fbpx

မနက်ဖြန်များကို ကယ်တင်ရအောင်

                                                                                                                                                                                            ၁။
ဒုတိယလှိုင်းရဲ့ဂယက်က ကျွန်တော်တို့နိုင်ငံ၏ ပုံစံဟောင်းမကျ၊ ပုံစံသစ်မကသော လတ်တလောလူနေမှုကို လှုပ်နှိုးလိုက်ပြီဖြစ်သည်။ ‘ဒီနေ့ မနက် ပိုးတွေ့လူနာတစ်ရာကျော်သတဲ့’၊ ‘မနေ့ညက ကိုးဆယ်ကျော်လေ’၊ ‘ဟိုတစ်နေ့က ခုနစ်ဆယ်ဆိုပဲ’ စသလို အသံတွေနဲ့ တစ်ယောက်ကို တစ်ယောက် နှုတ်ဆက်ရင်း သတင်းပေး၊ သတင်းပေးရင်း နှုတ်ဆက်ကြ။
၂၀၂၀ ရဲ့ နှစ်သစ်ကူးလက်ဆောင်ကို ကျွန်တော်တို့ကမ္ဘာသူ ကမ္ဘာသားတွေ ဘယ်သူမှ မတောင်းဆို၊ ဘယ်သူမှ မမျှော်လင့်ထားပါပဲ အောင့်သက်သက်နဲ့ လက်ခံခဲ့ကြရတယ်လေ။ အစပိုင်းမှာ ကျွန်တော်တို့ အများစုဟာ ကိုယ့်နိုင်ငံနဲ့မပတ်သက်နိုင်ဘူးလို့ကို အထင်ရောက်ခဲ့ကြတာပါ။ မြန်မာ နိုင်ငံအတွက် ပထမဆုံးလူနာကို စတင်တွေ့လိုက်ချိန်မှာတော့ တစ်နိုင်ငံလုံးအုန်းအုန်းကျွက်ကျွက်နဲ့ အလုအယက်ဈေးတွေဝယ်ကြ၊ အလုပ်တွေနား ကြရင်း ကပ်ဆိုးကို စတင်ရင်ဆိုင်လိုက်ကြလေရဲ့။ အစိုးရိမ်ကြီးမှုကြောင့် အကာအကွယ်ပစ္စည်းတွေရဲ့ဈေးကွက်ဟာ ကြောက်ခမန်းလိလိ မြင့်တက် သွားခဲ့တာ အားလုံးအသိလေ။
‘ဒီကပ်ကြီးပြီးရင်…’ ဆိုတဲ့ခေါင်းစဉ်တွေနဲ့ ကိုယ့်စိတ်ကူးတွေ ကိုယ်ဖြစ်ချင်တာတွေကို ဆိုရှယ်မီဒီယာပေါ်မှာ ခံစားရင်ဖွင့်ကြပေါ့။ စားခဲ့ဖူးတဲ့ ဆိုင်တွေ၊ သွားခဲ့ဖူးတဲ့ ခရီးဟောင်းတွေကို ပြန်တမ်းတရင်း အလွမ်းဖြေကြ။ 
                                                                                                                                                   ၂။
ကျန်းမာရေးနဲ့ အားကစားဝန်ကြီးဌာနရဲ့ နေ့စဉ်ထုတ်ပြန်ချက်တွေကို လက်တွေမကြာခဏဆေးရင်း အိမ်တွင်းအောင်းရင်း ရင်တထိတ်ထိတ်နဲ့ စောင့်ကြည့်နေခဲ့ကြရတာပေါ့။ ‘ဟေး ဒီနေ့ ဇီးရိုးတဲ့’။ ‘အိုး ဒီနေ့လည်း မတွေ့တဲ့’။ ‘အရင်ထက် ပိုက်စိပ်တိုက်ပြီးစစ်နိုင်နေပြီ။ ထပ်ကိုမတွေ့ တော့တာ’။ ‘ဒီတစ်ခါတွေ့တယ်ဆိုတဲ့တစ်ယောက်က အရင်ရောဂါရှိသူရဲ့ အဆက်ဆိုပဲ’။ ‘သြော် Case ဘယ်လောက်ကတော့ အသက်လည်းကြီးပြီ။ ရောဂါအခံလည်းရှိလို့ ဆုံးတာပါ’
ဆိုခဲ့သလို အသံတွေနဲ့ အိမ်အပြင်ကို တဖြည်းဖြည်းပြန်ရောက်လာကြ။ မျက်နှာဖုံးလေးတွေလည်း နှာခေါင်းအထိမရောက်တော့ဘဲ မေးစေ့မှာတင် ခရီးဆုံးကြတာပေါ့။ နောက်တော့ ရပ်ကွက်အဝင်အထွက်တွေ ပြန်ပွင့်၊ Mask ပါလား၊ ပါတယ်လေ၊ ကားထဲမှာ၊ အိတ်ထဲမှာ၊ ဒီလိုနဲ့ပေါ့။ လုပ်ငန်းခွင်တွေ စစ်ဆေးခံရမယ်။ ဘယ်အချက်တွေပြင်ထား။ ‘ငါတို့ဆီ အစစ်ခံပြီးပြီ။ အေးအေးဆေးဆေးပဲ’။ ‘ဒီနေ့ ငါတို့ဆိုင် အစစ်ခံရမယ်။ ဘာတွေပြင်ထား’။ ပါဆယ်ရောင်းသည်ဆိုတဲ့ ဗီနိုင်းဆိုင်းဘုတ်တွေ ခေါက်သိမ်းပြီး ဆိုင်ဖွင့်ပြီဆိုတဲ့ဗီနိုင်းတွေ အပြိုင်အဆိုင်နေရာယူလာကြ။ ဟုတ် တာပေါ့။ ဘဝရပ်တည်ရေးအတွက် အလုပ်တွေလုပ်ကြဖို့၊ အလုပ်တွေလုပ်နိုင်ဖို့ စိတ်လက်အနားရအောင် အပန်းဖြေကြဖို့ လိုကိုလိုတာကိုး။ အလုပ် သွားကြ၊ မိတ်ဆွေတွေနဲ့ ချိန်းကြ၊ စားကြ၊ သောက်ကြ၊ ထိုင်ကြ၊ သွားကြ။  ကိုရိုနာဆိုတဲ့ ဗိုင်းရပ်စ်ဟာ မြန်မာ့မြေမှ အပြီးတိုင် သူ့အလိုလို ဆုတ်ခွာသွားလေသယောင် ကျွန်တော်တို့တစ်တွေ အထင်တွေရောက်ခဲ့ကြတာပေါ့။
                                                                                                                                                    ၃။
‘ဟေ့ ရခိုင်ဘက်က သတင်းကြားပြီးပြီလား’
ဒီမေးခွန်းနဲ့အတူ ဆိုရှယ်မီဒီယာပေါ်မှာ ရခိုင်ဒေသရဲ့သတင်းတွေ၊ သက်ဆိုင်ရာဌာနတွေရဲ့ ထုတ်ပြန်ချက်တွေ၊ တစ်ဦးတစ်ယောက်ချင်းစီရဲ့ ဝေဖန်အကြံပြုချက်တွေ ပလူပျံလာရင်းက ကြိုးစားမေ့ကြိုးစားဖျောက်ထားတဲ့ အကြောက်တရားဟာ လှုပ်ရှားနေတဲ့လူထုကို ပြန်တန့်သွားစေခဲ့ပြန်တယ်။
‘နယ်တွေမှာ ပိုများပါတယ်’ ဆိုပြီး မြို့ကြီးတချို့က အားတင်းကြ။ မြို့တွေရဲ့ အထင်ကရထွက်ကုန်တွေနဲ့ ခေါင်းစဉ်ပေးပြီး ဘယ်မြို့တော့ ပါသွားပြီဆိုတဲ့ ပိုးတွေ့လူနာစာရင်းတွေကို ဖတ်ရင်းကြားရင်း အကြောက်တရားဟာ အရောင်နက်သည်ထက်နက်လာတော့တယ်။ နီးနီးကပ်ကပ် နေရာက ခပ်ခွာခွာပြန်နေဖို့၊ လှမ်းလက်စခြေလှမ်းတွေ တန့်ဖို့၊ Mask တွေ ပြန်တပ်ဖို့ ခေါင်းလောင်းထိုးသံတွေ ဆူလာတယ်။ အဖြူ အစိမ်းပြန်ဝတ်ခွင့်ရကာစ အတန်းကြီးကျောင်းသားတွေ၊ ပြင်ပသင်ကြားရေးတွေလည်း သတိကြီးကြီးဖြတ်သန်းကြရင်း မဖွင့်ဖြစ်သေးတဲ့ အတန်းငယ်တွေကို နောက်ဆုတ်ပြီးရင်း ထပ်ဆုတ်ရပြန်တယ်။ ပထမအကြိမ်တုန်းကထက် ပိုးတွေ့လူနာများလာ၊ စိပ်လာပေမယ့် လမ်းတွေပေါ်မှာ ဈေးဝယ်စင်တာတွေ၊ ဆိုင်တွေမှာ လူဦးရေထူထပ်နေဆဲ။ တစ်ယောက်နဲ့တစ်ယောက် ခပ်ခွာခွာကနေ ကြောက်စရာကောင်းကြောင်းတွေ ရှေးဖြစ်နှောင်းဟောင်းတွေဆိုနေကြဆဲ။ လမ်းပေါ်မှာ ကားတွေထင်တာလောက် ချောင်မသွားကြောင်း လမ်းပေါ်ကလူတွေချင်း ပြောမိဆိုမိကြလေရဲ့။
အခုတော့ ကျောင်းတွေလည်း ပိတ်သွားပြန်ပြီ၊ ဆိုင်တွေလည်း ပိတ်သွားပြန်ပြီ၊ ရပ်ကွက်အဝင်အထွက်တွေ၊ အိမ်ရာဂိတ်တံခါးတွေလည်း ပိတ်သွားပြန်ပြီ။ ကိုယ့်မြို့ ကိုယ့်ရွာဘေးကင်းအောင် စောင့်ရှောက်ကြသူတွေ၊ ကိုယ်နဲ့ ကိုယ့်မိသားစုအတွက် အိမ်တွင်းအောင်းကြသူတွေနဲ့ ကပ်ဆိုး ရဲ့သရုပ်ဟာ ပီပြင်လာခဲ့ပြန်ပြီလေ။
                                                                                                                                                    ၄။
မနက်ဖြန်တွေဟာ မသေချာဘူးတဲ့လား။ ဒီနေ့မှာ မဖျားမနာအောင် ကျွန်တော်တို့တစ်တွေ ကြိုးစားနေရတာ။ အသိရှိဖို့လည်းလိုမယ်။ သတိရှိဖို့လည်း လိုမယ်။ သတ္တိရှိဖို့လည်းလိုမယ်ထင်ရဲ့။ ကျန်းမာရေးဆိုင်ရာ မှန်ကန်တဲ့ ဆောင်ရန် ရှောင်ရန်တွေကို နည်းမှန်လမ်းမှန် သိထားဖို့ လိုအပ်ပါလိမ့်မယ်။ လှုပ်ရှားသွားလာမှုတိုင်း၊ ထိတွေ့မှုတိုင်းအတွက် သတိရှိရှိနဲ့ ကျင့်ကြံတတ်ဖို့ လိုပါလိမ့်မယ်။ စိုးရိမ်မှုလွန်ကဲပြီး အကြောက်တရား ပိုလာတဲ့အခါမှာလည်း မှန်ကန်တဲ့အသိ၊ ကျင့်ကြံသင့်တဲ့ သတိကို ပျက်ယွင်းစေတတ်ပါတယ်။
မလွဲမသွေ လက်ခံရင်ဆိုင်နေရတဲ့ ကပ်ဆိုးကာလကို ကိုယ်တစ်ယောက်တည်းအတွက် ကံဆိုးနေခြင်းအဖြစ် မတွေးလိုက်ပါနဲ့။ လူ့သဘာဝအရ မနက်ဖြန်တိုင်းကို ပိုကောင်းချင်တဲ့စိတ် ရှိတတ်ပါတယ်။ အရင်က ကိုယ်မကျေမနပ်ဖြစ်ခဲ့တဲ့ ကိုယ့်ရဲ့အတိတ်နေ့ရက်တွေကို ဒီနေ့မှာတော့ ပြန်လွမ်းကောင်း လွမ်းနေနိုင်ပါတယ်။ အရင်က မကောင်းခဲ့ဘူးလို့သတ်မှတ်တဲ့ ဝင်ငွေပမာဏကို ဒီနေ့အတွက်တော့ အဆင်ပြေပါတယ်လို့ လက်ခံကောင်းလက်ခံရပါလိမ့်မယ်။
ဘာပဲဖြစ်ဖြစ် ကျွန်တော်တို့ ဆက်လက်ရှင်သန်ဖို့ ရင်ဆိုင်ရဦးမှာပေါ့။ အသိ၊ သတိနဲ့ ထိန်းသိမ်းသလို၊ အဆိုးဆုံးအခြေအနေတစ်ခုအတွက်လည်း သတ္တိမွေးကြရပေဦးလိမ့်မယ်။ ကိုယ်တိုင်များမလိုချင်တဲ့ အဖြေတစ်ခုကို ရခဲ့ပြီဆိုရင်လည်း ကိုယ်ထိတွေ့ခဲ့သမျှ၊ ကိုယ်ကြုံတွေ့ခဲ့သမျှ ဖြောင့်ဖြောင့်မှန်မှန်နဲ့ ကိုယ့်အတွက် မနက်ဖြန်၊ မိသားစုအတွက် မနက်ဖြန်၊ ပတ်ဝန်းကျင်အတွက် မနက်ဖြန်၊ ကိုယ့်မြို့၊ ကိုယ့်ရွာအတွက် မနက်ဖြန်၊ ကိုယ့်နိုင်ငံအတွက် မနက်ဖြန်၊ ကမ္ဘာမြေရဲ့ မနက်ဖြန်တိုင်းကို ကယ်တင်ဖို့ရာအတွက် သတ္တိရှိရှိပါဝင်ဖြစ်ကြဖို့လိုပါတယ်။
Z မောင် 

Source : The Voice