fbpx

နိုင်ငံ ၃ ခုမှဟက်ကာများ အမေရိကန်ရွေးကောက်ပွဲကို ထောက်လှမ်းရန်ကြိုးပမ်းဟု မိုက်ခရိုဆော့ဖ် ပြော

ရုရှား၊ တရုတ်၊ အီရန်တို့နဲ့ အဆက်အသွယ်ရှိတဲ့ ဟက်ကာတွေဟာ ၂၀၂၀ အမေရိကန်သမ္မတ ရွေးကောက်ပွဲမှာ ပါဝင်ပတ်သက်တဲ့ လူတွေနဲ့ အဖွဲ့အစည်းတွေကို  ခိုးထောက်လှမ်းဖို့ ကြိုးပမ်းနေ တယ်လို့ မိုက်ခရိုဆော့ဖ်ကုမ္ပဏီက ပြောဆိုလိုက်ပါတယ်။ 

အဲဒီလို ခိုးထောက်လှမ်းရာမှာ ၂၀၁၆ ဒီမိုကရက်မဲဆွယ်ပွဲကို ခိုးဝင်ထောက်လှမ်းခဲ့တဲ့  ရုရှား ဟက်ကာတွေ ပြန်ပါလာတယ်လို့ မိုက်ခရိုဆော့ဖ်က ပြောပါတယ်။  

နိုင်ငံခြားတက်ကြွလှုပ်ရှားအဖွဲ့တွေက အမေရိကန်ရွေးကောက်ပွဲကို ပစ်မှတ်ထားဖို့ ကြိုးပမ်းနေတာ ထင်ရှားတယ်လို့ ကုမ္ပဏီက ဆိုပါတယ်။  

သမ္မတ ထရမ့်နဲ့ ဒီမိုကရက်  ဂျိုးဘိုင်ဒင် နှစ်ယောက်စလုံးရဲ့ မဲဆွယ်ပွဲတွေကို  ဟက်ကာတွေ ခိုးထောက်လှမ်းနေတာပါ။  

စထရွန်တီယမ်အဖွဲ့က ရုရှားဟက်ကာတွေဟာ အမေရိကန် နိုင်ငံရေးပါတီတွေနဲ့  ဆက်နွယ်တဲ့ အဖွဲ့အစည်း ၂၀၀ ကျော်ကို ပစ်မှတ်ထားနေတယ်လို့ မိုက်ခရိုဆော့ဖ်က သတင်းထုတ်ပြန်ပါတယ်။  

အဲဒီ ဟက်ကာတွေကပဲ ဗြိတိန်နိုင်ငံရေးပါတီတွေကိုလည်း ပစ်မှတ်ထားခဲ့ပြီး ဘယ်ပါတီ လည်း ဆိုတာကိုတော့ မိုက်ခရိုဆော့ဖ်က မပြောခဲ့ပါဘူး။ 

စထရွန်တီယမ်အဖွဲ့ဟာ ရုရှားစစ်ထောက်လှမ်းရေးနဲ့ ပေါင်းစည်းထားတယ်လို့ ဆိုတဲ့ ဖန်စီဘဲ (Fancy Bear) ဆိုက်ဘာတိုက်ခိုက်ရေးအဖြစ် ထင်ရှားပါတယ်။ 

ဒါ့အပြင် တရုတ်ဟက်ကာတွေက ဒီမိုကရက် ဂျိုးဘိုင်ဒင်မဲဆွယ်ပွဲနဲ့ အဆက်အသွယ်ရှိတဲ့ လူပုဂ္ဂိုလ်တွေကို ပစ်မှတ်ထားသလို အီရန်ဟက်ကာတွေကလည်း ထရမ့်မဲဆွယ်ပွဲနဲ့ ပတ်သက်သူ တွေကို ပစ်မှတ်ထား ဆက်ကြိုးပမ်းနေတယ်လို့ စက်တင်ဘာ ၁၁ ရက် ဘီဘီစီသတင်းမှာ  ဖော်ပြပါတယ်။

Source : DVB