အပြည်ပြည်ဆိုင်ရာ အဏုမြူစွမ်းအင်အေဂျင်စီမှ နည်းပညာရှင်များပါဝင်သည့် နျူကလီးယားစွမ်းအင်အစီအစဉ် အကောင်အထည်ဖော်ဆောင်ရေးအလုပ်ရုံဆွေးနွေးပွဲ နေပြည်တော်တွင် ၃ ရက်ကြာကျင်းပနေ

၁၁.၆.၂၀၂၆
Written by Linn Eain 

အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA)မှ နည်းပညာရှင်များနှင့် သိပ္ပံနှင့်နည်းပညာဝန်ကြီးဌာနမှ ပညာရှင်များပါဝင်သည့် နျူကလီးယားစွမ်းအင်အစီအစဉ် အကောင်အထည်ဖော်ဆောင်ရေး အလုပ်ရုံဆွေးနွေးပွဲကို နေပြည်တော်တွင် ဇွန် ၁၀ ရက်က စတင်ကျင်းပခဲ့ကြောင်း သိရသည်။

နျူကလီးယား စွမ်းအင်အကောင်အထည်ဖော်ရေးလုပ်ငန်းအစီအစဉ်ကို အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA)၏ ညွှန်ကြားချက်များနှင့်အညီ အကောင်အထည် ဖော်ဆောင်ရွက်လျက်ရှိရာ နျူကလီးယားစွမ်းအင်အစီအစဉ် အကောင်အထည် ဖော်ဆောင်ရေးအဖွဲ့ (Nuclear Energy Programme Implementing Organization-NEPIO)၏ တာဝန်နှင့် ဝတ္တရားများဆိုင်ရာ အလုပ်ရုံဆွေးနွေးပွဲကို သိပ္ပံနှင့်နည်းပညာဝန်ကြီးဌာန၊ အစည်းအဝေးခန်းမတွင် ပြုလုပ်ခဲ့ပြီး ဇွန် ၁၂ ရက်အထိ ကျင်းပမည်ဖြစ်ကြောင်း သိရသည်။

 အဆိုပါ အလုပ်ရုံဆွေးနွေးပွဲသို့ သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော်၊ ဒုတိယဝန်ကြီး ဒေါက်တာ နေခြည်လဲ့လဲ့သိန်း၊ အပြည်ပြည်ဆိုင်ရာ အဏုမြူ စွမ်းအင်အေဂျင်စီ(IAEA)၏ နည်းပညာရှင်များဖြစ်သည့် Mr. Vsevolod IGIN၊ Mr. Zeki Mehmet BASKURT နှင့် Mr. Muhammad AYUB၊ ဝန်ကြီးဌာနများမှ ပညာရှင်များ တက်ရောက်ခဲ့ကြောင်း သိရသည်။

ထို့နောက် ဆွေးနွေးပွဲတွင် IAEA မှ တာဝန်ရှိသူက နျူကလီးယားစွမ်းအင်ဆိုင်ရာ အမျိုးသားအဆင့် မူဝါဒ ရပ်တည်ချက်တည်ဆောက်ခြင်းနှင့် အလုံးစုံပြည့်စုံသော အစီရင်ခံစာ ပြုစုတင်ပြခြင်း၊ နျူကလီးယား စွမ်းအင်အစီအစဉ် အကောင်အထည်ဖော်ဆောင်ရေးအဖွဲ့၏ တာဝန်ဝတ္တရားများနှင့် လုပ်ဆောင်ချက်များ၊ နျူကလီးယား စွမ်းအင်ဆိုင်ရာ နိုင်ငံတကာ အတွေ့အကြုံများကို ဆွေးနွေးပြောကြားပြီး တက်ရောက်လာကြသူများက သိရှိလိုသည်များကို မေးမြန်းဆွေးနွေးခဲ့ကြကြောင်း သိရသည်။