fbpx

ဗဟိုစည်ဆေးရုံဝန်ထမ်း ၃၁ ဦးနှင့် ဗဟိုစည်ဟိုတယ်က ၁ ဦး ကိုဗစ်-၁၉ ပိုးတွေ့ရှိ

ရန်ကုန် လမ်းမတော်မြို့နယ်ရှိ ဗဟိုစည်အထူးကုဆေးရုံကဝန်ထမ်း ၃၁ဦးနဲ့ ဗဟိုစည် ဟိုတယ်က ၁ ဦးမှာ ကိုဗစ်-၁၉ ရောဂါတွေ့ရှိကြောင်း လမ်းမတော်မြို့နယ်ကျန်းမာရေးဌာနက ဒီဗွီဘီကို ပြောပါတယ်။

သူတို့ကို လွန်ခဲ့တဲ့ ၆ ရက်လောက်က အသွားအလာကန့်သတ်ထားရာကနေ ဓာတ်ခွဲနမူနာယူ စစ်ဆေးရာက ရောဂါပိုးတွေ့ခဲ့တာလို့ ပြောပါတယ်။

လမ်းမတော်မြို့နယ် ဗဟိုစည်အထူးကုဆေးရုံက သူနာပြုအကူတစ်ဦးနဲ့ ဝန်ထမ်း ၂ ဦးမှာ စက်တင်ဘာ ၁၀ ရက်က ရောဂါပိုးတွေ့ရှိပြီးနောက် ဆေးရုံဝန်ထမ်းတွေမှာ ရောဂါပိုးထပ်ပြီး ကူးစက်ခံရတာဖြစ်ပါတယ်။

ပိုးတွေ့အမျိုးသား ၃ ဦးကတော့ ဗဟိုစည်အထူးကုဆေးရုံမှာ အချိန်ပိုင်းဝန်ထမ်းတွေဖြစ်တဲ့ သူနာပြုအကူ ၁ ဦး၊ လျှပ်စစ်ဝန်ထမ်း၊ အဲယားကွန်းပြင်ဝန်ထမ်းတို့ဖြစ်ကြပြီး သူတို့ ၃ ဦးဟာ နေမကောင်းလို့ အင်းစိန်ဆေးရုံ၊ သင်္ဃန်ကျွန်းဆေးရုံနဲ့ ရန်ကုန်ဆေးရုံကြီးကို သွားရောက်ပြသ  စစ်ဆေးရာက ရောဂါတွေ့ခဲ့ရတာဖြစ်ကြောင်း၊ ဆေးရုံထဲမှာတွေ့တာ မဟုတ်ကြောင်း လမ်းမတော်မြို့နယ် ကျန်းမာရေးဌာနတာဝန်ရှိသူက ဆိုပါတယ်။

အခုထပ်တိုးလူနာတွေနဲ့ပတ်သက်ပြီး ကျန်းမာရေးဆိုင်ရာကိစ္စတွေ ဆက်လက်ဆောင်ရွက် နေကြောင်း သိရပါတယ်။

ဗဟိုစည်အထူးကုဆေးရုံကိုတော့ ပိုးစတွေ့ခဲ့တဲ့ စက်တင်ဘာလ ၁၀ ရက်နေ့ကတည်းက  Lockdown ချထားပြီးဖြစ်ပါတယ်။

Source : DVB