
အာဆီယံဘောလုံးအဖွဲ့ချုပ်(AFF) သည် မကြာမီကျင်းပတော့မည့် ၂၀၂၄ အာဆီယံဖလားပြိုင်ပွဲတွင် VAR နည်းပညာ ကျင့်သုံးမည်ဖြစ်ကြောင်း တရားဝင် အသိပေးထုတ်ပြန်လိုက်သည်။
အာဆီယံဘောလုံးအဖွဲ့ချုပ်(AFF) ၏ ထုတ်ပြန်မှုတွင် ၂၀၂၄ အာဆီယံဖလားပြိုင်ပွဲ၌ မသေချာသည့်ဖြစ်စဉ်များအတွက် ပရော်ဖက်ရှင်နယ်ပီသစွာဖြင့် VAR နည်းပညာကို တတိယကြားခံနယ်အဖြစ် အသုံးပြုသွားမည်ဖြစ်ကြောင်း ဖော်ပြခဲ့သည်။
ထို့ပြင်၂၀၂၄ အာဆီယံဖလားပြိုင်ပွဲတွင် VAR နည်းပညာ ကျင့်သုံးရာ၌ အုပ်စုအဆင့်ပွဲစဉ်များတွင် ကင်မရာ ၁၀ လုံး၊ ဆီမီးဖိုင်နယ်အဆင့်မှစ၍ ကင်မရာ ၁၂ လုံး သုံးစွဲသွားမည်ဖြစ်ကြောင်း ထုတ်ပြန်ခဲ့သည်။
အာဆီယံဘောလုံးအဖွဲ့ချုပ်(AFF) သည် ယခုနျစ်အတွင်း ကျင်းပပြီးစီးခဲ့သည့် ၂၀၂၄ အာဆီယံ ယူ-၁၆ ချန်ပီယံရှစ်ပြိုင်ပွဲ၊ ၂၀၂၄ အာဆီယံ ယူ-၁၉ ချန်ပီယံရှစ်ပြိုင်ပွဲများတွင်လည်း VAAR နည်းပညာကို အသုံးပြုခဲ့သလို လက်ရှိကျင်းပနေသည့် အာဆီယံကလပ်ချန်ပီယံရှစ်ပြိုင်ပွဲ (ဆိုဖီဖလား) တွင်လည်း VAR နည်းပညာကို အသုံးပြုနေလျက်ရှိကြောင်း သိရသည်။
အာဆီယံဒေသတွင်းတွင် ပြည်တွင်းဘောလုံးပြိုင်ပွဲများ၌ VAR နည်းပညာကို အသုံးပြုနေသည့် နိုင်ငံများမှာ ထိုင်း၊ စင်ကာပူနှင့် ဗီယက်နမ် သုံးနိုင်ငံဖြစ်ကြောင်း သိရသည်။