ရန်ကုန်၊ ဇူလိုင် ၂၁
လျှပ်စစ်နှင့်စွမ်းအင်ဝန်ကြီးဌာနသည် နိုင်ငံအတွင်း လျှပ်စစ်ဓာတ်အား တိုးတက်ရရှိရေး၊ ဓာတ်အားလေလွင့်ဆုံးရှုံးမှု လျှော့ချရေးနှင့် ဓာတ်အားစနစ် တည်ငြိမ်စွာ စဉ်ဆက်မပြတ် ဖြန့်ဖြူးပေးနိုင်ရေးတို့ကို အရှိန်အဟုန်မြှင့် ဆောင်ရွက်လျက်ရှိပြီး ပြည်တွင်း၌ ခေတ်မီ Smart Meter များကို ထုတ်လုပ်လျက်ရှိကြောင်း သိရသည်။
လက်ရှိတွင် ပဲခူးတိုင်းဒေသကြီး အင်းတကော်စက်မှုနယ်မြေရှိ စက်ရုံ၌ ဒစ်ဂျစ်တယ်လျှပ်စစ်မီတာ (Smart Meter) များကို ထုတ်လုပ်လျက်ရှိပြီး၊ လျှပ်စစ်နှင့်စွမ်းအင်ဝန်ကြီး ဦးကိုကိုလွင်က ဇူလိုင် ၂၀ ရက်တွင် အဆိုပါစက်ရုံသို့ သွားရောက်ကြည့်ရှုခဲ့ကြောင်း သိရသည်။
ပြည်ထောင်စုဝန်ကြီးက သုတေသနနှင့် ဖွံ့ဖြိုးတိုးတက်ရေးလုပ်ငန်းများကို အားဖြည့်ဆောင်ရွက်၍ Hardware နှင့် Software များ အဆင့်မြှင့်တင်ရေး၊ သဘာဝဓာတ်ငွေ့မီတာနှင့် ရေမီတာများကိုလည်း ဒစ်ဂျစ်တယ်မီတာစနစ်ဖြင့် ထုတ်လုပ်နိုင်ရေး၊ Electronic နှင့် IT ပညာရှင်များကို စဉ်ဆက်မပြတ် မွေးထုတ်နိုင်ရေးနှင့် နိုင်ငံအတွက် လိုအပ်သည့် ဒစ်ဂျစ်တယ်မီတာများကို အချိန်မီ ထုတ်လုပ်ဖြည့်ဆည်းနိုင်ရေးတို့ကို အလေးထား ဆောင်ရွက်ရန် မှာကြားခဲ့သည်။
ထို့ပြင် ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) ရုံးချုပ်တွင် တာဝန်ရှိသူများနှင့် တွေ့ဆုံစဉ် ဓာတ်အားလေလွင့်ဆုံးရှုံးမှုများ မဖြစ်ပေါ်စေရေးအတွက် နည်းပညာအသုံးပြု၍ စစ်ဆေးကြပ်မတ်သွားမည်ဖြစ်ကြောင်းနှင့် လျှပ်စစ်ဝန်ဆောင်မှုများ ပိုမိုကောင်းမွန်စေရေး၊ Call Center များအနေဖြင့် ပြည်သူများ၏ မေးမြန်းတိုင်ကြားမှုများကို စိတ်ရှည်နားလည်စွာ ဆောင်ရွက်ပေးရန်လည်း မှာကြားခဲ့ကြောင်း သိရသည်။
