လာအိုပြည်သူ့ဒီမိုကရက်တစ် သမ္မတနိုင်ငံ အမျိုးသားလွှတ်တော် ဥက္ကဋ္ဌ H.E. Mr. Xaysomphone Phomvihane ကွယ်လွန်သွားခဲ့သည့်အတွက် ယမန်နေ့ မွန်းလွဲပိုင်းတွင် မြန်မာ-လာအို ချစ်ကြည်ရေးအသင်း ဥက္ကဋ္ဌ ဦးဝင်းမောင်သည် အထွေထွေအတွင်းရေးမှူးနှင့်အတူ ရန်ကုန်မြို့၊ ဒဂုံမြို့နယ်၊ တော်ဝင်လမ်းရှိ မြန်မာနိုင်ငံဆိုင်ရာ လာအိုသံရုံးသို့ သွားရောက်ကာ ဂါရဝပြု ဝမ်းနည်းကြောင်း မှတ်တမ်း၌ လက်မှတ်ရေးထိုးခဲ့ကြသည်။
အဆိုပါ ဝမ်းနည်းကြောင်း မှတ်တမ်းရေးထိုးပွဲတွင် မြန်မာနိုင်ငံဆိုင်ရာ လာအိုသံအမတ်ကြီးနှင့် သံရုံးအရာထမ်းများရှေ့မှောက်၌ အသင်းဥက္ကဋ္ဌနှင့် အဖွဲ့က လာအို-မြန်မာ နှစ်နိုင်ငံ ချစ်ကြည်ရေးနှင့် ပူးပေါင်းဆောင်ရွက်မှုများတွင် အရေးပါသော ခေါင်းဆောင်တစ်ဦး ကွယ်လွန်သွားခြင်းအတွက် နက်နက်ရှိုင်းရှိုင်း ဝမ်းနည်းရပါကြောင်း ဖော်ပြရေးထိုးခဲ့ကြသည်။
ကွယ်လွန်သူ လာအို အမျိုးသားလွှတ်တော် ဥက္ကဋ္ဌ H.E. Mr. Xaysomphone Phomvihane သည် ကွယ်လွန်ချိန်တွင် အသက် (၇၀) နှစ် ရှိပြီဖြစ်ပြီး၊ ၎င်းသည် လာအိုနိုင်ငံ၏ အထင်ကရ ခေါင်းဆောင်ကြီး၊ သမ္မတဟောင်း Kaysone Phomvihane ၏ သားဖြစ်ပါသည်။ ၎င်းသည် လာအိုနိုင်ငံ၏ ဘဏ္ဍာရေးဝန်ကြီး၊ လာအို အမျိုးသားတပ်ဦး (LFND) ဥက္ကဋ္ဌ စသည့် အရေးပါသော အစိုးရနှင့် ပါတီတာဝန်များကို အဆင့်ဆင့် ထမ်းဆောင်ခဲ့သူဖြစ်ပြီး ၂၀၂၁ ခုနှစ်မှစ၍ အမျိုးသားလွှတ်တော် ဥက္ကဋ္ဌအဖြစ် တာဝန်ထမ်းဆောင်ခဲ့သူ ဖြစ်သည်။
မြန်မာ-လာအို ချစ်ကြည်ရေးအသင်းသည် နှစ်နိုင်ငံ ပြည်သူများအကြား ချစ်ကြည်ရင်းနှီးမှု၊ ယဉ်ကျေးမှု ဖလှယ်ရေး၊ ဘာသာရေးနှင့် စီးပွားရေးဆိုင်ရာ ပူးပေါင်းဆောင်ရွက်မှုများကို စဉ်ဆက်မပြတ် မြှင့်တင်ပေးနေသည့် အဖွဲ့အစည်းဖြစ်ပြီး ယခုကဲ့သို့ ဝမ်းနည်းကြောင်း မှတ်တမ်းရေးထိုးခြင်းသည် နှစ်နိုင်ငံအကြား တည်ရှိသော သံတမန်ရေးရာနှင့် ပြည်သူ့နီးကပ်မှုကို ဖော်ညွှန်းနေခြင်းလည်း ဖြစ်သည်။
