Eleven Media Group

ဘရာဇီးလ်ဘောလုံးအဖွဲ့ချုပ်ဥက္ကဋ္ဌရွေးကောက်ပွဲ ဝင်ရောက်ယှဉ်ပြိုင်မည်ဟု ရော်နယ်လ်ဒို အတည်ပြု

Photo: CBF Futebol

ဘရာဇီးလ်နာမည်ကျော်တိုက်စစ်မှူးဟောင်း ရော်နယ်လ်ဒိုက ဘရာဇီးလ်ဘောလုံးအဖွဲ့ချုပ်(CBF) ဥက္ကဋ္ဌ ရွေးကောက်ပွဲတွင် ဝင်ရောက်ယှဉ်ပြိုင်မည်ဖြစ်ကြောင်း အတည်ပြုကြေညာခဲ့သည်။
ထို့ပြင် ၎င်းက ဘရာဇီးလ်လက်ရွေးစင်အသင်း၏ ဂုဏ်သိက္ခာကို ပြန်လည်ရယူပေးလိုကြောင်း ပြောကြားခဲ့သည်။
ရော်နယ်လ်ဒို (၄၈ နှစ်)အနေဖြင့် လက်ရှိ CBF ဥက္ကဋ္ဌဖြစ်သူ အက်နယ်လ်ဒိုရိုဒရီဂတ်စ်၏နေရာတွင် အစားထိုးရန် ရွေးကောက်ခံကိုယ်စားလှယ်လောင်းအဖြစ် ယှဉ်ပြိုင်မည်ဖြစ်သည်။
CBF ဥက္ကဋ္ဌ ရွေးကောက်ပွဲကို လာမည့်နှစ် မတ်လတွင် ပြုလုပ်မည်ဖြစ်ပြီး လက်ရှိဥက္ကဋ္ဌမှာ ၂၀၂၆ ခုနှစ် မတ်လတွင်မှ သက်တမ်းကုန်ဆုံးမည်ဖြစ်သောကြောင့် ဥက္ကဋ္ဌရာထူး မလွှဲပြောင်းမီ (၁၂)လအလိုကတည်းက ရွေးကောက်ပွဲပြုလုပ်ခြင်းဖြစ်ကြောင်း သိရသည်။
ဘရာဇီးလ်အသင်းသည် ကမ္ဘာ့ဖလားချန်ပီယံဆုကို စံချိန်တင် ငါးကြိမ် ရရှိခဲ့သော်လည်း ၂၀၀၂ ပြိုင်ပွဲပြီးကတည်းက ချန်ပီယံဆုနှင့် ဝေးကွာနေခဲ့သည်။

မူရင်းသတင်း — Eleven Media Group