စမ်းချောင်းမြို့နယ်ရှိ ရပ်ကွက်အချို့တွင် ခွင့်ပြုချက်မရှိဘဲ ဆောက်လုပ်ခဲ့သည့် တိုက်ခန်းအချို့ကို ရန်ကုန်မြို့တော်စည်ပင်သာယာရေးကော်မတီက ပိတ်သိမ်းခဲ့ကြောင်း စမ်းချောင်းမြို့နယ်ရှိ ရပ်ကွက်အတွင်း နေထိုင်သူများထံမှ သိရသည်။
အဆိုပါ အဆောက်အဦအချို့ကို ကန်ထရိုက်တာ တစ်ဦးတည်းက ဆောက်လုပ်ခဲ့ခြင်းဖြစ်ကြောင်း စမ်းချောင်းမြို့နယ် ရန်ရှင်းလမ်းတွင် နေထိုင်သူများက ပြောကြားသည်။
"စည်ပင်က ဗီနိုင်းလာကပ်သွားတာတော့ တစ်ပတ်လောက်ရှိပြီ။ စမ်းချောင်းမြို့နယ်ထဲမှာရှိတဲ့ ရပ်ကွက်များထဲက ခွင့်ပြုချက်မရှိဘဲ ဆောက်လုပ်ခဲ့တဲ့ အဆောက်အဦတွေဖြစ်ပါတယ်။ ကျွန်တော်တို့
မုန့်လက်ဆောင်းကုန်း(မြောက်)ရပ်ကွက် ထဲက ရန်ကင်းလမ်း၊ ရန်ပြိုလမ်းနဲ့ ရန်ရှင်းလမ်းထဲက အဆောက်အဦတွေတော့ စာကပ်ထားတာရှိတယ်။ တချို့ဆို လူနေထိုင်တာတွေတောင်ရှိတယ်။ရပ်ကွက်အုပ်ချုပ်ရေးမှူးတွေနဲ့ ကန်ထရိုက်ကိုတော့ စစ်ဆေးနေပါတယ် " ဟု မုန့်လက်ဆောင်းကုန်း (မြောက်) ရပ်ကွက်တွင် နေထိုင်သူတစ်ဦးက ပြောကြားသည်။
စမ်းချောင်းမြို့နယ်အတွင်းရှိ ဝေဠုဝန်ရပ်ကွက်၊ မုန့်လက်ဆောင်းကုန်း(မြောက်)၊ မုန့်လက်ဆောင်းကုန်း(တောင်) ရပ်ကွက်၊ သံတံတားရပ်ကွက် အစရှိသည့် ရပ်ကွက် ခုနစ်ခုရှိ အထပ်မြင့်တိုက် အလုံး ၃၀ ကျော်ကို ရန်ကုန်မြို့တော်စည်ပင်သာယာရေးကော်မတီက ဗီနိုင်းများ လာကပ်သွားခြင်းဖြစ်သည်ဟု ရပ်ကွက်အတွင်း နေထိုင်သူအချို့က ပြောကြားသည်။
ရန်ကုန်မြို့တော်စည်ပင်သာယာရေးကော်မတီက စာကပ်သွားသည့် ကန်ထရိုက်တိုက်များနှင့်ပတ်သက်ပြီး ဝေဠုဝန်ရပ်ကွက်တွင်နေထိုင်သူတစ်ဦးက " သိရသလောက်က ၃၂ လုံးလို့ကြားတယ်။ ရပ်ကွက် ခုနစ်ခုပေါ့။ ဝေဠုဝန်(တောင်)လည်းပါတယ်။ (မြောက်)လည်းပါတယ်။ မုန့်လက်ဆောင်းကုန်း(မြောက်)၊ မုန့်လက်ဆောင်းကုန်း(တောင်)၊ သံတံတားရပ်ကွက်တွေလည်းပါတယ်။ တချို့တိုက်တွေဆို ကြိုပွိုင့်တွေနဲ့ရောင်းထားတာ။ ဝယ်သူဘက်က နစ်နာတာပေါ့။ လူရှိနေတဲ့အခန်းတွေကျတော့ စာလာကပ်ပြီးကတည်းကမနေတော့ဘူး။ ပစ္စည်းတွေပဲရှိတော့တာ" ဟု ဝေဠုဝန်ရပ်ကွက်တွင်နေထိုင်သူတစ်ဦးကပြောသည်။
ရန်ကုန်မြို့တော်စည်ပင်သာယာရေးကော်မတီ၏ ကပ်ထားသည့်စာအရ ဤအဆောက်အအုံသည် ရန်ကုန်မြို့တော်စည်ပင်သာယာရေးကော်မတီ၏ ခွင့်ပြုချက်မရှိဘဲ အဆောက်အအုံဖြစ်ကြောင်း၊ အဆိုပါ အဆောက်အအုံအတွင်း ဝင်ရောက်နေထိုင်ခြင်း၊ လုပ်ငန်းလုပ်ကိုင်ခြင်းမပြုရန်သတိပေးအပ်ကြောင်း ဖော်ပြထားသည်။
သတိပေးချက်ကို လိုက်နာခြင်းမရှိဘဲ အဆောက်အအုံအတွင်း ဝင်ရောက်နေထိုင်ခြင်း၊ လုပ်ငန်း ဆက်လက်လုပ်ကိုင်ခြင်းများပြုလုပ်ပါက ကျူးလွန်သူ၊ အားပေးကူညီသူနှင့်တာဝန်ရှိသူတို့ကို တည်ဆဲရန်ကုန်မြို့တော်စည်ပင်သာယာရေးဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း၊
ဥပဒေနှင့်အညီတရားစွဲဆိုခြင်း ခံရပါကပထမအကြိမ်ကျူးလွန်ခြင်းအတွက် ငွေဒဏ်၊ ဆက်လက် ကျူးလွန်ခြင်းအတွက် ထောင်ဒဏ်ချမှတ်ခြင်းခံရမည်ဖြစ်ကြောင်း ဖော်ပြထားသည်။
ထို့ပြင် ခွင့်ပြုချက်မရှိဘဲ ဆောက်လုပ်သည့် အဆောက်အအုံများသည် BCC ( လူနေထိုင်ခွင့် ) ရရှိမည် မဟုတ်ခြင်းကြောင့်လည်းကောင်း၊ BCC မရဘဲ ဝင်ရောက်နေထိုင်ပါက လျှပ်စစ်မီးနှင့်ရေဆက်သွယ်မှု ရရှိနိုင်မည် မဟုတ်ခြင်းကြောင့်လည်းကောင်း၊ ခွင့်ပြုချက်မဲ့ အဆောက်အအုံမှ အခန်းများအား ဝယ်ယူခြင်းမပြုရန် အထူးသတိပေးအပ်ကြောင်း၊ထို့ပြင် သတိပေးဆိုင်းဘုတ်အား ဖြုတ်သိမ်းခြင်း၊ ဖျက်ဆီးခြင်းပြုလုပ်ပါက တည်ဆဲဥပဒေအရ ထိရောက်ပြင်းထန်စွာ ထပ်မံအရေးယူခြင်းခံရမည်ဖြစ်ကြောင်းရန်ကုန်မြို့တော်စည်ပင်သာယာရေးကော်မတီက ထပ်မံ အသိပေးထားသည်။
