အာနိသင်မပြည့်ဝသည့် COVID-19 ကာကွယ်ဆေးများ တရားမဝင် လမ်းကြောင်းများမှ ဝင်ရောက်လာနိုင်၍ FDA က ကြီးကြပ်စစ်ဆေးမှုနှင့် ပြည်သူများထံ အသိပညာပေးမှုများ လုပ်ဆောင်မည်

COVID-19 ပိုးတွေ့လူနာ အများဆုံးရှိနေသော ရန်ကုန်မြို့တွင်း တစ်နေရာတွင် နှာခေါင်းစည်း တပ်ဆင်၍ သွားလာနေသူများကို တွေ့ရစဉ် (ဓာတ်ပုံ-ကြည်နိုင်)

အာနိသင်မပြည့်ဝသည့် COVID-19 ကာကွယ်ဆေးများ တရားမဝင် လမ်းကြောင်းများမှ ဝင်ရောက်လာနိုင်၍ FDA က ကြီးကြပ်စစ်ဆေးမှုနှင့် ပြည်သူများထံ အသိပညာပေးမှုများ လုပ်ဆောင်မည် ဖြစ်ကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။

COVID-19 ဖြစ်ပွားနေစဉ် ကာလအတွင်း၌ COVID-19 ဆိုင်ရာ ဆေးဝါးနှင့် ဆေးပစ္စည်းများ၊ ဓာတ်ခွဲပစ္စည်းများနှင့် ရောဂါကာကွယ်ရေး အသုံးအဆောင်များ စသည်တို့ကို လျင်မြန်လွယ်ကူစွာ ဝယ်ယူနိုင်ရေးအတွက် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စီမံကိန်း ဘဏ္ဍာရေးနှင့် စက်မှုဝန်ကြီးဌာန၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနနှင့် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာနတို့၏ ပံ့ပိုးမှုများဖြင့် ဆောင်ရွက်လျက်ရှိပြီး COVID-19 ကာကွယ်ဆေး ပေါ်ပေါက်လာပြီးနောက် ဝယ်ယူရာတွင်လည်း ယင်းဝန်ကြီးဌာနများ၏ ပံ့ပိုးကူညီမှုဖြင့် ဆောင်ရွက်သွားမည် ဖြစ်ကြောင်း ကျန်းမာရေးနှင့်အားကစားဝန်ကြီးဌာနမှ သိရသည်။

လက်ရှိအထိ ကမ္ဘာ့ကျန်းမာရေးအဖွဲ့က အသိအမှတ်ပြုထောက်ခံသော COVID-19 ကာကွယ်ဆေး မရှိသေး၍ အွန်လိုင်းဈေးကွက်တွင် ကြေညာနေသော  ကာကွယ်ဆေးများကို ဝယ်ယူသုံးစွဲခြင်း မပြုရန် ကျန်းမာရေးနှင့် အားကစားဝန်ကြီးဌာနက ပြည်သူများသို့ အသိပေးချက် ထုတ်ပြန်ကြေညာခဲ့သည်။

ကာကွယ်ဆေးအသစ် တစ်မျိုးမျိုးကို စတင်အသုံးပြုနိုင်ရန်အတွက် ကာကွယ်ဆေး၏ သက်ဆိုင်ရာ ရောဂါကို ကာကွယ်နိုင်သော အာနိသင်ရှိ မရှိ ၊ လုံလောက်သော ပဋိပစ္စည်းထုတ်လုပ်နိုင်ရန် လှုံ့ဆော်ပေးနိုင်စွမ်း ရှိမရှိ၊ ဘေးထွက်ဆိုးကျိုး မရှိဘဲ ဘေးအန္တရာယ်ကင်း၍ လုံခြုံစိတ်ချရမှုရှိမရှိ၊ ကာကွယ်ဆေးထိုးပြီးနောက် ကာကွယ်မှုပေးနိုင်သည့် အချိန်ကာလ၊ ထိုးနှံတိုက်ကျွေးရမည့် ကာကွယ်ဆေးပမာဏနှင့် အကြိမ်အရေအတွက်၊ ဓာတ်ခွဲခန်းတွင်သာမက လက်တွေ့ အပြင်လောက၌ အသုံးပြုရာတွင်လည်း ထိရောက်စွာ ကာကွယ်နိုင်သည့် အစွမ်းအာနိသင်ရှိ မရှိ စသည်တို့ကို သိရှိနိုင်ရန်နှင့် ပြီးပြည့်စုံရန်အတွက် ပထမဦးစွာ ဓာတ်ခွဲခန်းအတွင်းနှင့် တိရစ်ဆာန်များတွင် စမ်းသပ်ခြင်း အဆင့်များ၊ ထို့နောက် လူများတွင် စနစ်တကျ လက်တွေ့စမ်းသပ် သုတေသန ပြုလုပ်သည့်အဆင့် (၃)ဆင့် (3 Phase of Clinical Trial) နှင့် အသိအမှတ်ပြု လိုင်စင်ရရှိပြီး ဈေးကွက်တွင် ရောင်းချပြီးနောက်တွင်လည်း ဆက်လက်စောင့်ကြပ်ကြည့်ရှု လေ့လာခြင်းများကို တစ်ဆင့်ပြီးတစ်ဆင့် အချိန်ယူကာ စနစ်တကျ ဆောင်ရွက်ရကြောင်း သိရသည်။

ယခုဖြစ်ပွားလျက်ရှိသော COVID-19 ကပ်ရောဂါအတွက် ကာကွယ်ဆေး ထုတ်လုပ်နိုင်ရန် ကမ္ဘာ့နိုင်ငံ အနှံ့အပြားတွင် ကြိုးစားဆောင်ရွက်လျက်ရှိကြောင်း၊ သို့ရာတွင် ယခုအချိန်အထိ မည်သည့်နိုင်ငံ၊ မည်သည့်ဆေးကုမ္ပဏီမှ ထုတ်လုပ်သော ကာကွယ်ဆေး တစ်မျိုးမျိုးတွင်မျှ တတိယအဆင့် လက်တွေ့စမ်းသပ် သုတေသနပြုမှု (Phase 3 Clinical Trial) ကို ပြီးမြောက်ခြင်း မရှိသေးကြောင်း နှင့် ယခုအချိန်အထိ ကမ္ဘာ့ကျန်းမာရေးအဖွဲ့မှ အသိအမှတ်ပြု ထောက်ခံသော COVID-19 ကာကွယ်ဆေး WHO Prequalified Vaccine မရှိသေးကြောင်း သိရသည်။

သို့ဖြစ်၍ ပြည်သူများအနေဖြင့် လူမှုကွန်ရက်များ၊ အင်တာနက်စာမျက်နှာများ နှင့် အွန်လိုင်းဈေးကွက်များတွင် ကြေညာနေသော COVID-19 ကာကွယ်ဆေးများကို ဝယ်ယူသုံးစွဲခြင်းမပြုရန် အသိပေးအပ်ကြောင်း ကျန်းမာရေးနှင့်အားကစားဝန်ကြီးဌာနက အသိပေးချက် ထုတ်ပြန်ထားသည်။

ကျန်းမာရေးနှင့်အားကစားဝန်ကြီးဌာန အနေဖြင့် ယခုအချိန်အထိ COVID-19 ရောဂါ ကာကွယ်ထိန်းချုပ်ကုသရေး လုပ်ငန်းများအတွက် လိုအပ်သော ဆေးနှင့် ဆေးပစ္စည်းများ ဝယ်ယူရာတွင် ပြည်သူ့ကျန်းမာရေးဦးစီးဌာန၊ ကုသရေးဦးစီးဌာန အရေးပေါ်ရန်ပုံငွေ၊ ADB-GMS Health Security ၊ COVID-19 Economic Relief Plan (CERP) မှ မြန်မာကျပ်ငွေ စုစုပေါင်း သန်းပေါင်း ၃၆၀၀၀ ကျော် အသုံးပြု၍ ဝယ်ယူလျက်ရှိပြီး COVID-19 ရောဂါ ကုသရေးနှင့်ဆိုင်သော ဆေးပစ္စည်းများ အသုတ်လိုက် ရောက်ရှိလျက်ရှိကြောင်း နှင့် World Bank နှင့် ADB ချေးငွေ အမေရိကန်ဒေါ်လာ သန်း ၉၀ ကျော်ဖြင့် ဆေးရုံများ အဆင့်မြှင့်တင်ခြင်း၊ အထူးကြပ်မတ်ကုသခန်းများ တိုးချဲ့ဖြည့်ဆည်းခြင်း၊ ဆေးရုံများ၌ လိုအပ်သော ဆေးနှင့် စက်ပစ္စည်းကိရိယာများ ဖြည့်ဆည်းခြင်းလုပ်ငန်းများ ဆောင်ရွက်လျက်ရှိကြောင်း သိရသည်။ 

Source : Eleven Media Group