ဖျာပုံမြို့နယ်၊ ခါးပြတ်ကျေးရွာတွင်  လူနေအိမ် ၆ လုံး မီးလောင်ဆုံးရှုံး 

ဧရာဝတီတိုင်း၊ ဖျာပုံမြို့နယ်၊ အမာမြို့၊ ဒေါ်ညိမ်းကျေးရွာအုပ်စု၊ ခါးပြတ်ကျေးရွာမှာ နိုဝင်ဘာ ၂၀ ရက် မနက် ၁ နာရီ ကျော်လောက်က  လူနေအိမ် ၆ လုံး မီးလောင်မှု ဖြစ်ပွားခဲ့တယ်လို့ ဖျာပုံခရိုင် မီးသတ်ဦးစီးဌာနက သိရပါတယ်။

ဒီမနက်  ၁ နာရီ ကျော်လောက်မှာ  ခါးပြတ်ကျေးရွာနေ ဦးလင်းလင်း (ခ)ဦးအောင်ထွန်းရဲ့ ဓနိမိုး၊ ဓနိကာ၊ ဝါးကြမ်းခင်း နေအိမ်မှာ မီးကြွင်း၊ မီးကျန်ကနေ စတင်မီးလောင်ကျွမ်းခဲ့တာ ဖြစ်ပါတယ်။ 

မီးလောင်မှုကို နယ်မြေခံ ရဲတပ်ဖွဲ့၊ မီးသတ်တပ်ဖွဲ့နဲ့ ရွာသူရွာသား  အင်အား ၁၅၀ လောက်နဲ့ ဝိုင်းဝန်းမီးငြှိမ်းသတ်ခဲ့ရာ  မနက် ၁ နာရီ မိနစ် ၅၀ လောက်မှာ မီးငြိမ်းသွားပါတယ်။

မီးလောင်မှုကြောင့် လူတွေနဲ့ တိရစ်ဆာန်တွေ ထိခိုက်သေဆုံးမှုမရှိဘဲ လူနေအိမ် ၆ လုံး မီးထဲပါသွားလို့   မီးဘေးသင့် မိသားစုတွေ  ရွှေထီးကျေးရွာ အ.ထ.က မှာ ယာယီခိုလှုံနေကြရပါတယ်။

အဆိုပါမီးလောင်မှုဖြစ်စဉ်နဲ့ ပတ်သက်ပြီး ခါးပြတ်ကျေးရွာနေ ဦးလင်းလင်း (ခ)ဦးအောင်ထွန်းကို ဒေါ်ညိမ်းနယ်မြေရဲစခန်း အမှုစစ်ရဲအုပ် အေးမင်းထွန်းက ရာဇသတ်ကြီးပုဒ်မ ၂၈၅ နဲ့ အမှုဖွင့် စစ်ဆေးနေပါတယ်။

ကျော်စိုးမိုး

 

Source : DVB