ကျိုင်းတုံ၊ ဩဂုတ် ၉
ရှမ်းပြည်နယ် (အရှေ့ပိုင်း)၊ လွိုင်မွေမြို့ရှိ နှစ်ပေါင်း ၁၀၀ ကျော် သက်တမ်းရှိ ရှေးဟောင်းအဆောက်အအုံစာရင်းဝင် လွိုင်မွေစာတိုက်ကို ယမန်နေ့က ကြေးပြားကမ္ပည်းမော်ကွန်း တပ်ဆင်ခဲ့ကြောင်း သိရသည်။
ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးမောင်မြင့်နှင့် တာဝန်ရှိသူများက အဆိုပါ စာတိုက်နှင့် စိန်မေရီအထက်တန်းကျောင်း [အထက (၂)] ချယ်ရီဆောင်တို့၏ ကြေးပြားကမ္ပည်းမော်ကွန်းများကို အမွှေးနံ့သာရည်များ ပက်ဖျန်းဖွင့်လှစ်ပေးခဲ့သည်။ ပြည်ထောင်စုဝန်ကြီးက ယခုကဲ့သို့ ကမ္ပည်းတပ်ဆင်ခြင်းသည် သမိုင်းတန်ဖိုးကို ပိုမိုထင်ရှားစေပြီး ရေရှည်တည်တံ့စေမည်ဖြစ်ကြောင်း ပြောကြားခဲ့သည်။
ထို့ပြင် ပြည်ထောင်စုဝန်ကြီးသည် လွိုင်မွေနှစ်တစ်ရာအိမ်(နယ်ခြားဝန်နေအိမ်)၊ ကျိုင်းတုံမြို့ ဗုဒ္ဓဥယျာဉ်နှင့် သီလဓမ္မဆေးရုံ၌ ပြည်သူများ ဆေးကုသမှုခံယူနေသည့်အခြေအနေ ကြည့်ရှုစစ်ဆေးကာ ဒေသတွင်း ခရီးသွားလုပ်ငန်း ဖွံ့ဖြိုးတိုးတက်ရေးဆောင်ရွက်ရန် မှာကြားခဲ့သည်။
မြန်မာ-လာအို နယ်စပ်ဖြတ်ကျော် ခရီးသွားကဏ္ဍ မြှင့်တင်ရန် လာအို-မြန်မာ ချစ်ကြည်ရေးတံတား (ကျိုင်းလပ်) ကို ကြည့်ရှုစစ်ဆေးခဲ့ပြီး ကျိုင်းတုံမြို့ဟောင်းရှိ ငမ်ဖမြို့ရိုးတူးဖော်မှု၊ RCM ဘုရားကျောင်းဝင်းအတွင်းရှိ ရှေးဟောင်းအဆောက်အအုံများနှင့် အထင်ကရ ဘုရားစေတီများကိုလည်း သွားရောက် ကြည့်ရှုဖူးမြော်ခဲ့ကြောင်း သိရသည်။
