Eleven Media Group

မိမိတို့လိုအပ်နေသည်မှာ တည်ငြိမ်မှုသာဖြစ်သည်ဟု ပိုစတီကိုဂလူး ပြောကြား

Photo: Spurs Connect

စပါးနည်းပြ ပိုစတီကိုဂလူးက မိမိတို့အသင်းသည် ပြီးခဲ့သည့်နှစ်ကထက် ပိုကောင်းလာသည့်အသင်းဖြစ်ပြီး လိုအပ်နေသည်မှာ တည်ငြိမ်မှုသာဖြစ်သည်ဟု ပြောကြားခဲ့သည်။
စပါးအသင်းသည် ပိုစတီကိုဂလူး စတင်ကိုင်တွယ်သော ပြီးခဲ့သည့်ရာသီတွင် ရလဒ်များကောင်းမွန်ခဲ့သော်လည်း လက်ရှိရာသီတွင် ရှုံးပွဲများပြားနေသည့်အတွက် ပိုစတီကိုဂလူးအနေဖြင့် ရာထူးမှ ထုတ်ပယ်ခံရနိုင်သည်ဟုပင် ထင်ကြေးပေးခံနေရသည်။
သို့သော် မန်စီးတီးနှင့် ဆုံတွေ့သည့်ပွဲတွင် ဂိုးပြတ်အနိုင်ယူခဲ့ပြီးနောက် ပိုစတီကိုဂလူးက ''ကျွန်တော်တို့ ဒီနှစ်မှာ ပြီးခဲ့တဲ့နှစ်ကထက် ပိုကောင်းလာပါတယ်။ ကျွန်တော်တို့ လိုအပ်နေတာက တည်ငြိမ်တဲ့ခြေစွမ်းကို ပြသနိုင်ဖို့ပါပဲ''ဟု ပြောကြားခဲ့သည်။
စပါးအသင်းသည် မန်စီးတီးကို အနိုင်ရခဲ့သည့်အတွက် ရမှတ်(၁၉)မှတ်ဖြင့် အဆင့်(၆)နေရာသို့ တက်လှမ်းနိုင်ခဲ့ပြီး ဒုတိယနေရာမှ မန်စီးတီးနှင့် (၄)မှတ်သာကွာဟတော့ကြောင်းလည်း သိရသည်။

မူရင်းသတင်း — Eleven Media Group