
မြန်မာ့လက်ရွေးစင်အသင်း တောင်ပံတိုက်စစ်ကစားသမား မောင်မောင်လွင်သည် ပွဲပယ်ပြစ်ဒဏ်ကြောင့် ဗီယက်နမ်အသင်းနှင့် ယှဉ်ပြိုင်ရမည့် အုပ်စုနောက်ဆုံးပွဲကို လွဲချော်မည်ဖြစ်ကြောင်း သိရသည်။
မောင်မောင်လွင်သည် လာအိုအသင်းအား အနိုင်ရသည့်ပွဲတွင် ဒုတိယမြောက် အဝါကတ်ပြသခံရသဖြင့် (ပြိုင်ပွဲစည်းမျဉ်းအရ အုပ်စုပွဲများတွင် အဝါကတ် နှစ်ကြိမ်ပြသခံရပါက တစ်ပွဲပယ်) ပွဲပယ်ခံရခြင်းဖြစ်သည်။ မောင်မောင်လွင်သည် အင်ဒိုနီးရှားကို အရေးနိမ့်သည့် အုပ်စုပထမပွဲတွင် ပထမအကြိမ် အဝါကတ်ပြသခံထားရသောကြောင့် တစ်ပွဲပယ်ခံရခြင်းဖြစ်သည်။
ဗီယက်နမ်နှင့် အုပ်စုနောက်ဆုံးပွဲမှာ မြန်မာအသင်းအတွက် ဆီမီးဖိုင်နယ်တက်ရောက် ရေး အရေးပါသည့်ပွဲဖြစ်နေပြီး မောင်မောင်လွင် မပါဝင်နိုင်သဖြင့် တိုက်စစ်တွင် ကစားသမား အပြောင်းအလဲ ပြုလုပ်ရမည်ဖြစ်သည်။
မောင်မောင်လွင်သည် ယခုပြိုင်ပွဲတွင် မြန်မာအသင်းအတွက် တစ်ဂိုးသွင်းယူပေးထားပြီး (၃)ပွဲစလုံး ခြေစွမ်းပြကစားနိုင်ခဲ့သည်။