Eleven Media Group

၂၀၂၄ ခုနှစ်အတွင်း ပွဲကစားရသည့်မိနစ် အများဆုံးအဖြစ် ဘာစီလိုနာ နောက်ခံလူ ခွန်ဒဲ ရပ်တည်နေ

Photo: X

၂၀၂၄ ခုနှစ်အတွင်း ကလပ်အသင်းနှင့် နိုင်ငံလက်ရွေးစင်အသင်းအတွက် ပွဲကစားရသည့်မိနစ် အများဆုံးကစားသမားအဖြစ် ဘာစီလိုနာအသင်း၏ ပြင်သစ်လက်ရွေးစင် နောက်ခံလူ ခွန်ဒဲက ရပ်တည်နေကြောင်း သိရသည်။
ယင်းစစ်တမ်းကို ဆွစ်ဇာလန်နိုင်ငံအခြေစိုက် အားကစားလေ့လာမှုနိုင်ငံတကာစင်တာ ဖြစ်သည့် CIES Football Observatory က ထုတ်ပြန်ခဲ့ခြင်းဖြစ်ပြီး ကမ္ဘာတစ်ဝန်းရှိ လိဂ်ပြိုင်ပွဲ ၆၆ ခုမှ ပွဲကစားရသည့်မိနစ်အများဆုံး ကစားသမား ၂၀ စာရင်းကို ဖော်ပြထားသည်။
ဒီဇင်ဘာ ၁၅ ရက်အထိကောက်ယူထားသည့်စာရင်းအရ ခွန်ဒဲ (၂၆ နှစ်) က ကလပ်နှင့် နိုင်ငံအတွက် စုစုပေါင်း ၆၉ ပွဲတွင် ပွဲကစားချိန် ၅၈၇၂ မိနစ်ဖြင့် အများဆုံးပါဝင်ကစားထားခြင်းဖြစ်သည်။
၎င်း၏နောက်တွင် ဘရာဇီးကလပ် ဖလူမင်နန်ဆီအသင်းမှ ကိုလံဘီယာတောင်ပံကစားသမား အာရီယက်စ်က ၅၅၉၉ မိနစ်၊ ရီးယဲလ်အသင်းမှ ဥရုဂွေးကွင်းလယ်လူ ဗယ်လ်ဗာဒီက ၅၅၇၃ မိနစ်၊ လီဗာပူးလ်အသင်းမှ နယ်သာလန်နောက်ခံလူ ဗန်ဒိုက်က ၅၅၂၃ မိနစ်၊ ဘင်ဖီကာအသင်းမှ အာဂျင်တီးနားနောက်ခံလူ အော်တာမန်ဒီက ၅၄၄၉ မိနစ်ဖြင့် အစဉ်လိုက်ရပ်တည်လျက်ရှိသည်။

မူရင်းသတင်း — Eleven Media Group