန့်မှုတွေလွင့်ထွက်ပြီး စိတ်ဓာတ်ခွန်အားများစွာကိုပင်ဖြစ်စေသည်။ 
ရန်သူကိုချေမှုန်းရန် ရှေ့တန်းစစ်မျက်နှာသို့ချီတက်သွားသော မျိုးချစ်သူရဲကောင်းများသဖွယ်ပင်။ သူတို့ရင်ဆိုင်ရမည့် ရန်သူမှာ မြန်မာသာမက တစ်ကမ္ဘာလုံး၏ ဘုံရန်သူဖြစ်နေသည့် ကပ်ရောဂါဆိုးကြီး။ အခန့်မသင့်လျှင် ကပ်ရောဂါဆိုးကြီး အန္တရာယ်ကို ကာကွယ်တားဆီး တိုက်ဖျက်ရင်း အချိန်မရွေးရောဂါကူးစက်ခံရနိုင်သည်ကို သိလျက်ချီတက်သွားကြသည်မှာ နိုင်ငံနှင့် လူ့အဖွဲ့အစည်းကို ကာကွယ်စောင့်ရှောက်လိုသော စိတ်ဓာတ်တစ်ခုတည်းကြောင့်ဖြစ်ပေမည်။ 
တကယ်တော့ ဆရာဝန်၊ သူနာပြုနှင့် ကျန်းမာရေးအမှုထမ်းများသာမကပေ။ ကိုရိုနာဗိုင်းရပ်စ်က မြန်မာနိုင်ငံကို စတင်စိန်ခေါ်လိုက်ချိန်တွင် တွေ့လာမည့်ဘေးအန္တရာယ်များမှ ကာကွယ်ပေးလိုသူများ နယ်ပယ်အလိုက်ထွက်လာသည်။သူ့စေတနာ၊ သူ့ဆန္ဒ နှင့် သူတို့စွမ်းသလောက် လုပ်ဆောင်ပေးရန် ထွက်ပေါ်လာကြခြင်းလည်းဖြစ်သည်။ 
ပြည်ပမှ ဝင်ရောက်လာသူများသည် မြန်မာနိုင်ငံတွင်း ကိုရိုနာဗိုင်းရပ်စ် စတင်တွေ့ရှိခြင်း၏ ပင်မအကြောင်းအရင်းဖြစ်နေပေသည်။ သို့အတွက် ၎င်းတို့ကို Quarantine လုပ်စောင့်ကြည့်မည့်လုပ်ငန်းစဉ်သည် အဓိကကျလာသည်။ 
ဗုဒ္ဓဘာသာအသိုင်းအဝိုင်းတွင် အထင်ကရပုဂ္ဂိုလ်တစ်ဦးဖြစ်သည့် ဆရာတော်တစ်ပါးက သူ၏ကျောင်းကို Quarantine လုပ်မည့်နေရာအဖြစ် အသုံးပြုရန် စတင်ခွင့်ပြုခဲ့ရာမှ အခြားကျောင်းများလည်း အလားတူကမ်းလှမ်းလာကြသည်။ မြန်မာနိုင်ငံသည် ဗုဒ္ဓဘာသာထွန်းကားသည့်နိုင်ငံဖြစ်ရာ ကမ္မဋ္ဌာန်းရိပ်သာများ အမြောက်အမြားရှိသည်။ လက်ရှိအချိန်သည် ဗိုင်းရပ်စ်ကြောင့် တရားစခန်းများပိတ်ထားချိန်ဖြစ်နေရာ Quarantine ကိစ္စအတွက် အတော့်ကိုဟန်ကျသွားသည်ဟု ဆိုရမည်။ 
ပြီးခဲ့သည့် သီတင်းပတ်အတွင်းကလည်း ရေးသားဖော်ပြခဲ့သလိုပင်။ တကယ်တော့ နိုင်ငံကိုကာကွယ်ပေးနေသူများထဲတွင် လက်နက်ကိုင်သူ လူတစ်စုချည်းသက်သက် မဟုတ်သည်မှာ ယနေ့ခေတ်အခါတွင် ပိုမိုထင်ရှားလာပါသည်။ ဆိုက်ဘာတိုက်သည့် ခေတ်၊ ကုန်သွယ်ရေးအရ ထိုးနှက်သည့်ခေတ်၊ ရာသီဥတုဖောက်ပြန်သည့်ခေတ်၊ ကူးစက်ရောဂါတွေ နှိပ်စက်ခြိမ်းခြောက်လာသည့်ခေတ် စသည်ဖြင့် နယ်ပယ်အသီးသီး နေရာအသီးသီးတွင် အန္တရာယ်မျိုးစုံပေါများလာသော ခေတ်ကာလ၌ နိုင်ငံကာကွယ်စောင့်ရှောက်မှု ဟူသည့်ကိစ္စမှာ ပို၍ပင်ကျယ်ပြန့်လာသည်။ 
မြန်မာသည် ဗုဒ္ဓသာသနာထွန်းကားသလို သဒ္ဓါတရားလည်းအလွန်တရာမှပင် ကြီးမားသူများရှိသည့်နိုင်ငံဖြစ်သည်။ သဒ္ဓါကြည်လင်ပါရမီရှင် အမြောက်အမြားရှိသော တိုင်းပြည်လည်းဖြစ်သည်။ သို့အတွက် မိမိနိုင်ငံနှင့် လူ့အဖွဲ့အစည်း ဘေးအန္တရာယ်ကျရောက်လာချိန်၊ အကျပ်အတည်းဖြစ်လာချိန်တွင် နိုင်ငံရေး အမြတ်၊ စီးပွားရေးအမြတ်ထက်ကိုမကြည့်ဘဲ မိမိ၏ သဒ္ဓါတရား၊ မိမိတတ်ကျွမ်းသည့်ပညာ၊ မိမိတတ်နိုင်သည့်လုပ်အား၊ ထားနိုင်သည့် စေတနာဖြင့် ပါရမီဖြည့်ပေး ကြလိုသူများသာ မြင်တွေ့ရလိမ့်မည်ဟု ဆန္ဒပြုမိပေသည်။ 
အယ်ဒီတာ ( ၂၅ – ၃ – ၂၀၂၀)

Source : The Voice