Eleven Media Group

အာဆင်နယ်အတွက် ပထမဆုံးပရီးမီးယားလိဂ်ဂိုးသွင်းယူနိုင်သည့် နွမ်နယ်ရီ ပရီးမီးယားလိဂ်၏ အသက်အငယ်ဆုံး ဂိုးသွင်းသူ(၁၀)ဦးစာရင်းတွင် ပါဝင်လာ

Photos: The Guardian & X

နော်တင်ဟမ်ဖောရက်စ်နှင့်ပွဲ၌ အာဆင်နယ်အသင်းအတွက် တတိယဂိုးသွင်းယူပေးခဲ့သည့် ဆယ်ကျော်သက်ကစားသမား နွမ်နယ်ရီသည် ပရီးမီးယားလိဂ်၏ အသက်အငယ်ဆုံး ဂိုးသွင်းသူ(၁၀)ဦးစာရင်းတွင် ပါဝင်လာခဲ့ကြောင်း သိရသည်။

အင်္ဂလန်ယူ-၁၉ လက်ရွေးစင် ကွင်းလယ်တိုက်စစ်ကစားသမား နွမ်နယ်ရီသည် ယင်းပွဲတွင် (၈၂)မိနစ်၌ အော်ဒီဂွါ၏နေရာ လူစားဝင်ကစားခဲ့ခြင်းဖြစ်ပြီး (၈၆)မိနစ်တွင် ဂိုးသွင်းယူနိုင်ခဲ့ခြင်းဖြစ်သည်။ ၎င်းသည် ယင်းနေ့တွင် အသက်(၁၇ နှစ်၊ ၂၄၇ ရက်)သာ ရှိသေးသည့်အတွက် ပရီးမီးယားလိဂ်တွင် ဂိုးသွင်းယူနိုင်သည့် အသက်အငယ်ဆုံးကစားသမား(၁၀)ဦးစာရင်းထဲ ပါဝင်ခဲ့ခြင်းဖြစ်ပြီး နဝမနေရာတွင် ရပ်တည်နိုင်ခဲ့သည်။

ပရီးမီးယားလိဂ်တွင် အသက်အငယ်ဆုံးဂိုးသွင်းယူအဖြစ် စံချိန်တင်ထားသူမှာ ၂၀၀၅ ခုနှစ်က (၁၆ နှစ်၊ ၂၇၀ ရက်)တွင် ဂိုးသွင်းယူနိုင်ခဲ့သော အဲဗာတန်ကစားသမား ဂျိမ်းစ်ဗော်ဂန်ဖြစ်သည်။ ယင်းစာရင်းတွင် အာဆင်နယ်ကစားသမားဟောင်း ဖာဘရီဂတ်စ်ကလည်း စတုတ္ထနေရာ ရပ်တည်နိုင်ခဲ့သည့်အတွက် နွမ်နယ်ရီ သည် ပရီးမီးယားလိဂ်၌ ဂိုးသွင်းယူနိုင်သည့် ဒုတိယအသက်အငယ်ဆုံး အာဆင်နယ်ကစားသမားအဖြစ်လည်း မှတ်တမ်းဝင်ခဲ့ကြောင်း သိရသည်။

နွမ်နယ်ရီသည် အာဆယ်နယ်အသင်း၏ အကယ်ဒမီထွက်ကစားသမားဖြစ်ပြီး တောက်ပလာမည့်ကစားသမားအဖြစ်လည်း ထင်ကြေးပေးခံထားရသည်။ ၎င်းသည် ပရီးမီးယားလိဂ်ယှဉ်ပြိုင်ခွင့်ရသည့် အာဆင်နယ် အသင်း၏ အသက်အငယ်ဆုံးကစားသမားအဖြစ်လည်း စံချိန်တင်ထားသည်။ အာဆင်နယ်အသင်းသည် နွမ်နယ်ရီကို သက်တမ်းရှည်စာချုပ်သစ်ချုပ်ဆိုနိုင်ရန် ကြိုးပမ်းလျက်ရှိသည်။

မူရင်းသတင်း — Eleven Media Group