ထိုင်ဝမ်ကို လက်နက်ထပ်ရောင်းပါက အမေရိကန်ကို လိုအပ်သလို တုံ့ပြန်မည်ဟု တရုတ်သတိပေး

တရုတ်က သူပိုင်တဲ့ သင်းကွဲပြည်နယ်လို့ သတ်မှတ်ထားတဲ့ ထိုင်ဝမ်ကို အမေရိကန်က လက်နက် ထပ်ရောင်းခဲ့ရင် တရားဝင် လိုအပ်သလို တုံ့ပြန်မယ်လို့ တရုတ် နိုင်ငံခြားရေးဝန်ကြီးဌာနက အောက်တိုဘာ ၁၃ ရက်မှာ ပြောလိုက်ပါတယ်။

အိမ်ဖြူတော်က ထိုင်ဝမ်ဆီကို အဆင့်မြင့်လက်နက်ရောင်းချမှု ၃ ရပ်အတွက် ဆက်တိုး လုပ်ဆောင်နေတယ်လို့ သတင်းရင်းမြစ်တွေက ပြောအပြီးမှာ တရုတ်က ခုလို တုံ့ပြန်လိုက်တာပါ။

အမေရိကန်ဟာ ထိုင်ဝမ်ဆီ လက်နက်ရောင်းချမှု အားလုံးကို ရပ်တန့်သင့်တယ်လို့ တရုတ် နိုင်ငံခြားရေး ဝန်ကြီးဌာန ပြောခွင့်ရ ကျောက်လီကျန်းက ပေကျင်းမြို့တော်က နေ့စဉ် သတင်းစာ ရှင်းလင်းပွဲမှာ ပြောပါတယ်။

တရုတ်က လက်စားချေမယ်လို့ ပြောနေပေမယ့် အိမ်ဖြူတော်ဟာ ထိုင်ဝမ်ဆီ အဆင့်မြင့် လက်နက်ရောင်းချမှု ၃ ရပ်ကို ရှေ့တိုးလုပ်ဆောင်မယ် ဒီအရေးကို ခုတလောမှာတင် အောက်လွှတ်တော်မှာ တင်ပြပြီး အတည်ပြုချက် ရယူမယ်လို့ သတင်းရင်းမြစ် ၅ ခုက အောက်တိုဘာ ၁၂ ရက်မှာ ပြောပါတယ်။

အမေရိကန်သမ္မတ ရွေးကောက်ပွဲကျင်းပမယ့် နိုဝင်ဘာ ၃ ရက်မတိုင်ခင် ခုအကွက်ရွှေ့မှုဟာ တရုတ်ကို ဒေါသထွက်စေတာပါ။

တရုတ်ဟာ ထိုင်ဝမ်ကို သင်းကွဲပြည်နယ်အဖြစ် သတ်မှတ်ထားပြီး လိုအပ်ရင် စစ်ရေးအရ အင်အားသုံးပြီး တရုတ်ပြည်မကြီးလက်အောက်ကို ပြန်သွင်းမယ်လို့လည်း ကတိပြုထားပါတယ်။

Source : DVB