fbpx

ညောင်လေးပင်မြို့နယ်၌ ပြည်ပပြန် ၃၀၀ ကျော်ရှိ၊ သံသယလူနာ ၄ ဦး၏ မိသားစုကို စောင့်​ကြည့်နေ

ပဲခူးတိုင်းဒေသကြီး၊ ညောင်လေးပင်မြို့နယ်အတွင်း ပြည်ပမှာအလုပ်သွားလုပ်​နေသူ ရွှေ့ပြောင်းလုပ်သား ၃၀၀ ကျော်ပြန်လည်ရောက်ရှိနေပြီး ကိုရိုနာဗိုင်းရပ်စ်စောင့်ကြည့်သံသယလူနာ ၄ ဦးရဲ့မိသားစုဝင်​တွေကို နေအိမ်မှာ အသွားအလာကန့်သတ် ​စောင့်ကြည့်စစ်ဆေးနေတယ်လို့ မြို့နယ်အ​ထွေ​ထွေ အုပ်ချုပ်​ရေးဦးစီးဌာနက ​​ပြောပါတယ်။

မတ်လ ၂၄ ရက်​က ​ပြည်ပက​ပြန်လာတဲ့ ရွှေ့ပြောင်းလုပ်သား ကျား ၁၀၅ ဦး၊ မ ၄၉ ဦး မတ်လ ၂၅ ရက်က  ကျား ၁၀၀ ဦး ၊ မ ၅၆ ဦးတို့ ညောင်လေးပင်မြို့နယ်ကို ပြန်လည်ရောက်ရှိခဲ့တယ်လို့ ဆိုပါတယ်။

ပြည်ပကပြန်လာသူတွေကို နေအိမ်မှာ ၁၄ ရက် စောင့်ကြည့်စစ်ဆေးနေပြီး စံဖဲကျေးရွာရဲ့ မူလွန်​ကျောင်းတခုကို စင်တာအ​ဖြစ်အသုံး​ပြုကာ ပြည်ပကပြန်လာသူ ၆ ဦးကို အဲ့ဒီစင်တာမှာ ၁၄ ရက်စောင့်ကြည့်စစ်ဆေးနေတယ်လို့ ညောင်လေးပင်မြို့နယ် အုပ်ချုပ်ရေးမှူး ဦးနော်မိုင်လှကြည်က ဒီဗွီဘီ ကိုပြောပါတယ်။

“ခုအချိန်ထိတော့ နောက်ထက် ကိုရိုနာဗိုင်းရပ်စ် သံသယလူနာ​တော့ ထပ်မတွေ့သေးဘူး၊ ပြည်သူတွေအနေနဲ့လည်းကျန်းမာရေးဦးစီးဌာနကညွှန်ကြားချက်အတိုင်း လိုက်နာဆောင်ရွက်ကြပါ။ ပြည်ပက ပြန်လာသူတွေရှိပါကလည်း အုပ်ချုပ်ရေးမှူးတွေ၊ ကျန်းမာရေးမှူးတွေကို အသိပေး အ​​ကြောင်း​ကြားပေးကြပါ။”

ညောင်လေးပင်မြို့နယ်မှာ မတ်လ ၂၄ရက်နဲ့ ၂၅ ရက်က တွေ့ရှိခဲ့တဲ့ ကိုရိုနာဗိုင်းရပ်စ်​စောင့်​ကြည့်​သံသယရှိသူ ၄ ဦးရဲ့ မိသားစုဝင်​တွေကို​ ရပ်ကျေးအုပ်ချုပ်ရေးမှူး​တွေနဲ့ ကျေးရွာကျန်းမာ​ရေးမှူး​​တွေက တနေ့ကို နှစ်​ကြိမ် စောင့်ကြည့်စစ်ဆေး​ပေးနေသလို သူတို့ရဲ့ မိသားစုဝင်တွေရဲ့စားဝတ်နေရေးကိုလည်း  ကူညီဆောင်ရွက်ပေးနေတယ်လို့ သိရပါတယ်။

သတင်း၊ဓါတ်ပုံ – နေလင်းထိုက်

Tags:

Source : DVB