Eleven Media Group

ပေါ့ဘာနှင့် ဂျူဗင်တပ်စ်အသင်း နိုဝင်ဘာလကုန်တွင် စာချုပ်ဖျက်သိမ်းရန် သဘောတူညီမှုရရှိ

Photo: The Sun

တားမြစ်ဆေးအတွက် အယူခံအောင်မြင်မှုရရှိထားသည့် ပေါ့ဘာသည် နိုဝင်ဘာလကုန်တွင်ဂျူဗင်တပ်စ်အသင်းနှင့် စာချုပ်ဖျက်သိမ်းရန် သဘောတူညီမှုရရှိခဲ့ပြီဖြစ်ကြောင်း သိရသည်။

ပေါ့ဘာ (၃၁ နှစ်) သည် တားမြစ်ဆေး သုံးစွဲကြောင်း စစ်ဆေးတွေ့ရှိသဖြင့် ပြီးခဲ့သည့်နှစ် စက်တင်ဘာကတည်းက ပွဲပယ်ခံထားရပြီး ကနဦးတွင် လေးနှစ်ပွဲပယ်ပြစ်ဒဏ် ချမှတ်ခံထားရသည်။

၎င်းက အားကစားခုံရုံး (CAS) ထံ အယူခံဝင်ရာ ပွဲပယ်ပြစ်ဒဏ်ကို ၁၈ လသို့ လျှော့ချပေးသဖြင့် လာမည့်နှစ်မတ်လတွင် ပြန်လည်ကစားခွင့်ရမည်ဖြစ်သည်။

ပေါ့ဘာနှင့် ဂျူဗင်တပ်စ်အသင်း၏စာချုပ်မှာ ၂၀၂၆ ခုနှစ်အထိ ကျန်ရှိနေသော်လည်း နိုဝင်ဘာ ၃၀ ရက်တွင် စာချုပ်ဖျက်သိမ်းရန် သဘောတူညီမှုရရှိခဲ့ခြင်းဖြစ်သည်။

သို့ဖြစ်ရာ ပေါ့ဘာ သည် ဇန်နဝါရီတွင် အသင်းသစ်တစ်သင်းနှင့် စာချုပ်ချုပ်ဆိုနိုင်မည်ဖြစ်ကြောင်းသိရသည်။ ပေါ့ဘာ သည် ကစားသမားဘဝတစ်လျှောက် စုစုပေါင်း ၄၂၃ ပွဲ ကစားထားပြီး ၇၃ ဂိုး သွင်းယူထားသည်။

မူရင်းသတင်း — Eleven Media Group