မကွေး၊ ဩဂုတ် ၂
မကွေးတိုင်းဒေသကြီး ပခုက္ကူခရိုင် ဆိပ်ဖြူဒေသထွက် ကြက်သွန်နီများသည် ပြည်တွင်းစားသုံးမှုအပြင် ပြည်ပဝယ်လိုအားကောင်းလာခြင်းကြောင့် ၂၀၂၆ ခုနှစ် ဇူလိုင်လ တတိယပတ်အတွင်း ဈေးနှုန်းဆက်လက်မြင့်တက်ကာ အရောင်းအဝယ်သွက်လက်လျက်ရှိကြောင်း ဆိပ်ဖြူကြက်သွန်နီဈေးကွက်မှ သိရသည်။
အုံးမှင်၊ လက်ဆည်၊ ဆူးလေကုန်း၊ တပ်မ၊ ဝဲမ၊ ဘဲကျ၊ တပေါင်းနှင့် ကူရှည်အလယ်စု ကျေးရွာများမှ ကြက်သွန်နီများ ပွဲရုံဈေးကွက်သို့ နေ့စဉ် ပိဿာချိန် ၅ သောင်းခန့် ဝင်ရောက်လျက်ရှိသော်လည်း ဝယ်လိုအားများပြီး ကုန်ဝင်နည်းနေသဖြင့် ဈေးနှုန်းများ မြင့်တက်လာခဲ့ခြင်းဖြစ်သည်။
ဆိပ်ဖြူဈေးကွက်တွင် ဇူလိုင်လဆန်းပိုင်းက ကြက်သွန်နီတစ်ပိဿာလျှင် အမြင့်ဈေး ကျပ် ၃,၇၀၀ ခန့်သာရှိခဲ့ပြီး လလယ်ပိုင်းတွင် ကျပ် ၃,၅၀၀ ဝန်းကျင်သို့ ကျဆင်းခဲ့သော်လည်း ယင်းနောက်ပိုင်း၌ တစ်ပိဿာ ကျပ် ၅,၀၀၀ ခန့်အထိ မြင့်တက်လာခဲ့ကြောင်း သိရသည်။
လက်ရှိပေါက်ဈေးအရ ဂျွန်သေးတစ်ပိဿာလျှင် ကျပ် ၃,၀၀၀ မှ ၃,၅၀၀၊ ဂျွန်လတ်တစ်ပိဿာလျှင် ကျပ် ၃,၇၀၀ မှ ၄,၃၀၀ နှင့် ဂျွန်ကြီးတစ်ပိဿာလျှင် ကျပ် ၄,၆၀၀ မှ ၄,၇၀၀ အထိ ပေါက်ဈေးရှိနေပြီး နယ်ဝယ်လက်များက ရက်ဆိုင်းဈေးဖြင့် တစ်ပိဿာ ကျပ် ၅,၀၀၀ နှုန်းအထိ ဝယ်ယူလျက်ရှိကြောင်း သိရသည်။
ယမန်နှစ် အလားတူကာလဖြစ်သည့် ၂၀၂၅ ခုနှစ် ဇူလိုင်လတတိယပတ်တွင် ကြက်သွန်နီတစ်ပိဿာလျှင် အမြင့်ဆုံး ကျပ် ၁,၀၀၀ ခန့်သာ ရရှိခဲ့သော်လည်း ယခုနှစ်တွင် ကျပ် ၅,၀၀၀ ခန့်အထိ မြင့်တက်လာသဖြင့် တစ်ပိဿာလျှင် ကျပ် ၄,၀၀၀ ခန့် ဈေးတက်လာခဲ့ပြီး ကြက်သွန်စိုက်တောင်သူများနှင့် ပွဲစားများအတွက် အကျိုးအမြတ်ကောင်းမွန်လျက်ရှိကြောင်း သိရသည်။
ထို့ပြင် ကြက်သွန်နီကို မြဝတီမြို့မှတစ်ဆင့် ထိုင်းနိုင်ငံသို့ ပြည်ပပို့ကုန်အဖြစ် တင်ပို့မှုများလာနေကြောင်းလည်း သိရသည်။
