fbpx

ကချင်ပြည်နယ်၊ ဝိုင်းမော်မြို့နယ်၊ ဝါရှောင်ဆရာတော် ဦးဝိဇယနှင့်တွေ့ဆုံခြင်း

“လူသားအရေးလုပ်တယ်ဆိုရင်တော့ လူသားအားလုံးရဲ့ ချစ်ခင်မြတ်နိုးခြင်းကိုရရှိတဲ့အပြင် ကိုယ့်ကိုမချစ်တဲ့ မနှစ်သက်တဲ့သူတောင်မှ ပြန်ချစ်လို့ရတယ်”
ကချင်ပြည်နယ်ရှိ လက်ရှိငြိမ်းချမ်းရေးအခြေအနေနှင့် ဝိုင်းမော်မြို့နယ်ရှိ တစ်ရှူးငှက်ပျောစိုက်ခင်း အခြေအနေများနှင့်ပတ်သက်၍ The Voice Daily က သွားရောက်တွေ့ဆုံမေးမြန်းထားသည်များကို ကောက်နုတ်ဖော်ပြအပ်ပါသည်။
Voice  : ဆရာတော်က ဒီမှာကျောင်းထိုင်နေတာ ဘယ်လောက်ကြာပြီလဲဘုရား။
UWZY   : ဒီကျောင်းမှာက ဘုန်းဘုန်းအရင် ၄ ပါး ရှိခဲ့တယ်။ ဘုန်းဘုန်းက ၅ ပါးမြောက်ပေါ့။ အခုဆိုရင် ဒီကျောင်းမှာအနှစ် ၂၀ ရှိပြီ။ လက်ရှိကတော့ ဒီကျောင်းမှာ မူကြိုကျောင်းဖွင့်ထားတယ်။ ၁၅ နှစ်လောက်ရှိပြီ။ ရှမ်းလူငယ်ပရဟိတဆိုပြီးဖွဲ့ထားတယ်။ ကချင်ပြည်နယ်မှာ ငြိမ်းချမ်းရေးနဲ့ ပဋိပက္ခပိုင်းမှာ လူငယ်တွေ နားလည်အောင် ပို့ချပေးနေတယ်။ 
Voice  : ငြိမ်းချမ်းရေးကိစ္စနဲ့ပတ်သက်ပြီး လူငယ်တွေကို ပို့ချပေးနေတယ်ဆိုတော့ ဘယ်လိုနည်းလမ်းတွေနဲ့ ပို့ချပေးနေပါလဲဘုရား။
UWZY   : ငြိမ်းချမ်းရေးကိစ္စတွေမှာ သူတို့ပါဝင်နိုင်တယ်ဆိုတဲ့အကြောင်းတွေ၊ အရည်အချင်းတွေ၊ ဘာတွေပေါ့။ ပြီးတော့ လူငယ်ငြိမ်းချမ်းရေးသင်တန်းတွေ၊ Development တွေ၊ အဲဒီလိုမျိုးလေးတွေ တော်တော်များများ မနားတမ်းလောက်နီးနီး လုပ်ပေးနေရတာပေါ့။ 
Voice  : တခြားအဖွဲ့အစည်းတွေက အထောက်အပံ့တွေဘာတွေ ရှိသေးလားဘုရား။
UWZY   : မရှိပါဘူး။ အဲဒါကြောင့် ဘုန်းဘုန်းကအမြဲတမ်းပြောတာလေ။ အရောင်အသွေးတွေ၊ ငွေရေးကြေးရေးတွေနဲ့ စကားတွေလည်း ဘယ်တော့မှမပြောဘူး။ ဒီငြိမ်းချမ်းရေးကိစ္စမှာ ကိုယ်ဝင်ပါနေတာမဟုတ်ဘဲနဲ့ ကိုယ့်လာပြီးတော့မှ ယုံကြည်လာကြတာ။ ယုံကြည်ကြတဲ့အချိန်ကျတော့ အဲဒီမှာအကူအညီလာတောင်းကြတာ။ အဲဒီလို အကူအညီလာတောင်းတော့ ဘုန်းဘုန်းက ဒီငြိမ်းချမ်းရေးကိစ္စတွေမှာ လူငယ်တွေပေါ့။ လူငယ်တွေဆိုရင် အဓိကဆိုရင် ကချင်နဲ့ ရှမ်းပေါ့။ ရှမ်းနဲ့ ကချင်ကြားထဲမှာ အနာဂတ်ကို ချစ်ချစ်ခင်ခင်နဲ့ သွားနိုင်ဖို့အတွက် ဗုဒ္ဓရဲ့အဆုံးအမလေးတွေ အများကြီးထဲကမှ သူတို့အရိပ်သုံးပါးနားလည်အောင် လက်တွေ့ကျအောင်ပြောပြီး သင်ပြီးပေးတာပေါ့။ 
Voice  : ငြိမ်းချမ်းရေးနဲ့ပတ်သက်လို့ ဆရာတော်ကိုယ်တိုင်က လူငယ်တွေအပေါ် ဘယ်လိုရှင်းပြပေးနေလဲဘုရား။
UWZY   : အဓိကတော့ ဒီမှာပြည်တွင်းစစ် တိုက်ပွဲတွေက ဒေသခံတိုင်းရင်းသားတွေကြားထဲမှာ ရိုက်ခတ်မှုအပြင် စွဲမြဲစူးဝင်သွားတာပေါ့။ အခုနှစ်ပေါင်း ၅၀၊ ၆၀ လောက် ဒီငြိမ်းချမ်းရေးကိစ္စနဲ့ပတ်သက်ရင် တိုင်းရင်းသားတွေ အချင်းချင်းကြားခံစားထားရတာတွေက အခုမှပြောချင်လာကြတာပေါ့။ အဲဒီတော့ တွန်းမိတိုက်မိတာမျိုးလေးတွေလည်း ရှိတာပေါ့။ အဲဒါလေးတွေကို ဘုန်းဘုန်းကကြားကနေဝင်ပြီးတော့ လုပ်ပေးနေရတာပေါ့။ အထင်ရှားဆုံးစကား ပြောပြရရင် မင်းတို့လူမျိုးရေးမလုပ်နဲ့၊ လူသားအရေးလုပ်ပါ။ လူမျိုးရေးလုပ်လို့ရှိရင် ချစ်ခင်ခြင်းကို မရနိုင် တဲ့အပြင် ရရှိနေပြီးဖြစ်တဲ့ ချစ်ခင်ခြင်းကိုတောင်မှ ဆုံးရှုံးသွားနိုင်တယ်။ လူသားအရေးလုပ်တယ်ဆိုရင်တော့ လူသားအားလုံးရဲ့ ချစ်ခင်မြတ်နိုးခြင်းကို ရရှိတဲ့အပြင် ကိုယ့်ကိုမချစ်တဲ့၊ မနှစ်သက်တဲ့သူတောင်မှ ပြန်ချစ်လို့ရတယ်။ အဲဒီတော့ မင်းတို့လူမျိုးရေးမလုပ်နဲ့၊ လူသားအရေးလုပ်ပါပေါ့။ နောက်ပြီးတော့ လူကြီးတွေဖြစ်တဲ့ ဘာသာရေးခေါင်းဆောင်တွေ၊ စစ်ရေးခေါင်းဆောင်တွေ၊ အဲဒီလူကြီးတွေရဲ့ အတိတ်ကရန်ငြိုးတွေနဲ့ မင်းတို့ကို အမုန်းစကားတွေ တိုက်တွန်းတဲ့ကိစ္စတွေမှာ မင်းတို့နားမယောင်ဖို့လိုမယ်။ မင်းတို့ ရဲရဲရင့်ရင့်ပြန်ပြောရမယ်။ ဘယ်လို ပြောရမလဲဆိုတော့ 
အဖေတို့၊ အမေတို့၊ အဘိုးအဘွား တို့၊ ကျွန်တော်တို့ကို အမုန်းတွေ မသင်ပေးပါနဲ့။ ကျွန်တော်တို့ အနာဂတ်လူငယ်တွေအားလုံး လွတ်လွတ် လပ်လပ်နဲ့ ချစ်ခြင်းမေတ္တာနဲ့ သွားခွင့်ပေးပါလို့ မင်းတို့ဒါမျိုးတွေ တောင်းဆိုရမယ်။ ဘုန်းဘုန်းကိုယ်တိုင်ကလည်း လူငယ်က ကိုယ့်ကိုယ်ကြောက်နေတာမျိုး မဟုတ်ဘဲနဲ့ ယုံကြည်တာမျိုးဖြစ်အောင်၊ အဲဒီလုပ်ပေးတဲ့ ကဏ္ဍအပိုင်းပေါ့။ ဒါကတော့ အရပ်သုံးစကားနဲ့ ပြောပေးတာပေါ့။ 
Voice  : သင်တန်းမှာ လာတက်တဲ့သူတွေက လူမျိုးစုံပဲလား၊ ဘယ်လိုလူမျိုးတွေများလဲ ဘုရား။ 
UWZY   : ဒီမှာက လူမျိုးမစုံဘူး။ လူမျိုးနှစ်မျိုးပဲ ရှိတယ်။ ကချင်နဲ့ ရှမ်းပဲ၊ ကချင်က လူများစု၊ ခရစ်ယာန်က လူများစု၊ ဗုဒ္ဓဘာသာက အနည်းစု၊ ကချင်က အိမ်ထောင်စုပေါင်းရာထောင်ချီရှိတယ်။ ဘုန်းဘုန်းတို့ ရှမ်းဗုဒ္ဓဘာသာက ၅၀ ပဲရှိတယ်။ အခု အရှေ့ကိုသွားရင် ကချင်နှစ်ခြင်း ခရစ်ယာန်၊ တောင်ဘက်ကိုသွားရင် ရှမ်းနှစ်ခြင်းခရစ်ယာန်၊ မြောက်ဘက်ကိုသွားရင် လီဆူနှစ်ခြင်းခရစ်ယာန်၊ အနောက်တည့်တည့်သွားရင် လော်ဝေါ်နှစ်ခြင်းခရစ်ယာန်၊ ဒီနားမှာကပ်နေတဲ့ အနောက်မြောက်ထောင့်နားမှာ အေဂျီနှစ်ခြင်းခရစ်ယာန်ရှိတယ်။ အဲဒီလိုကြားထဲမှာ နေနေတာ၊ အဓိက,ကတော့ ဘုန်းဘုန်းနေတာက ထူးခြားတယ်။ အဲဒါလည်း စံပြအဖြစ်နဲ့ ပြောလို့ရတယ်။ 
Voice  : အဲဒီလို နေနေရတာဆိုတော့ ဘုန်းဘုန်းအနေနဲ့ စိုးရိမ်မှုတွေခံစားရလား။
UWZY   : ဒီအရပ်ဆိုရင် အရင်တုန်းက KIA နဲ့ စစ်တပ်ပဲရှိတာ။ ဒီကလူတွေက အဲဒီ KIA နဲ့ စစ်တပ်ကြားထဲမှာနေလာတဲ့ ပုဂ္ဂိုလ်တွေပေါ့။ အခု ဘုန်းဘုန်းရောက်လာတော့ ဘုန်းဘုန်းက တစ်သက်လုံးလည်း ကချင်တွေနဲ့နေခဲ့တယ်။ ကိုယ့်မိတ်ဆွေတွေ၊ ဆရာတွေ၊ ကျေးဇူးရှင်တွေလည်းရှိတယ်။ အဲဒီလိုဆိုတော့ ဘုန်းဘုန်းကအကြောင်းသိတာပေါ့။ ပြီးတော့ ဘုန်းဘုန်းက ဒီမှာဘာသာရေးမပြောဘူး။ လူမျိုးရေးမပြောဘူး။ အခုအချိန်အထိကို သူတို့ကို လူမျိုးရေး၊ ဘာသာရေးမပြောတော့ သူတို့က အရမ်းအံ့သြယုံကြည်တယ်။ ကလေးတွေကို စာသင်ပေးတယ်။ ဘာသာဝင်ဖို့လည်း တစ်ခွန်းမှမပြောဘူး။ နောက်မူကြိုကျောင်းဖွင့်တော့ ကချင်ခရစ်ယာန်ကလေးတွေ ပါလာတယ်။ အဲဒီကလေးတွေရှေ့မှာပဲ ဆရာမတွေ ပြောတယ်။ ဟေ့ငါတို့က ဘာသာရေးလုပ်တာ မဟုတ်ဘူး။ ငယ်ငယ်ကတည်းက ဝေစားမျှစားပတ်ဝန်းကျင်ကောင်းလေး၊ ဉာဏ်ပညာရှိတဲ့၊ ချစ်ခြင်းမေတ္တာရှိတဲ့ ပတ်ဝန်းကျင်လေးရှိဖို့ပဲ ဖန်တီးဖို့ပဲလုပ်တယ်။ ဒါပေမဲ့ ကလေးဆိုတာ အများလုပ်ရာလိုက်တယ်။ အဲဒီတော့ ငါတို့ရဲ့ ဗုဒ္ဓဘာသာအရ မနက်ဘုရားဝတ်ပြုတာတွေလုပ်ရင် ဒီကချင်ကလေးတွေကို ပွေ့ပြီးအပြင်ထွက်သွား၊ ဒီမှာလာမရှိခိုးခိုင်းနဲ့၊ အဲဒီလောက်အထိလုပ်တယ်။ 
Voice  : အခု ဒီမှာရောက်ရှိတဲ့ ကာလတစ်လျှောက်မှာ ဗုဒ္ဓဘာသာနဲ့ ခရစ်ယာန်ဘာသာတို့ရဲ့ နားလည်မှုရှိပုံလေး ရှင်းပြပေးပါလားဘုရား။
UWZY   : အများအားဖြင့် ခရစ်ယာန်ရွာတွေမှာက ဗုဒ္ဓဘာသာနည်းလို့ရှိရင် ဥပုသ်နေ့ ကျောင်းမပိတ်ပေးကြဘူး။ ဘုန်းဘုန်းဒီရောက်တာ ၁၈ နှစ်၊ ၁၉ နှစ်လောက်ရှိပြီ။ ဥပုသ်နေ့တိုင်း ကျောင်းပိတ်ပေးတယ်။ ဝါဆိုသင်္ကန်းကပ်တာတွေ ကြည်ကြည်ဖြူဖြူ လုပ်ပေးလာတယ်။ အင်အားကြီးတဲ့ ခရစ်ယာန်တွေ၊ ကချင်လူမျိုးတွေက အင်အားနည်းတဲ့ ဗုဒ္ဓဘာသာဝင်မိသားစုတွေကို သဘောထားကြီးစွာနဲ့ ဥပုသ်နေ့ကို လေးလေး စားစားနဲ့ ကျောင်းပိတ်ပေးတယ်ဆိုတာ ၁၈ နှစ်၊ ၁၉ နှစ်ရှိပြီ။ အားလုံးချစ်ခြင်းမေတ္တာရဲ့ ပြယုဂ်အနေနဲ့ ပိတ်ပေးတာပါ။ ဒါလည်း အနာဂတ်ကလေးတွေကြားထဲမှာ စံပြပဲ။
Voice  : ဆရာတော်ဘုရားလုပ်နေတဲ့ ငြိမ်းချမ်းရေးလုပ်ငန်းတွေမှာ ဘယ်လိုအခက်အခဲတွေများရှိလဲ ဘုရား။
UWZY   : ဘုန်းဘုန်းအနေနဲ့ အခက်အခဲရှိတာကတော့ ကိုယ့်အတွင်းလူ၊ အရင်းနှီးဆုံးသူတွေရဲ့ အထင်လွဲခံရတာ။ ဗုဒ္ဓဘာသာဘက်ကနေ၊ ဘုန်းကြီးတွေဘက်ကနေ၊ စစ်တပ်ဘက်ကနေ အထင်လွဲခံရတာပေါ့။ ကချင်ရွာမှာနေလို့ KIA ဖြစ်သွားပြီတို့၊ ကချင်ဘက်ပါသွားပြီတို့၊ ခရစ်ယာန်ဘက်ပါသွားပြီတို့ သံသယဖြစ်ကြတာပေါ့။
Voice  : အခုအချိန်မှာရော အဲဒီလိုသံသယဖြစ်မှုတွေ ရှိသေးလားဘုရား။
UWZY   : အခုအချိန်မှာတော့ တော်တော်လေးယုံကြည်သွားကြပြီလို့ ကိုယ့်အနေနဲ့ ခန့်မှန်းမိတာပေါ့။ ဟုတ်ချင်မှလည်း ဟုတ်မှာပေါ့။ ထပ်မံ ပြေလည်လာတာကတော့ မီဒီယာတွေ၊ နိုင်ငံတကာက အန်ဂျီအိုအဖွဲ့အစည်းတွေက အင်တာဗျူးတာတွေ လာလုပ်တယ်။ နောက်ပြီးတော့ ငြိမ်းချမ်းမေတ္တာအဖွဲ့မှာလည်း ဘုန်းဘုန်းကို တကူးတကနာယကခန့်တယ်။ ငြိမ်းချမ်းရေးပွဲတွေမှာ ဘုန်းဘုန်းက ဘာမှပညာရှင်တစ်ယောက် မဟုတ်ပေမယ့်၊ မတတ်ပေမယ့် လက်တွေ့လုပ်နေတဲ့ဟာတွေကို ယုံကြည်ပေးလာတယ်လို့တော့ မြင်တယ်။ ဗုဒ္ဓဘာသာဘက်ကလည်း ဘုန်းဘုန်းကို နားလည် ပေးလာတယ်လို့ ထင်တာပေါ့လေ။ 
Voice  : ဒီအောက်ခြေမှာ ဖြစ်နေတဲ့ကိစ္စတွေကို ဆရာတော်အနေနဲ့ ဘယ်လိုဖြေရှင်းပေးရတာတွေရှိလဲဘုရား။
UWZY   : ဒီဝါရှောင်ရွာဆိုရင် ကေအိုင်ကေနဲ့ စစ်တပ်ပဲရှိတာ။ ကေအိုင်အေက ဟိုဘက်မှာနေတယ်။ စစ်တပ်က ဒီဘက်မှာနေတယ်။ သူတို့တစ်ခုခု ပြဿနာဖြစ်လို့ရှိရင် ဒီတပ်ရင်းမှူးတွေ ဘာတွေကအစ ဘုန်းဘုန်းဆီမှာ လာပြီးတော့ပြရတယ်။ ဟိုတစ်လောကပဲ ကလေးတွေ စုဆောင်းရေးပါသွားတာရှိတယ်။ ဘုန်းဘုန်းတို့ ရှမ်းဘက်တွေကပါသွားတာ။ အဲဒီကိစ္စကို အများကြီးကူညီစောင့်ရှောက်ပေးခဲ့တယ်။ ဘုန်းဘုန်းဆိုလို့ရှိရင် အစိုးရတွေထက် ထိရောက်တယ်။ ဘာဖြစ်လို့လဲဆိုတော့ ဘုန်းဘုန်းကဒေသခံဖြစ်တယ်။ ကချင်နဲ့ကေအိုင်အေအကြောင်းကို ကောင်းကောင်းသိတယ်။ သူများပြောလို့မရတာကို ဘုန်းဘုန်းပြောရင် သူတို့ယုံကြည်ပေးတယ်။ အဲဒီမှာ သူတို့ကဘုန်းဘုန်းကို ကြောက်လို့မဟုတ်ဘူး။ ငယ်ငယ်ကတည်းက ဒီမှာနေခဲ့တယ်။ ဘယ်လိုရာဇဝင်ရှိတယ်၊ လက်တွေ့ဘယ်လိုလုပ်နေတယ်ဆိုတာ သူတို့ကပိုသိတာပေါ့။
Voice  : အခုလက်ရှိအစိုးရကလည်း ငြိမ်းချမ်းရေးလုပ်နေတယ်။ အဲဒီအပေါ်မှာ ဘာများလိုအပ်ချက်ရှိမလဲ။ ဘုန်းဘုန်းမြင်တာလေး ပြောပြပေးပါဘုရား။ 
UWZY   : ငြိမ်းချမ်းရေးဖြစ်စဉ်မှာ အစိုးရနဲ့ စစ်တပ်နှစ်ခုတည်းလုပ်နေလို့ ဘယ်လိုနည်းနဲ့မှမရနိုင်ဘူး။ ကချင်ပြည်နယ်မှာ ဘယ်သူတွေ၊ ဘာသာရေးဘက်မှာ ဘယ်သူကဖြင့် ယုံကြည်မှုရှိသလဲ။ အဲဒီဟာတွေ အကုန်လုံးက ငြိမ်းချမ်းရေးညီလာခံမှာ အခမ်းအနားလိုမလုပ်ဘဲနဲ့ ရိုးရိုးပဲ ပြည်ထောင်စုထမင်းဝိုင်း၊ ၂၁ ရာစု တိုင်းရင်းသား ထမင်းလက်ဆုံစားပွဲသဘောမျိုးနဲ့ အခန်းတံခါးပိတ် ဆွေးနွေးရမယ့် သဘောမျိုးဖြစ်တယ်။ စစ်တပ်လည်းမသိဘူး။ အစိုးရလည်း မသိဘူး။ သူတို့သိတာက သူတို့လုပ်ရင် ပြေလည်မယ်ပဲထင်တာ။ ဘယ်လိုမှမဖြစ်နိုင်ဘူး။ မြန်မာနိုင်ငံတော်ကို စစ်တပ်နဲ့ အစိုးရပဲပိုင်သလား။ သူတို့ပိုင်တယ်လို့ သူတို့ပြောရဲသလား။ တစ်နိုင်ငံလုံးပိုင်တယ်။ တိုင်းရင်းသားပြည်သူအားလုံး ပိုင်တယ်လို့ သူတို့ သိတယ်ဆိုရင် အားလုံးခေါ်ရမှာလေ။ ငြိမ်းချမ်းရေးက ဘာဖြစ်နေလဲဆိုရင် ပညာရှင်တွေသိပ်များနေတယ်။ နည်းစနစ်တွေ သိပ်များနေတယ်။ တကယ့် ရှေးရိုးနည်းနဲ့ တိုင်းရင်းသားယဉ်ကျေးမှုနဲ့ ညှိနှိုင်းလို့ရတာရှိတယ်။ ဒေသစရိုက်နဲ့ ညှိနှိုင်းလို့ရတာရှိတယ်။ လူမျိုးစရိုက်တွေနဲ့ ညှိနှိုင်းလို့ရတာရှိတယ်။ အဲဒီနည်းနဲ့ သွားရမှာ။ 
Voice  : ဆရာတော့်အနေနဲ့ ဒီဘက်ဒေသမှာ တိုက်ပွဲဖြစ်တာတွေ ကြုံခဲ့ဖူးလားဘုရား။
UWZY   : ကချင်ပြည်နယ် ဒီနေရာမှာ ဘုန်းဘုန်းတို့ဘက် ဝါရှောင်ဟာ အငြိမ်းချမ်းဆုံးပဲ။ ၂၀၁၁/ ၂၀၁၃ စစ်ဖြစ်တဲ့အချိန်တုန်းကတော့ ဒီဘက်က စုဆောင်းရေးဆွဲတာတွေရှိတယ်။ ရှမ်းရွာတွေ စုဆောင်းရေးဆွဲတော့ ဘုန်းဘုန်းက ကေအိုင်အေအကြီးအကဲတွေနဲ့ အသေအချာပြောထား၊ ကတိကဝတ်တွေ ယူထားတဲ့ အတွက်ကြောင့်မို့လို့ ဒီလိုဆွဲတာတွေတောင်မရှိဘူး။ ဒါပေမဲ့ အောက်ခြေမှာက မတစ်ထောင်သားတွေ ဖြစ်တဲ့အတွက် ဖြစ်လာတာတွေရှိလို့ရှိရင် တိတိကျကျ ပြောပါ၊ တိတိကျကျ အရေးယူပါ့မယ်။ အဲဒီလို ခံဝန်ချက်တွေနဲ့ တိတိကျကျလုပ်ထားတာကြာပါပြီ။ ဒါပေမဲ့ အဲဒီလို ကတိခံဝန်ယူထားလို့ မဖြစ်ဘူးလားဆိုတော့ အောက်ခြေမှာ ဖြစ်နေတာတွေတော့ ရှိတယ်။ ဒါပေမဲ့ ဖြေရှင်းပေးနေတယ်ပေါ့။
Voice  : စစ်ဘေးရှောင်တွေကို အရှင်ဘုရားအနေနဲ့ ဘယ်လိုကူညီပေးနေတာတွေ ရှိသလဲ။ 
UWZY   : စစ်ဘေးဒုက္ခသည်တွေနဲ့ ပတ်သက်လို့ကတော့ အခုလောလောဆယ် မကူညီပေးဖြစ်ဘူး။ ဘာဖြစ်လို့လဲဆိုတော့ ကူညီစရာမလိုတော့တဲ့ အနေအထားမျိုး ဖြစ်သွားတာကိုး။ ပြန်လည်နေရာချရေးတွေ လုပ်နေတယ်။ သူတို့ဘာသာသူတို့ အသုတ်လိုက်ခွဲလိုက်ပြီးတော့ သွားနေတာတွေရှိတယ်။ ပြီးတော့ သူတို့တွေက ဒုက္ခသည်အနေနဲ့နေသားကျနေပြီ။ ဒုက္ခတွေထဲကနေ ပျားရည်ရှာလျက်နေရတဲ့ အနေအထားမျိုးဖြစ်နေပြီ။ ဘုန်းဘုန်းက လောလောဆယ်သာ မကူညီဖြစ်တာပါ။ အခက်အခဲဖြစ်လာပြီ၊ ကပ်ဘေးဖြစ်လာပြီဆိုရင် လုံလုံလောက်လောက် ထိထိရောက်ရောက်သွားပြီး ကူညီပေးပါတယ်။ 
Voice  : ဒီဒေသမှာ ဘာများအခက်အခဲရှိလဲဘုရား။
UWZY   : အခက်အခဲကတော့ ဒေသခံဖြစ်တဲ့ ရှမ်းနဲ့ ကချင်ကြားထဲမှာ ဖြစ်နေတဲ့ကိစ္စပေါ့။ အရင်ကတော့ အရင်ကထက်စာရင် တော်တော်လေးကို ပြေလည်နေပါပြီ။ ဘုန်းဘုန်းတို့ကြိုးစားနေတဲ့အတိုင်း ဖြေလျှော့ပေးနေတဲ့ အနေအထားလေးတွေ ရှိတယ်။ ပေါင်းစည်းပေးတဲ့ ဆိုက်တွေလည်းရှိတယ်။ အဲဒီနှစ်ခုကို မေတ္တာနဲ့ သွားမယ်ဆိုရင်တော့ အဆင်ပြေသွားပါလိမ့်မယ်။ အဓိက ကတော့ ကချင်နဲ့ ရှမ်းဟာ အဓိကပဲ၊ ဒေသခံ တိုင်းရင်းသားတွေဖြစ်တယ်။ အဲဒီနှစ်ခု ညီညွတ်နေမယ်၊ ပါတီတွေ၊ တိုင်းရင်းသားအဖွဲ့အစည်းတွေ ပြေလည်နေမယ်၊ ပြီးတော့ ရှမ်းနဲ့ ကချင်၊ ခရစ်ယာန်နဲ့ ဗုဒ္ဓဘာသာ ညီညီညွတ်ညွတ်နဲ့ နေသွားမယ်ဆိုရင် အဆင်ပြေတယ်။ 
Voice  : တစ်ရှူးငှက်ပျောစိုက်တဲ့ ကိစ္စမှာဖြစ်နေတဲ့ ပြဿနာလေးတွေရဲ့အခြေအနေလေးတွေ ရှင်းပြပါဦးဘုရား။
UWZY   : တစ်ရှူးငှက်ပျောကိစ္စကတော့ ဘုန်းဘုန်းပဲ အထူးပြောနေတာပေါ့နော်။ ဘုန်းဘုန်းကိုယ်တိုင် အခြေခံလူတန်းစားတွေအပေါ်မှာ ကူညီစောင့်ရှောက်နေရတာပေါ့။ ဒီတစ်ရှူးငှက်ပျောကိစ္စက ဘယ်လောက်ထိအောင် အန္တရာယ်ကြီးသလဲဆိုရင် နိုင်ငံသိမ်းမဟာ ဗျူဟာပဏာမအစပျိုးခြင်းနည်းဗျူဟာကို ဒီကချင်ပြည်နယ်မှာရှိတဲ့ ကျေးရွာတွေ၊ မြို့နယ်တွေကို အစပျိုး သိမ်းပိုက်ပြီးသွားပြီ။ ဒါကတစ်ချက်ပေါ့။ နောက်တစ်ခုက အင်မတန်ယဉ်ကျေးသိမ်မွေ့စွာနဲ့ ဒီဘက်က တိုင်းရင်းသူတွေကို လူကုန်ကူးခြင်းအော်တိုမက်တစ် ဖြစ်တယ်။ နောက်တစ်ခါ မူးယစ်ဆေးဝါးတွေ၊ အဲဒီထဲမှာ တစ်သောင်းကို ၅ လုံးလောက်ဖြစ်တယ်။ ဥပဒေမဲ့ဒေသ တကယ့်ဂိုဏ်းစတားတွေနေတဲ့ နေရာလိုမျိုးပေါ့။ နောက်တစ်ချက်က ရောက်လာတဲ့ ရွှေ့ပြောင်းအလုပ်သမားတွေက ဘယ်ကလာမှန်းလည်း မသိဘူး။ မှတ်ပုံတင်မရှိတာလည်းပါမယ်။ အဲဒီလိုလူတွေ ဒီဘက်ရောက်လာတယ်။ သူတို့က သူ့စရိတ်သူစားပြီး တစ်ရက် ၅၅၀ဝ နဲ့ နေ့စားလုပ်စားရတာ။ နေရတာက ကျူးကျော်တဲထက်ဆိုးတယ်။ လုပ်ငန်းရှင်တွေက နာရေးသာရေး ဘာမှလှည့်မကြည့်ဘူး။ ကျောင်းမနေရတဲ့ကလေးတွေ ရာပိုင်းရှိတယ်။ ငွေလိမ်လည်တာမျိုးတွေ၊ အနိုင်ကျင့်တာတွေရှိတယ်။
Voice  : တချို့က တစ်ရှူးငှက်ပျောစိုက်ခင်းတွေမှာ ဓာတုဆေးတွေသုံးတာနဲ့ပတ်သက်လို့ ဝေဖန်မှုရှိတဲ့အပေါ် ဆရာတော်ရဲ့ ထင်မြင်ချက်လေး ရှင်းပြပါလားဘုရား။
UWZY   : ဟုတ်ပါတယ်။ ဒီရွာတွေမှာ၊ ငှက်ပျောစိုက်ခင်းလုပ်သားတွေမှာ ဒီဓာတုဆေးတွေရဲ့ ဆိုးကျိုးကိုခံစားနေရတယ်။ ကလေးတွေ အများကြီးသေသွားတာရှိတယ်။ မသန်မစွမ်းတွေ ဖြစ်တာတွေရှိတယ်။ ကိုယ်ဝန်ပျက်ကျတာတွေရှိတယ်။ သားပြတ်ကျတာတွေရှိတယ်။ မူးလဲတာတွေရှိတယ်။ မြေပျက်တာ၊ မပျက်တာကတော့ မပြောတော့နဲ့။ အဲဒါတွေကိုလည်း ဘုန်းဘုန်းကလိုက်ကူညီစောင့်ရှောက်ပေးနေရတယ်။ ငှက်ပျောမှာသုံးတဲ့ ဓာတုဆေးတွေနဲ့ပတ်သက်လို့ သူတို့က ကာဗာတွေပေးတယ်။ ဘာညာတော့ ပြောနေတာပဲ။ ဖြစ်နေတာတွေကလည်း ဖြစ်နေတာပဲ။ နောက်တစ်ခုကတော့ ငှက်ပျောကားနဲ့ဆက်စပ်ပြီး နယ်မြေချဲ့ထွင်သိမ်းပိုက်ခြင်းဟာ ဓာတ်ဆီဆိုင်တွေ အကုန်လုံး တောက်လျှောက်စိပ်စိပ် ဖြစ်လာတယ်။ အဲဒီဓာတ်ဆီဆိုင်တွေမှာ ကားတွေအများကြီးထိုးတယ်။ ကားတွေဝင်လာတဲ့အချိန်မှာ ဘာသယ်လာမှန်း မသိဘူး။ ရှာဖွေခွင့်မရှိဘူး။ ပြန်ထွက်သွားတဲ့ အချိန်ဘာတွေသယ်သွားမှန်းမသိဘူး။ ရှာဖွေခွင့်မရှိဘူး။ အရမ်းအန္တရာယ်ရှိတယ်။ 
Voice  : ဝင်/ထွက် စစ်ဆေးတဲ့ဂိတ်တွေကရော မစစ်ဆေးဘူးလားဘုရား။
UWZY   : ဂိတ်တွေကိုက တရုတ်ယွမ်နဲ့ အဆိပ်ခတ်သွားပြီ။ တရုတ်တစ်ရှူးငှက်ပျောမှာ အပျက်စီးဆုံးဟာ ဝန်ထမ်းတွေ၊ လဝက၊ ရဲ သူတို့ရဲ့ ကိုယ်ကျင့်တရား၊ အဂတိတရားတွေကို ဖဲ့ဖဲ့စားနေတာ။ ဒီဟာတွေ ဖဲ့စားပြီဆိုမှတော့ နိုင်ငံတော်ရဲ့ အနာဂတ်သစ်ကိုလည်း ဖဲ့ခြွေပြီးဖြစ်နေတဲ့အချိန်ဖြစ်နေတော့ ဒီတစ်ရှူး ငှက်ပျောလုပ်ငန်းကို ရေရှည်လုပ်မယ်ဆိုလို့ရှိရင် နိုင်ငံတော်ပျက်သုဉ်းရေးနဲ့ ဒါတိုက်ရိုက်အချိုးညီတယ်၊ အချိုးကျတယ်လို့ ပြောချင်တယ်။
Voice  : အစိုးရတာဝန်ရှိသူ၊ လူကြီးပိုင်းတွေကရော ဒီငှက်ပျောစိုက်ခင်းတွေနဲ့ပတ်သက်လို့ စစ်ဆေးတာမျိုးတွေ မရှိဘူးလားဘုရား။
UWZY   : အစိုးရတွေက ဗဟိုဌာနကို မဖြေရှင်းနိုင်ဘူး။ မပြောဘဲနဲ့ အခွန်ရပါတယ်၊ အလုပ်သမားရပါတယ်ဆိုပြီး ပြောလိုက်တဲ့အခါကျတော့ ဗဟိုက ဒါကိုမသိဘူး။ အဲဒါကြောင့်မို့လို့ ဒါကြီးက ကွယ်ပေးသလိုဖြစ်ပြီး အမြစ်တွယ်သလို ဖြစ်နေတာ။
Voice  : ဒီကိစ္စနဲ့ပတ်သက်လို့ ဆရာတော့်အနေနဲ့ ဗဟိုအစိုးရကိုတိုင်စာပို့တာတို့၊ လှုပ်ရှားတာတို့မလုပ်ဘူးလား။
UWZY   : သမ္မတလည်း တိုင်စာပို့တယ်။ သတင်းစာရှင်းလင်းပွဲလည်းလုပ်တယ်။ ဘာမှမထူးခြားဘူး။ နောက်ဆုံး ဒီလောက်ပြောလို့ ဘုန်းဘုန်းအသက်ကိုတောင် လုပ်ကြံနိုင်တယ်။ ဘုန်းဘုန်းရှေ့နေတွေ ခြိမ်းခြောက်စာပို့ခံရတယ်။ လွှတ်တော်ကိုယ်စားလှယ်တစ်ယောက်ဆိုရင် သိန်း ၃၀ မကုန်ပါဘူးကွာဆိုတဲ့အထိ ခြိမ်းခြောက်ခံရတာတွေရှိတယ်။ အခု ဒီစကားပြောနေတာ ဘုန်းဘုန်းကမုန်းလို့ပြောတာ မဟုတ်ဘူး။ ဒီနိုင်ငံနဲ့ ပြည်သူ၊ အစိုးရတွေကို သူတို့မရောက်နိုင်တဲ့နေရာ၊ သူတို့မသိနိုင်တဲ့နေရာတွေကို ဘုန်းဘုန်းက ကူညီပေးခြင်းပဲ။ ချစ်လို့ ဒီကိစ္စကိုပြောတာ။ အခုလို ပြောလိုက်လို့ ချက်ချင်းကြီး ဘယ်လိုလုပ်ပစ်လိုက် ညာလိုလုပ်ပစ်လိုက် မပြောပါဘူး။ ချက်ချင်းလုပ်ပစ်လို့ရတဲ့ ကိစ္စမဟုတ်ဘူး။ အသေအချာစစ်ကြည့်ပါ။ ဘယ်လောက်အန္တရာယ်ရှိတယ်ဆိုတာ။ ဒါပေမဲ့ လူသိရှင်ကြား ဟိုလူကြီးလာမယ်၊ ဒီဝန်ကြီးလာမယ်လို့ လုပ်လို့မရဘူး။ အသွင်ယူပြီး စုံစမ်းရမှာ။
Voice  : ဘာများဖြည့်စွက်ပြောချင်ပါသေးလဲ ဘုရား။
UWZY   : အခုလို ပြောဆိုနေရတာတွေဟာ အစိုးရကို မုန်းလို့မဟုတ်ဘူး။ စစ်တပ်ကိုမုန်းလို့ မဟုတ်ဘူး။ တရုတ်ကိုမုန်းလို့မဟုတ်ဘူး။ နိုင်ငံနဲ့ တိုင်းရင်းသားပြည်သူအားလုံးကို ချစ်လွန်းလို့၊ အနာဂတ်ကြီး ပြိုပျက်မှာကြောက်လွန်းလို့ ပြောပေးတဲ့အပိုင်းတစ်မျိုးပါပဲ။ အဲဒါသိစေချင်တယ်။ တိုင်းရင်းသားပြည်သူတွေရဲ့ဘဝကို နားလည်လို့ ဘုန်းဘုန်းတစ်ပါးအနေနဲ့ ပြောနေရတယ်ဆိုတာ နားလည်ပေးပါလို့ ပြောချင်တယ်။
ဇော်မိုးလွင်

Source : The Voice