Eleven Media Group

■ လာလီဂါချန်ပီယံဆု ရယူလိုသည်ဟု ဂယ်လာဂါ ဆို

အက်သလက်တီကိုကွင်းလယ်ကစားသမား ဂယ်လာဂါက လက်ရှိအသင်းနှင့်အတူ လာလီဂါချန်ပီယံဆု ရရှိလိုသည်ဟု ပြောကြားခဲ့သည်။

အသက် (၂၄) နှစ်အရွယ်ရှိ အင်္ဂလန်ကွင်းလယ်ကစားသမား ဂယ်လာဂါသည် ပြီးခဲ့သည့်နွေရာသီကမှ ချယ်လ်ဆီးအသင်းမှ အက်သလက်တီကိုအသင်းထံသို့ ပေါင် (၃၄) သန်းဝန်းကျင်ဖြင့် ပြောင်းရွှေ့လာခဲ့သူဖြစ်သည်။

အက်သလက်တီကိုအသင်းသည် ယခုရာသီ လာလီဂါပွဲစဉ် (၁၇) အပြီးတွင် ရမှတ် (၃၈) မှတ်ရထားပြီး အမှတ်ပေးဇယားထိပ်ဆုံးမှ ဘာစီလိုနာအသင်းနှင့် ရမှတ်တူနေသော်လည်း ဂိုးကွာခြားချက် လျော့နည်းမှုကြောင့် အဆင့် (၂) နေရာ၌ ရပ်တည်နေသည်။

သို့သော် ဘာစီလိုနာအသင်းသည် တစ်ပွဲကစားထားသောကြောင့် အက်သလက်တီကိုအသင်းအနေဖြင့် ဘာစီလိုနာအသင်းကို ကျော်တက်နိုင်သည့်အခွင့်အရေး ရှိနေသည်။

ထို့ပြင် အက်သလက်တီကိုအသင်းသည် ဒီဇင်ဘာ (၂၁) ရက်(စနေနေ့)တွင် လာလီဂါပွဲစဉ်အဖြစ် ဘာစီလိုနာအသင်းကို အဝေးကွင်း၌ သွားရောက်ရင်ဆိုင်ရမည်ဖြစ်ပြီး ယင်းပွဲမတိုင်မီ ဂယ်လာဂါက လာလီဂါချန်ပီယံဆုကို ရယူလိုကြောင်း ပြောကြားခဲ့ခြင်းဖြစ်သည်။

ထို့ပြင် ဂယ်လာဂါက မိမိအနေဖြင့် စပိန်မြေတွင် မြန်ဆန်စွာအသားကျသွားခဲ့ခြင်းမှာ နည်းပြ ဆီမြွန်နီကြောင့်ဖြစ်သည်ဟုလည်း ပြောကြားခဲ့သည်။

ဂယ်လာဂါသည် ယခုရာသီတွင် အက်သလက်တီကိုအသင်းအတွက် ပြိုင်ပွဲစုံ ပွဲ (၂၀) တွင် (၂) ဂိုး သွင်းယူထားသည်။

မူရင်းသတင်း — Eleven Media Group