၁၄ ဘီးယာဉ်အထက် မော်တော်ယာဉ်များကို ရန်ကုန်-မန္တလေးလမ်းဟောင်းမှ သွားလာခွင့်ပြုမည်

ရန်ကုန်၊ နိုဝင်ဘာ ၁၆
၁၄ ဘီးယာဉ်အထက် မော်တော်ယာဉ်များ ရန်ကုန်-မန္တလေးအမြန်လမ်းမှ သွားလာခြင်းကို နိုဝင်ဘာလ ၃၀ ရက်နေ့ ည ၁၂ နာရီမှ စတင်ရပ်ဆိုင်း၍ ရန်ကုန်-မန္တလေးလမ်းဟောင်းမှ သွားလာခွင့်ပြုမည်ဖြစ်ကြောင်း ရန်ကုန်တိုင်းဒေသကြီးအစိုးရအဖွဲ့ထံမှ သိရသည်။ 
COVID-19 ရောဂါဖြစ်ပွားနေသည့် အချိန်ကာလအတွင်း ရန်ကုန်-မန္တလေးလမ်းဟောင်းကိုအသုံးပြု၍ သွားလာရာတွင် ကြန့်ကြာမှုများ ကြုံတွေ့ခဲ့ရသည့်အတွက် ကုန်တင်ယာဉ်များကို ရန်ကုန်-မန္တလေး အမြန်လမ်းမပေါ်မှ ယာယီအစီအစဉ်ဖြင့် သွားလာခြင်းကို အောက်တိုဘာလနှင့် နိုဝင်ဘာလ ၂ လအထိ ခွင့်ပြုထားခြင်းဖြစ်သည်။ 
သို့ဖြစ်၍ ရန်ကုန်-မန္တလေးအမြန် လမ်းမပေါ်မှ ကုန်တင်ယာဉ်များ ဖြတ်သန်းသွားလာခွင့်နှင့်စပ်လျဉ်း၍ ဆောင်ရွက်ရမည့် လုပ်ထုံးလုပ်နည်းများသိရှိရန်၊ ရန်ကုန်-မန္တလေးလမ်းဟောင်းပေါ်မှ ကုန်တင်ယာဉ်များ ဖြတ်သန်းသွားလာရာ၌ ထုတ်ပြန်ထားသော ကုန်တင်ယာဉ်များသွားလာမှု စံသတ်မှတ်ချက် (SOP) အတိုင်း လိုက်နာဆောင်ရွက်သွားရန်နှင့် Coronavirus Disease 2019 (COVID-19) ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီက ရန်ကုန်တိုင်းဒေသကြီးအစိုးရအဖွဲ့မှတစ်ဆင့် ညွှန်ကြားလာမှုအား မွေးမြူရေးဆိုင်ရာ ကုန်ပစ္စည်း သယ်ယူပို့ဆောင်သူများက သိရှိလိုက်နာဆောင်ရွက်ရန် ရန်ကုန်တိုင်းဒေသကြီး အစိုးရအဖွဲ့က ထုတ်ပြန်ကြေညာလိုက်ခြင်းဖြစ်သည်။
ကုန်တင်ယာဉ်များ ဖြတ်သန်းသွားလာခွင့်နှင့်စပ်လျဉ်း၍ ဆောင်ရွက်သွားမည့် လုပ်ထုံးလုပ်နည်းများထဲတွင် နိုဝင်ဘာလ ၃၀ ရက်နေ့ ည ၁၂ နာရီမှစ၍ ၁၄ ဘီးအထက်ယာဉ်များ (တွဲကားများအပါအဝင်) အားလုံးကို ဖြတ်သန်းသွားလာခွင့်မပြုကြောင်း၊ ရန်ကုန်-မန္တလေးအမြန်လမ်းပေါ်တွင် သီးခြားခွင့်ပြုထားသည့် ယာဉ်များအနက် ၁၄ ဘီးအထိယာဉ်များကိုသာ ဖြတ်သန်းခွင့်ပြုမည်ဖြစ်ကာ ဝင်ရိုးအရေအတွက်အလိုက် လမ်းဦးစီးဌာနက သတ်မှတ်တန်ချိန်ထက် ပိုမိုတင်ဆောင်ခြင်းမပြုရန်နှင့် ကုန်တင်ယာဉ်များအားလုံးသည် လမ်း၏လက်ယာဘက်ယာဉ်ကြောမှသာ မောင်းနှင်ရမည်ဖြစ် ကြောင်း ကြေညာချက်တွင်ပါရှိသည်။
ထို့ပြင် သတ်မှတ်ထားသည့်အမြန်နှုန်းဖြစ်သည့် 60km/hr ထက်ပို၍ မောင်းနှင်ခွင့်မပြုကြောင်း၊ သတ်မှတ်ရပ်နားရန်ခွင့်ပြုထားသည့် နေရာမှလွဲ၍ လမ်းဘေးတွင် စစ်ဆေးတွေ့ရှိပါက နောက်တစ်ကြိမ် ဖြတ်သန်းခွင့်ပြုမည်မဟုတ်ကြောင်း၊ ၁၄ ဘီးအထက်ရှိသည့် ကားများမဖြစ်မနေဖြတ်သန်းရန်လိုအပ်လာပါက အကျိုးအကြောင်းကို ဆောက်လုပ်ရေးဝန်ကြီးဌာနသို့ တင်ပြ၍ ခွင့်ပြုချက်ရရှိမှသာ ဖြတ်သန်းခွင့်ပြုမည်ဖြစ်ကြောင်း သိရသည်။
S-07

Source : The Voice