နေပြည်တော်၊ ဩဂုတ် ၆
နေပြည်တော်ကောင်စီနယ်မြေအပါအဝင် တိုင်းဒေသကြီးနှင့် ပြည်နယ်အသီးသီးရှိ မြန်မာဆန်စပါးအွန်လိုင်း (My RO) စနစ်တွင် မှတ်ပုံတင်ထားသည့် ဆန်စပါးသိုလှောင်ရုံစုစုပေါင်း ၅,၇၉၂ လုံးရှိလာပြီဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန လက်အောက်ရှိ စားသုံးသူရေးရာဦးစီးဌာနမှ သိရသည်။
မြန်မာဆန်စပါးအွန်လိုင်း (My RO) စနစ်ကို စားသုံးသူရေးရာဦးစီးဌာနနှင့် မြန်မာနိုင်ငံဆန်စပါးအသင်းချုပ်တို့ ပူးပေါင်း၍ ဆန်စပါးသိုလှောင်မှုလုပ်ငန်းများကို ဒီဂျစ်တယ်နည်းလမ်းဖြင့် စနစ်တကျ မှတ်ပုံတင်နိုင်စေရန် ရည်ရွယ်၍ ၂၀၂၃ ခုနှစ် နိုဝင်ဘာ ၃ ရက်မှ စတင်အကောင်အထည်ဖော်ခဲ့ခြင်းဖြစ်သည်။
၂၀၂၆ ခုနှစ် ဇွန် ၃၀ ရက်အထိ သိုလှောင်ရုံအကျယ်အဝန်း သတ်မှတ်ချက်များအပေါ် မူတည်၍ အုပ်စုလေးစုခွဲကာ အွန်လိုင်းစနစ်ဖြင့် မှတ်ပုံတင်လက်ခံဆောင်ရွက်ခဲ့ရာ နေပြည်တော်ကောင်စီနယ်မြေအပါအဝင် တိုင်းဒေသကြီးနှင့် ပြည်နယ်များရှိ ဆန်စပါးသိုလှောင်ရုံ ၅,၇၉၂ လုံး မှတ်ပုံတင်ထားနိုင်ခဲ့ကြောင်း သိရသည်။
My RO စနစ်သည် ဆန်စပါးသိုလှောင်ရုံများ၏ ကုန်ဝင်၊ ကုန်ထုတ်နှင့် ကုန်လက်ကျန်အချက်အလက်များကို ဒီဂျစ်တယ်စနစ်ဖြင့် စနစ်တကျ စီမံခန့်ခွဲနိုင်ရန် ရည်ရွယ်ထားသည့်အပြင် ဆန်စပါးကဏ္ဍ၏ အချက်အလက်စီမံခန့်ခွဲမှုနှင့် ဈေးကွက်တည်ငြိမ်ရေးအတွက်လည်း အထောက်အကူပြုစေမည့် စနစ်တစ်ခုဖြစ်ကြောင်း သိရသည်။
