■ တရုတ်လော်ဘီ ဒေါ်စောကြည်သို့ ...
■ မြန်မာပြည်နဲ့ ခပ်ဝေးဝေးမှာ နေပေးပါ
(၁)
ဒီစာက ဒေါ်စောကြည်ရဲ့ Eleven Media Group အပေါ် မဟုတ်မမှန်စွပ်စွဲချက်တွေအတွက် ပြန်လည်ရေးသားတဲ့ စာပါ။ တကယ်တော့ လိုင်းပေါ်မှာ တရုတ်မုန်းတီးရေးကို ဖြစ်စေနိုင်တဲ့ လော်ဘီတွေရဲ့ အရေးအသားတွေ အခုနောက်ပိုင်း ပိုများလာတာကို တွေ့ရတယ်။ အထူးသဖြင့် တရုတ်လော်ဘီတွေထဲမှာဆို ဒေါ်စောကြည်က လူသိများသူပါ။ သူ့ရဲ့ Zhao Jin Facebook အကောင့်မှာ ရေးတင်ထားတဲ့ ပို့စ်တွေကို ဖတ်ကြည့်ရင် တွေ့မြင်နိုင်ပါတယ်။
ဒေါ်စောကြည်အကြောင်းကို လက်လှမ်းမီသလောက် လေ့လာကြည့်တဲ့အခါ ဒေါ်စောကြည်ဟာ သာမန်လူတစ်ယောက်တော့ မဟုတ်ပါဘူး။ ၂၀၂၁ ဒီဇင်ဘာ ၂၅ ရက် CRI Myanmar လူမှုကွန်ရက်မှာ တင်ထားတဲ့ အင်တာဗျူးတစ်ခုမှာတော့ သူ့ရဲ့ တရုတ်အမည်က ကျောက်ကျင် ဖြစ်ပြီး မြန်မာအမည်ကတော့ ဒေါ်စောကြည်လို့ ဖော်ပြထားပါတယ်။ ဒေါ်စောကြည်ကို ၁၉၇၃ မှာ တရုတ်နိုင်ငံ ပေါင်ဆန်းမြို့မှာ မွေးပါတယ်။ ပေကျင်းနိုင်ငံခြားဘာသာတက္ကသိုလ်ကနေ ၁၉၉၇ မှာ ဘွဲ့ရပြီးတော့ ဆရာမ စလုပ်ခဲ့သလို မြန်မာနိုင်ငံနဲ့ပတ်သက်ပြီး အတွေ့အကြုံများသူလည်း ဖြစ်တယ်။
သူဟာ ဘေကျင်းနိုင်ငံခြားဘာသာတက္ကသိုလ် မြန်မာဘာသာဌာနက မြန်မာစာပြတဲ့ တက္ကသိုလ်ဆရာမ တစ်ယောက်လည်း ဖြစ်ပါတယ်။ ဒါတင်မကသေးပါဘူး။ သူက သုတေသီတစ်ယောက် ပညာရှင်တစ်ယောက်လည်း ဖြစ်တယ်။ မြန်မာနိုင်ငံနဲ့ပတ်သက်ရင် သူရေးသားထုတ်ဝေခဲ့တဲ့ စာအုပ်တွေနဲ့ သုတေသနစာတမ်းတွေလည်း ရှိခဲ့တာကို သိရပါတယ်။ ပညာရှင်တစ်ယောက်ဖြစ်သလို တက္ကသိုလ်ဆရာမ ပညာတတ်တစ်ယောက်လည်း ဖြစ်ပါတယ်။ ဒါ့အပြင် သူဟာ တရုတ်သံရုံးရဲ့ စီးပွားရေးကဏ္ဍပိုင်းမှာ ဝန်ထမ်းတစ်ယောက်အနေနဲ့ ယာယီလုပ်ခဲ့ဖူးတယ်လို့လည်း သိရတယ်။
အခုလို တက္ကသိုလ်ဆရာမလည်းဖြစ်၊ ပညာရှင်လည်းဖြစ်တဲ့ ဒေါ်စောကြည်အနေနဲ့ သူ့ရဲ့ လူမှုကွန်ရက်စာမျက်နှာကနေ မြန်မာလူမျိုးတွေအပေါ် နှိမ့်ချစော်ကားမှုတွေကို အမြဲလိုလို ရေးတင်လေ့ရှိပါတယ်။ ပညာရှင်၊ တက္ကသိုလ်ဆရာမ ဒီလိုဂုဏ်ဒြပ်တွေရှိတဲ့ ဒေါ်စောကြည်အနေနဲ့ မြန်မာလူမျိုးတွေအပေါ် နှိမ့်ချစော်ကားတဲ့ စာမျိုးတွေကို လူမှုကွန်ရက်မှာ ရေးသားနေတာဟာ မဖြစ်သင့်တဲ့ကိစ္စပါ။ သူ့ရဲ့ လူမှုကွန်ရက်စာမျက်နှာမှာ ရေးသားထားတဲ့ ပို့စ်တွေကို ဝင်ရောက်လေ့လာကြည့်တဲ့အခါမှာ မြန်မာစာသင်တဲ့ တက္ကသိုလ်ဆရာမဖြစ်ပေမဲ့ မြန်မာလူမျိုးတွေနဲ့ပတ်သက်ရင် နှိမ့်ချစော်ကားတဲ့ အရေးအသားတွေကိုသာ တွေ့ရပါတယ်။ သူ့ရဲ့ ရေးသားချက်တွေဟာ ပညာတတ်လည်းမဆန်၊ တက္ကသိုလ်ဆရာမတစ်ယောက်ရဲ့ ကျင့်ဝတ်သိက္ခာနဲ့လည်း မညီညွတ်ဘူးလို့သာ ဆိုရပါမယ်။
ပြောရရင် တရုတ်လော်ဘီ ဒေါ်စောကြည်ဟာ လူမှုကွန်ရက်ကနေ မြန်မာလူမျိုးတွေအပေါ် နှိမ့်ချစော်ကားပြီး တရုတ်မုန်းတီးရေးကို လုပ်ဆောင်နေကြသူတွေထဲမှာ အဆိုးဆုံးလို့တောင် ဆိုနိုင်ပါတယ်။ဒေါ်စောကြည်အနေနဲ့ ပညာရှင်တစ်ယောက် ဖြစ်တဲ့အပြင် တက္ကသိုလ်ဆရာမ တစ်ယောက်လည်း ဖြစ်တဲ့အတွက်ကြောင့် မြန်မာလူမျိုးအပေါ် ဒီထက်ပိုပြီး အကောင်းဖက်က ကြည့်ဖို့ လိုတယ်ဆိုတာကိုလည်း ဒီကနေတစ်ဆင့် တိုက်တွန်းလိုက်ပါရစေ။
(၂)
Eleven Media Group ရဲ့ Facebook Page မှာ ဖော်ပြခဲ့တဲ့ "တရုတ်-မြန်မာ ချစ်ကြည်ရေး အဓွန့်ရှည်ပါစေ၊ မြန်မာ့အချုပ်အခြာအာဏာ တည်တံ့ခိုင်မြဲပါစေ" ဆိုတဲ့ ဆောင်းပါးနဲ့ပတ်သက်လို့ တရုတ်လော်ဘီ ဒေါ်စောကြည်က အခြေအမြစ်မရှိတဲ့ စွပ်စွဲချက်တွေနဲ့ ပို့စ်တွေတင်ခဲ့ပါတယ်။
သူတင်တဲ့ ပို့စ်မှာ Eleven Media Group ရဲ့ ဆောင်းပါးက တရုတ်-မြန်မာ မုန်းတီးရေးလုပ်နေတယ်လို့ အခြေအမြစ်မရှိပဲ စွပ်စွဲပြောဆိုထားပါတယ်။
ဒေါ်စောကြည် မသိတာက Eleven Media Group အနေနဲ့ ဒီဆောင်းပါးကို ရေးသားရတဲ့ ရည်ရွယ်ချက်က မြန်မာနိုင်ငံရဲ့ အချုပ်အခြာအာဏာ တည်တံ့ဖို့နဲ့ မြန်မာအစိုးရနဲ့ တရုတ်အစိုးရကြား ချစ်ကြည်ရင်းနှီးရေး အဓွန့်ရှည်ဖို့အတွက်လည်း ဖြစ်ပါတယ်။
ဒီဆောင်းပါးထဲမှာ ဘယ်သူ့ကိုမှ ထိခိုက်နစ်နာအောင် ပုတ်ခတ်ပြောဆိုခြင်း မရှိဘဲ အချက်အလက်ပြည့်ပြည့်စုံစုံနဲ့ မြန်မာနိုင်ငံရဲ့ အချုပ်အခြာအာဏာအတွက် ဖြစ်သင့်ဖြစ်ထိုက်တဲ့ အခြေအနေတွေကို ရေးသားတင်ပြခဲ့တာပါ။
ဒီလို အချက်အလက်ပြည့်ပြည့်စုံစုံနဲ့ ရေးသားခဲ့ပေမဲ့လည်း ဒေါ်စောကြည်ကတော့ ဆောင်းပါးအပေါ်မှာ ပညာရှင်ဆန်ဆန် သုံးသပ်ခြင်းမရှိဘဲ သူ့ရဲ့ လူမှုကွန်ရက်စာမျက်နှာကနေ Eleven Media Group ကို ဝေဖန်တိုက်ခိုက်ရေးသားခဲ့တာကို တွေ့ရပါတယ်။
ဒေါ်စောကြည် တင်ထားတဲ့ ပို့စ်မှာ "အစိမ်းရောင် တရုတ်မုန်းတီးရေး နောက်တစ်လှိုင်း လာပြန်ပြီ" ဆိုပြီး ဆောင်းပါးကို စွပ်စွဲပုတ်ခတ်ပြောဆိုထားပါတယ်။
ဒါဟာ ဒေါ်စောကြည်ရဲ့ ထင်မြင်ယူဆချက်သာဖြစ်ပြီး ဆောင်းပါးထဲမှာတော့ တရုတ်မုန်းတီးရေးကို လှုံ့ဆော်ရေးသားထားတာ ဘာတစ်ခုမှ မပါပါဘူး။ သတင်းအချက်အလက် အမှန်တွေနဲ့ပဲ ရေးသားခဲ့တာပါ။ ဆောင်းပါးထဲမှာ ဘယ်အချက်တွေက တရုတ်မုန်းတီးရေးပါသလဲဆိုတာကို ဒေါ်စောကြည်အနေနဲ့ တိကျသေချာတဲ့ အကြောင်းပြချက်တွေနဲ့ ပြန်လည်ရှင်းလင်းပေးဖို့ လိုပါလိမ့်မယ်။
ဆောင်းပါးထဲမှာပါတဲ့ MNDAA က ရှမ်းမြောက်မှာ တရုတ်စာ၊ တရုတ်စကားနဲ့ တရုတ်ငွေ သုံးစွဲမှုတွေ လုပ်ဆောင်လာတာဟာ တကယ့်ပကတိအရှိတရားလည်း ဖြစ်ပါတယ်။ MNDAA က ကျူးကျော်သိမ်းပိုက်ခံထားတဲ့ နယ်မြေတွေမှာ တရုတ်ပိုက်ဆံ သုံးတာ၊ တရုတ်စာ စကားတွေကို အတင်းအကျပ်လုပ်ဆောင်လာတာတွေကြောင့် မြေပြင်မှာ ဒေသခံတိုင်းရင်းသားတွေက ကန့်ကွက်နေကြရတာဟာ တကယ့်အမှန်တရားလည်း ဖြစ်ပါတယ်။
ဒီကိစ္စအပေါ် ဒေသခံတိုင်းရင်းသားအဖွဲ့အစည်းတွေက ကန့်ကွက်ကြေညာချက်တွေ ထုတ်ပြန်ခဲ့သလို အောက်တိုဘာ ၂၃ ရက်မှာလည်း ရှမ်းပြည်ပူးပေါင်းဆောင်ရွက်ရေးကော်မတီ (SSJAC) က ရှမ်းမြောက်ပိုင်း တိုင်းရင်းသားတွေရဲ့ အခြေခံရပိုင်ခွင့်နဲ့ ယဉ်ကျေးမှုတွေအပေါ် MNDAA ရဲ့ အတင်းအကျပ် ခြိမ်းခြောက်လွှမ်းမိုးမှုတွေကို ပြင်းထန်စွာကန့်ကွက်တယ်လို့ ထုတ်ပြန်ခဲ့ပါတယ်။
SSJAC ရဲ့ ထုတ်ပြန်ချက်ထဲမှာဆိုရင် MNDAA ဟာ ဒေသခံအများစုနဲ့ ရင်းနှီးကျွမ်းဝင်မှု လုံးဝမရှိတဲ့၊ အသုံးပြုလေ့မရှိတဲ့ ဘာသာစကားကို ရုံးသုံးဘာသာစကားအပြင် အများပြည်သူ သက်ဆိုင်ရာနေရာတွေမှာ မဖြစ်မနေ အသုံးပြုဖို့ဖိအားပေးစေခိုင်းတာ၊ ဘိုးဘွားစဉ်ဆက် ပိုင်ဆိုင်လုပ်ကိုင်လာခဲ့သော ဒေသခံတွေရဲ့ တည်ဆဲမြေယာ ပိုင်ဆိုင်မှုစနစ်တွေကို ဒေသခံလူထုရဲ့ သဘောဆန္ဒမပါဘဲ အတင်းအကျပ် ပြုပြင်ပြောင်းလဲတာနဲ့ သိမ်းဆည်းတာတို့ကို ဆောင်ရွက်လျက်ရှိတယ်လို့ ဆိုပါတယ်။
ဒါ့အပြင် MNDAA က ပြဋ္ဌာန်းလိုက်တဲ့ မြေယာဥပဒေ အပါအဝင် တခြားအုပ်ချုပ်ရေးဥပဒေ အရပ်ရပ်ဟာ နိုင်ငံခြားသားတွေ အတားအဆီးမရှိ ဝင်ရောက် လာနိုင်စေပြီး နိုင်ငံခြားသားတွေ မြေပိုင်ဆိုင်ခွင့်ရရှိစေမယ့် တိုက်ရိုက်နဲ့ သွယ်ဝိုက်နည်းလမ်းတွေ ပေါ်ပေါက်နေစေတာ၊ သမိုင်းစဉ်ဆက် ခေါ်ဝေါ်သုံးစွဲလာခဲ့တဲ့ မြို့ရွာအမည်တွေနဲ့ အများပြည်သူနဲ့ သက်ဆိုင်တဲ့ ဆိုင်းဘုတ်အမျိုးမျိုးကို ဒေသခံတွေရဲ့ ယဉ်ကျေးမှုနဲ့ လုံးဝသက်ဆိုင်ခြင်းမရှိတဲ့ အမည်နာမ၊ ဘာသာစကားတွေနဲ့ အတင်းအကျပ် အစားထိုးပြောင်းလဲတာနဲ့ ဒီလုပ်ရပ်တွေကို ငြိမ်းချမ်းစွာ ကန့်ကွက်တဲ့ ဒေသခံတွေကို ဖမ်းဆီးတာ၊ ဖိနှိပ်တာနဲ့ ခြိမ်းခြောက်မှုတွေ ပြုလုပ်ပြီး နိုင်ငံသားအခွင့်အရေးနဲ့ လွတ်လပ်စွာထုတ်ဖော်ပြောဆိုခွင့်ကို ပြောင်ပြောင်တင်းတင်း ချိုးဖောက်နေတာတို့ကို ဆောင်ရွက်နေတယ်လို့ SSJAC က ဆိုပါတယ်။
ဒီလုပ်ရပ်တွေကို အတည်သဘောမျိုးနဲ့ အတင်းအကျပ် လက်တွေ့အကောင်အထည် ဖော်ဆောင်ရွက်နေတာတွေဟာ ၂၀၂၂ ဖေဖော်ဝါရီ ၁၄ ရက်က ထုတ်ပြန်ထားပြီး လေးနက်စွာ လက်ခံကျင့်သုံးလျက်ရှိတဲ့ "ငြိမ်းချမ်းစွာ အတူယှဉ်တွဲ နေထိုင်ရေးမူ" (Manifesto of Peaceful Coexistence) ကိုသာမက မိမိတို့မျှော်ရည်တဲ့ ဖက်ဒရယ်ပြည်ထောင်စုစနစ်ရဲ့ အခြေခံမူတွေကိုပါ တိုက်ရိုက်ချိုးဖောက်ရာ ရောက်နေတယ်လို့ SSJAC ရဲ့ ထုတ်ပြန်ခဲ့ပါတယ်။
ဒီကန့်ကွက်ချက်ကို လျစ်လျူရှုပြီး ဆက်လက်အကောင် အထည်ဖော် ဆောင်ရွက်နေမယ်ဆိုရင် ဒေသခံပြည်သူတွေရဲ့ သမိုင်း၊ ယဉ်ကျေးမှု၊ အကျိုးစီးပွားနဲ့ ရပ်တည်ခွင့်ကို ကာကွယ်ဖို့အတွက် လိုအပ်တဲ့ နိုင်ငံရေး၊ လူမှုရေးဆိုင်ရာ တုံ့ ပြန်မှုတွေကို ပြင်းပြင်းထန်ထန် လုပ်ဆောင်သွားမယ်လို့ SSJAC က သတိပေးခဲ့ပါတယ်။
ဒေသခံတိုင်းရင်းသားတွေရဲ့ ထုတ်ပြန်ချက်တွေအရ MNDAA ထိန်းချုပ်ထားတဲ့ နယ်မြေတွေမှာ ဘယ်လောက်တောင် ဆိုးဆိုးရွားရွားဖြစ်နေတယ်ဆိုတာ သိရှိနိုင်ပါတယ်။
အထင်ရှားတဲ့ ဥပမာတစ်ခုကို ပြောရရင် သမိုင်းကြောင်းအရ ပဒေသရာဇ်ခေတ်ကတည်းက သိန္နီနယ်ဟာ ရှမ်းမြောက်ပိုင်းမှာ အကြီးမားဆုံး၊ အကျယ်ပြန့်ဆုံးနဲ့ တန်ခိုးအာဏာ အကြီးမားဆုံး ရှမ်းစော်ဘွားနယ်ကြီးတစ်ခု ဖြစ်ခဲ့တာပါ။ ဒါပေမဲ့ MNDAA က ကျူးကျော်တိုက်ခိုက်သိမ်းပိုက်ပြီးချိန်မှာတော့ ရှမ်းစော်ဘွားနယ်ကြီးတစ်ခု ဖြစ်ခဲ့တဲ့ သိန္နီမြို့ကို တရုတ်ဘာသာနဲ့ မူပန်မြို့လို့ ခေါ်ဝေါ် သုံးစွဲခဲ့ပါတယ်။
၂၀၀၈ ဖွဲ့စည်းပုံအခြေခံဥပဒေမှာလည်း သိန္နီမြို့ကို ရှမ်းပြည်နယ် မြောက်ပိုင်း လားရှိုးခရိုင်ထဲက မြို့နယ်တစ်ခုအဖြစ် သတ်မှတ်ထားပါတယ်။ ၂၀၀၈ ဖွဲ့စည်းပုံအခြေခံဥပဒေအရ သိန္နီမြို့ဟာ ကိုးကန့်ကိုယ်ပိုင်အုပ်ချုပ်ခွင့်ရဒေသထဲက မြို့နယ်မဟုတ်ပါဘူး။ ကိုးကန့်ကိုယ်ပိုင်အုပ်ချုပ်ခွင့်ရဒေသတွေအဖြစ် လောက်ကိုင်မြို့နယ်၊ ချင်းရွှေဟော်မြို့နယ်၊ ကုန်းကြမ်းမြို့နယ်နဲ့ မော်ထိုက်မြို့တို့ကိုသာ ၂၀၀၈ ဖွဲ့စည်းပုံအခြေခံဥပဒေမှာ သတ်မှတ်ပေးထားပါတယ်။ ကိုးကန့်ရဲ့ အပိုင်က ဒါပါပဲ။ ဒါကြောင့် MNDAA ကို သူ့နေရာ သူပြန်ဆုတ်ခွာဖို့ Eleven Media Group ရဲ့ ဆောင်းပါးထဲမှာ ရေးသားတာဟာ သဘာဝကျပါတယ်။
မြန်မာနိုင်ငံက နယ်ချဲ့ဗြိတိသျှလက်အောက်မှာ ကျွန်ဖြစ်ခဲ့ဖူးတဲ့ နိုင်ငံပါ။ သမိုင်းမှာလည်း ဖက်ဆစ်ဂျပန်တွေရဲ့ ကျူးကျော်မှုကို ခံရဖူးသလို တရုတ်ဖြူကူမင်တန်ရဲ့ ကျူးကျော်မှုကိုလည်း ခံခဲ့ရဖူးပါတယ်။ ဒါကြောင့် မြန်မာနိုင်ငံက နှစ်ပေါင်းများစွာ ကျူးကျော်မှုတွေရဲ့ဒဏ်ကို ခဏခဏ ခံခဲ့ရတဲ့ နိုင်ငံလည်း ဖြစ်တယ်။ နယ်ချဲ့ကျွန်အောက်ကို ခဏခဏရောက်ခဲ့ဖူးတဲ့ နိုင်ငံဖြစ်တယ်။ မင်းနေပြည်တော်ကို တိုင်းတစ်ပါး ဖျက်ဆီးခဲ့တာကို ခံခဲ့ရတဲ့ နိုင်ငံတစ်နိုင်ငံဖြစ်တယ်။ အဲဒီလို သမိုင်းကြောင်းတွေ ရှိခဲ့တဲ့အတွက် သတိထားရပါတယ်။ ဘာလို့ဆို မြန်မာတွေဟာ ဘယ်သူ့ကျွန်မှ မဟုတ်လို့ပါပဲ။
နိုင်ငံတစ်နိုင်ငံမှာ အချုပ်အခြာအာဏာက ဘာလို့အရေးကြီးလဲဆို အချုပ်အခြာအာဏာသာ မရှိရင် ဘယ်စနစ်ကိုမှ ထူထောင်လို့ မရပါဘူး။ ဒီမိုကရေစီလည်း မရသလို ဖက်ဒရယ်စနစ်လည်း မရပါဘူး။ ဒါကို ဒေါ်စောကြည်တစ်ယောက် နားလည်နိုင်လိမ့်မယ်လို့ ထင်ပါတယ်။ အရှင်းဆုံးပြောရရင် လွတ်လပ်ရေးရပြီးနောက်ပိုင်း ပထမဆုံး ပြည်ပကျူးကျော်မှုဖြစ်တဲ့ တရုတ်ဖြူ ကူမင်တန်တွေနဲ့ ပြည်တွင်းက ဗမာပြည်ကွန်မြူနစ်ပါတီက စလို့ လက်ရှိ မြောက်ပိုင်းမဟာမိတ်သုံးဖွဲ့တွေ အထိ မြန်မာပြည်ရဲ့ အချုပ်အခြာအာဏာကို ထိပါးပြီး မြန်မာ့လွတ်လပ်ရေးကို ဆုံးရှုံးနိုင်တဲ့ လက်နက်ကိုင်ပုန်ကန်မှုတွေဟာ တရုတ်နယ်စပ်ကနေ အများဆုံးလုပ်ဆောင်ခဲ့ကြတယ်ဆိုတာ ဘယ်လိုမှ ငြင်းမရပါဘူး။
(၃)
နောက်တစ်ခုက ဒေါ်စောကြည်အနေနဲ့ ဆောင်းပါးကို သေသေချာချာ ဖတ်ကြည့်စေချင်ပါတယ်။ နောက်ပြီး Eleven Media Group အကြောင်း သေချာလေ့လာစေချင်ပါတယ်။
မြန်မာပြည်ကို လာရောက်နေထိုင်ဖူးသလို တရုတ်သံရုံးရဲ့ စီးပွားရေးကဏ္ဍပိုင်းမှာ ဝန်ထမ်းတစ်ယောက်အဖြစ် ယာယီလုပ်ခဲ့ဖူးတဲ့ ဒေါ်စောကြည်အနေနဲ့ Eleven Media Group အကြောင်းကို မသိစရာအကြောင်း မရှိပါဘူး။
Eleven Media Group က Independent မီဒီယာလည်း ဖြစ်ပါတယ်။ အဲဒါကြောင့်လည်း Eleven Media Group နဲ့ တရုတ်သံရုံး၊ တရုတ်အစိုးရနဲ့ ဆက်ဆံရေးက အခုအချိန်ထိ အားကောင်းနေတာလည်း ဖြစ်ပါတယ်။
မြန်မာနိုင်ငံမှာရှိတဲ့ အမေရိကန်သံရုံးကစလို့ ဘယ်နိုင်ငံရဲ့ သံရုံးပဲဖြစ်ဖြစ် Eleven Media Group က Independent မီဒီယာဖြစ်တယ်ဆိုတာကို အားလုံးက သိပြီးသားပါ။
"အမှန်တရားက လွဲပြီး မှန်တဲ့အရာ ဘာမှမရှိ" ဆိုတဲ့ မူအတိုင်း Eleven Media Group က လျှောက်လှမ်းခဲ့တာဟာ အခုဆို ၂၇ နှစ်တိုင်ခဲ့ပါပြီ။ ဒီလိုရပ်တည်ခဲ့လို့လည်း ၂၀၁၁ မှာ Eleven Media Group ကို ပြင်သစ်နိုင်ငံအခြေစိုက် နယ်စည်းမခြားသတင်းထောက်များအဖွဲ့ (Reporters Without Borders - RSF) က "Media of the Year" (တစ်နှစ်တာအကောင်းဆုံး မီဒီယာဆု) ကို ချီးမြှင့်ခဲ့ပါတယ်။
၂၀၁၃ ခုနှစ်မှာတော့ ကမ္ဘာ့စာနယ်ဇင်းလောကမှာ ဂုဏ်သိက္ခာအကြီးမားဆုံးဆုဖြစ်တဲ့ ရွှေကလောင်ဆုကို ကမ္ဘာ့သတင်းစာများနဲ့ သတင်းထုတ်ဝေသူများအဖွဲ့ (WAN-IFRA) က Eleven Media Group ရဲ့ Chairman & CEO ဒေါက်တာသန်းထွဋ်အောင်ကို ပေးအပ်ချီးမြှင့်ခဲ့ပါတယ်။ ဒါတွေဟာ Eleven Media Group ရဲ့ သမိုင်းမှာ ဘယ်လိုမှ ဖျောက်ဖျက်လို့ မရတဲ့ မှတ်တိုင်တွေလည်း ဖြစ်ပါတယ်။
ဒါ့အပြင် Eleven Media Group ဟာ ကမ္ဘာ့စာနယ်ဇင်းလောကမှာ ဂုဏ်သိက္ခာကြီးမားလှတဲ့ ကမ္ဘာ့သတင်းစာများနှင့် သတင်းထုတ်ဝေသူများအဖွဲ့(WAN-IFRA) နဲ့ အာရှသတင်းစာများကွန်ရက် (ANN) မှာ အဖွဲ့ဝင်လည်း ဖြစ်ပါတယ်။
ကမ္ဘာ့သတင်းစာများနဲ့ သတင်းထုတ်ဝေသူများအဖွဲ့ (WAN-IFRA) ဆိုတာ နိုင်ငံပေါင်း ၁၂၀ က သတင်းစာ ၁၈၀၀၀ ကို ကိုယ်စားပြုတဲ့ သတင်းစာနဲ့ ထုတ်ဝေသူများအဖွဲ့လည်း ဖြစ်ပါတယ်။ ကုလသမဂ္ဂ၊ ယူနက်စကိုနှင့် ဥရောပကောင်စီတို့မှာ ကိုယ်စားလှယ်တွေရှိတဲ့ WAN-IFRA ဟာ နိုင်ငံ ၈၀ မှ ကိုယ်စားပြု အသင်းဝင်တွေနဲ့အတူ ထိပ်တန်းသတင်းစာ ကုမ္ပဏီကြီးတွေ၊ နည်းပညာစွန့်ဦးတီထွင်သူတွေ ချိတ်ဆက်ဖွဲ့စည်းထားတဲ့ အသင်းလည်း ဖြစ်ပါတယ်။
ဒီလိုပါပဲ အာရှသတင်းစာများကွန်ရက် (ANN) မှာလည်း အရှေ့တောင်အာရှနိုင်ငံများသာမက အာရှအခြားဒေသနိုင်ငံတွေက သတင်းဌာနတွေ ပါဝင်ပါတယ်။ ANN ကို ၁၉၉၉ ခုနှစ်မှာ စတင်ဖွဲ့စည်းခဲ့ပြီး စတင်ဖွဲ့စည်းချိန်က အဖွဲ့ဝင် ခုနစ်ဦး၊ နိုင်ငံ ခုနစ်နိုင်ငံသာ ရှိခဲ့ရာကနေ လက်ရှိမှာတော့ အဖွဲ့ဝင် ၂၃ ဦး၊ နိုင်ငံ ၂၁ နိုင်ငံအထိ ရှိလာပြီးတဲ့ အဖွဲ့အစည်းကြီးလည်း ဖြစ်ပါတယ်။
အာရှသတင်းကွန်ရက် (ANN) အဖွဲ့ဝင်တွေကတော့ The Daily Star (ဘင်္ဂလားဒေ့ရှ်)၊ Kuensel (ဘူတန်)၊ Brunei Press (ဘရူနိုင်း)၊ The Phnom Phen Post နဲ့ Ramsei Kampuchea (ကမ္ဘောဒီးယား)၊ China Daily (တရုတ်)၊ The China Post (ထိုင်ဝမ်)၊ DataLeads နဲ့ The Statesman (အိန္ဒိယ)၊ The Jakata Post (အင်ဒိုနီးရှား)၊ The Japan News (ဂျပန်)၊ Vientiane Times (လာအို)၊ Sin Chew Daily နဲ့ The Star Online (မလေးရှား)၊ Gogo Mongolia (မွန်ဂိုလီးယား)၊ Eleven Media Group (မြန်မာ)၊ The Kathmandu Post (နီပေါ)၊ Dawn(ပါကစ္စတန်)၊ Philippine Daily Inquirer(ဖိလစ်ပိုင်)၊ The Strais Times (စင်ကာပူ)၊ The Korea Herald (ကိုရီးယား)၊ The Island (သီရိလင်္ကာ)၊ The Nation (ထိုင်း)၊ Vietnam News (ဗီယက်နမ်)တို့ဖြစ်ပြီး ANN ရဲ့ ဘုတ်အဖွဲ့ Meeting တွေကို နှစ်စဉ်နိုင်ငံအလိုက်အလှည့်ကျ ကျင်းပနေတာလည်း ဖြစ်ပါတယ်။ ANN ရဲ့ အဖွဲ့ဝင်ထဲမှာ ကြည့်မယ်ဆိုရင် တရုတ်နိုင်ငံက China Daily ဟာလည်း အဖွဲ့ဝင်အဖြစ် ပါဝင်နေတာကို တွေ့ရတယ်။
၂၀၂၃ စက်တင်ဘာ ၄ ရက်က တရုတ်နိုင်ငံ ပေကျင်းမြို့မှာ ကျင်းပခဲ့တဲ့ အာရှသတင်းစာများကွန်ရက် (ANN) ဘုတ်အဖွဲ့ဆွေးနွေးပွဲကို Eleven Media Group က အမှုဆောင်ဒါရိုက်တာ ကိုယ်တိုင် တက်ရောက်ခဲ့သလို အဲဒီပွဲမှာ တရုတ်အစိုးရ တာဝန်ရှိသူတွေနဲ့လည်း ဆက်ဆံရေးကောင်းမွန်ခဲ့ပါတယ်။ တကယ်တော့ Eleven Media Group က တရုတ်နိုင်ငံနဲ့ဖြစ်စေ၊ တရုတ်မီဒီယာတွေနဲ့ဖြစ်စေ အားလုံးနဲ့ ကောင်းမွန်တဲ့ဆက်ဆံရေးရှိပါတယ်။
ဒီလိုအနေအထားမျိုးမှာ Eleven Media Group က ဖော်ပြခဲ့တဲ့ ဆောင်းပါးကို ဒေါ်စောကြည်အနေနဲ့ တရုတ်မုန်းတီးရေးလို့ စွပ်စွဲပြောဆိုမှုက တကယ်တော့ အခြေအမြစ်မရှိတဲ့ စွပ်စွဲချက်သက်သက်တစ်ခုမျှသာ ဖြစ်ပါတယ်။ အဲဒီဆောင်းပါးကို အချက်အလက် ပြည့်ပြည့်စုံစုံနဲ့ ရေးခဲ့တာပါ။ ဒေါ်စောကြည်က ပညာရှင်တစ်ယောက်၊ တက္ကသိုလ်ဆရာမတစ်ယောက်ဖြစ်ပြီး ဘာမှ ခြေခြေမြစ်မြစ်မရှိဘဲ တရုတ်မုန်းတီးရေးလို့ စွပ်စွဲလိုက်တာဟာ Eleven Media Group သိက္ခာကို ချသလိုမျိုးဖြစ်နေပါတယ်။
တရုတ်နိုင်ငံနဲ့ပတ်သက်ရင် Eleven Media Group သဘောထားက ရှင်းပါတယ်။ တရုတ်နိုင်ငံအပေါ် ဘယ်လိုသဘောထားလဲဆိုတာကို Eleven Media Group ရဲ့ အယ်ဒီတာချုပ် ကိုကျော်ဇောလင်းက "ဦးမင်းဇင်၊ တရုတ်နိုင်ငံနဲ့ Eleven မီဒီယာရဲ့ သဘောထား" ဆိုတဲ့ ဆောင်းပါးမှာ အတိအလင်း ရေးသားထားပြီးသား ဖြစ်ပါတယ်။
ဒီနေရာမှာ တရုတ်လော်ဘီ ဒေါ်စောကြည် သိရအောင် Eleven Media Group ရဲ့ အယ်ဒီတာချုပ် ကိုကျော်ဇောလင်းက "ဦးမင်းဇင်၊ တရုတ်နိုင်ငံနဲ့ Eleven မီဒီယာရဲ့ သဘောထား" ဆောင်းပါးထဲက အချက်တချို့ကို ကောက်နုတ်ဖော်ပြပေးလိုက်ပါတယ်။
"နောက်တစ်ခုက ကျွန်တော်တို့ရဲ့ ရပ်တည်ချက်ပါ။ ကျွန်တော်တို့က အမှီအခိုကင်းတဲ့ မီဒီယာ ဖြစ်တယ်။ နောက်တစ်ခါ ကျွန်တော်တို့ရဲ့ ယုံကြည်ချက်၊ ကျွန်တော်တို့က ဒီမိုကရေစီယုံကြည်တဲ့ မီဒီယာအဖွဲ့အစည်း ဖြစ်တယ်။ လွတ်လပ်တဲ့ စာနယ်ဇင်းလွတ်လပ်ခွင့်ကို လေးစားတယ်။ လက်ရှိအခြေအနေနဲ့ လုံခြုံရေးအခြေအနေတွေ ခက်ခဲမှုတွေ၊ နိုင်ငံရေးစနစ်တွေ ကြားထဲမှာ ခက်ခဲမှုတွေ အများကြီး ရှိနေပေမယ့် ကျွန်တော်တို့ ယုံကြည်ချက်က ဒါပဲ မပြောင်းလဲပါဘူး။ နောက်တစ်ခုကကျတော့ ကျွန်တော်တို့နိုင်ငံကို တည်ငြိမ်အေးချမ်း ပြီးတော့ လုံခြုံတဲ့ နိုင်ငံတစ်နိုင်ငံ ဖြစ်မယ် အချုပ်အခြာအာဏာပိုင်တဲ့ နိုင်ငံတစ်နိုင်ငံ ဖြစ်ရမယ် ကျွန်တော်တို့ ယုံကြည်ချက်က ဒီနှစ်ချက်ပဲ ရှိတယ်။ ဒီမိုကရေစီ ယုံကြည်တယ်၊ တည်ငြိမ်အေးချမ်းပြီး အချုပ်အခြာအာဏာပိုင်တဲ့ နိုင်ငံတစ်နိုင်ငံ ဖြစ်တည်ရေးကို ကျွန်တော်တို့ ယုံကြည်တယ်။ အဲ့ဒီယုံကြည်ချက် နှစ်ချက်နဲ့ ကျွန်တော်တို့က မီဒီယာ ဆက်သွားနေတယ်ဆိုတာကို အသိပေးချင်တာပါ။ ဒီနှစ်ချက်နဲ့ ကျွန်တော်တို့က တရုတ်နိုင်ငံနဲ့လည်း မိတ်ဆွေအဖြစ် ဆက်ဆံတယ်။ ကျွန်တော်တို့က ဘယ်သူ့လက်အောက်ခံမှ မဟုတ်ဘူး၊ ဘယ်သူ့ရဲ့ လက်ဝေခံမှလည်း မဟုတ်ဘူး။ Independent ဖြစ်တယ်။ ကျွန်တော်တို့က ဒီဟာကိုပဲ တစ်စိုက်မတ်မတ် သွားနေတယ်။ အခြေအနေတွေ အကြောင်းကြောင်းတွေ ရှိနေပေမယ့် ခေတ်တွေက မတူတော့ဘူး။ ၈၈ နဲ့ ၂၀၁၁ က မတူသလို ၂၀၁၁ နဲ့ ၂၀၂၆ နဲ့လည်း မတူတော့ဘူး။ အားလုံးက ပြောင်းလဲသွားပြီ။ အပြောင်းအလဲပေါ်မှာ ကျွန်တော်တို့က တည်ငြိမ်စွာနဲ့ပဲ သွားရမယ်။ အဓိကကတော့ ကျွန်တော်တို့ နိုင်ငံက ဘယ်လိုပဲ ကွဲပြား ကွဲပြား နိုင်ငံရေးယူဆချက် ကွဲပြားချက် ရှိ ရှိ ဘယ်အစိုးရပဲ တက် တက် ဘာပဲဖြစ်ဖြစ် မြန်မာနိုင်ငံဟာ တရုတ်နိုင်ငံနဲ့ မုန်းတီး၊ တရုတ်မုန်းတီးရေး ဝါဒကို အသက်သွင်းလို့ မရဘူး။ ... ကျွန်တော်တို့က တရုတ်နိုင်ငံနဲ့ ပတ်သက်တာကို ရေးတာတွေမှာ မိတ်ဆွေတစ်ဦးအနေနဲ့ ရေးတာပဲရှိတယ်။ ရန်သူတစ်ယောက်အနေနဲ့ ရေးနေတာ မဟုတ်ဘူး။ ကျွန်တော်တို့ရဲ့ သဘောထားမှတ်ချက်က အထူးသဖြင့် Eleven Media ရဲ့ရေးသားချက်တွေမှာ တရုတ်နိုင်ငံကို မိတ်ဆွေနိုင်ငံ၊ မိတ်ဆွေတစ်ဦးက မိတ်ဆွေတစ်ဦးကို ပြောတဲ့စကားမျိုးနဲ့ပဲ ပြောတာပါ"
ဒီလောက်ဆိုရင် ဒေါ်စောကြည်အနေနဲ့ Eleven Media Group က တရုတ်နိုင်ငံအပေါ် ဘယ်လိုသဘောထားလဲဆိုတာ သိလောက်ပြီ ထင်ပါတယ်။ ကဲ စာလည်း ရှည်သွားပြီးဖြစ်တဲ့အတွက် အဆုံးသတ်ပါ့မယ်။
အချုပ်ပြောရရင် ဒေါ်စောကြည်အနေနဲ့ Eleven Media Group လို သက်တမ်း ၂၇ နှစ်ရှိပြီး ဂုဏ်သိက္ခာရှိရှိ ရပ်တည်နေတဲ့ မီဒီယာတစ်ခုအပေါ် တရုတ်-မြန်မာ မုန်းတီးရေးလုပ်နေတယ်လို့ အခြေအမြစ်မရှိပဲ ထောက်ပြပြောဆိုလို့ မရပါဘူး။ Eleven Media Group က ဖော်ပြခဲ့တဲ့ ဆောင်းပါးထဲမှာ ဘယ်အချက်က မမှန်မကန်ဖြစ်နေတယ်။ ဒါကြောင့် တရုတ်-မြန်မာမုန်းတီးရေးဖြစ်စေတယ် စသဖြင့် ထောက်ပြသင့်ပါတယ်။ ဒေါ်စောကြည်လို တက္ကသိုလ်ဆရာမတစ်ယာက်၊ ပညာရှင်တစ်ယောက်ဟာ အချက်အလက်မပါပဲ သာမန်လူတစ်ယောက်လို မီဒီယာတစ်ခုကို စွပ်စွဲရေးသားသိက္ခာချတာဟာ မသင့်တော်ပါဘူး။
ဒေါ်စောကြည်ခင်များ... မြန်မာလူမျိးတွေက တရုတ်လူမျိးတွေကို မမုန်းကြပါဘူး။ တရုတ်နိုင်ငံဆိုတာလည်း မုန်းတီးရမယ့် ရန်ဖြစ်ရမယ့် နိုင်ငံလို့လည်း မထင်ပါဘူး။ ဒါပေမဲ့ မြန်မာတွေကို နှိမ့်ချဆက်ဆံတတ်တဲ့ ခင်များလို လော်ဘီတွေကိုတော့ ခါးခါးသီးသီးမုန်းတတ်ပါတယ်။ ဒါကြောင့် ကျေးဇူးပြုပြီး တရုတ်မြန်မာဆက်ဆံရေးရဲ့ ခပ်ဝေးဝေးမှာပဲ ရှိနေပေးဖို့ ပြောချင်ပါတယ်ခင်ဗျာ။
■ ■
