၂၄.၁.၂၀၂၅
Written by KL
ရန်ကုန်တိုင်းဒေသကြီး၊ အလုံမြို့နယ်၊ စောရန်ပိုင်(တောင်)ရပ်ကွက်၊ ငုဝါလမ်းရှိ နေအိမ်တစ်လုံးတွင် ဇန်နဝါရီလ ၂၄ ရက် နံနက် ၁၁နာရီ ၃၉ မိနစ်ခန့်က အောက်ခံမပါဘဲ ခြင်ဆေးထွန်းရာမှ ခြင်ဆေးခွေပေါ် အဝတ်အစား ကျ၍ မီးလောင်မှုဖြစ်ပွားခဲ့ကြောင်း မီးငြှိမ်းသတ်သူများထံမှ သိရသည်။
မီးလောင်မှုမှာ အလျား ၁၀ ပေ ၊အနံ ၁၅ ပေ အိပ်ခန်းတွင် ဖြစ်ပွားခဲ့ပြီး မီးလောင်မှုကြောင့် အိပ်ခန်းနှင့် အိပ်ယာ၊ ဗီဒိုတို့ မီးလောင်ကျွမ်းခဲ့ကြောင်း သိရသည်။
မီးလောင်မှုမှာ ၁၀ မိနစ်ခန့်ကြာမြင့်ခဲ့ပြီး မီးငြှိမ်းသတ်ယာဥ် ၂ စီး၊ ရေသယ်ယာဥ် ၆ စီး၊ သန္ဓေအရန်မီးသတ်တပ်ဖွဲ့ဝင်များဖြင့် ငြှိမ်းသတ်ခဲ့ရသည်။
မီးလောင်မှုနှင့်ပတ်သက်၍ အသက် ၅၂ နှစ် အရွယ် အမျိုးသမီးကြီးကို အလုံမြို့မရဲစခန်းက ရာဇသတ်ကြီးပုဒ်မ ၂၈၅ ဖြင့် အရေးယူထားသည်ဟု သိရသည်။
အလားတူ ရန်ကုန်တိုင်းဒေသကြီး၊ ဒဂုံမြို့သစ် (တောင်ပိုင်း)မြို့နယ်၊ (၅၆)ရပ်ကွက်၊ စုပြည့်ရတနာ (၄)လမ်းနှင့် ကျောက်စိမ်းမြတ်ရတနာလမ်းထောင့်ရှိ ကုန်စုံဆိုင်တွင် ဇန်နဝါရီလ ၂၃ ရက် နံနက် ၆ နာရီခန့်က ရေခဲသေတ္တာတွင် အသုံးပြုသည့် Safe Guard အပူလွန်ကဲရာမှ နေအိမ်၂လုံး မီးလောင်ဆုံးရှုံးခဲ့ကြောင်း သိရသည်။
မီးလောင်မှုမှာ ၂၅ မိနစ်ခန့်ကြာမြင့်ခဲ့ပြီး မီးလောင်မှုကြောင့် အလျား ပေ ၂၀၊ အနံ ပေ ၆၀ ရှိ သွပ်မိုးပျဥ်ကာပျဥ်ခင်း ၁ ထပ်နေအိမ်တစ်လုံး၊ အလျား ပေ ၂၀၊ အနံ ပေ ၂၀ ရှိ သွပ်မိုး၊ ထရံကာ၊ ကွန်ကရစ်ခင်း ကုန်စုံဆိုင်တစ်လုံး မီးလောင်ဆုံးရှုံးခဲ့ကြောင်း သိရသည်။
မီးလောင်မှုကို မီးငြှိမ်းသတ်ယာဥ် ၅ စီး၊ ရေသယ်ယာဥ် ၃ စီး၊ အုပ်ချုပ်မှုယာဥ် ၁ စီးဖြင့် မီးငြှိမ်းသတ်ခဲ့ရာ နံနက် ၆ နာရီ ၂၈ မိနစ်တွင် မီးငြိမ်းခဲ့ကြောင်း သိရသည်။
