Eleven Media Group

ဘရာဇီးလ်ဘောလုံးအဖွဲ့ချုပ် ဥက္ကဋ္ဌရွေးကောက်ပွဲကို နာမည်ကြီးတိုက်စစ်မှူးဟောင်း ရော်နယ်လ်ဒို ပါဝင်ယှဉ်ပြိုင်ရန် စီစဉ်

Photo: Reuters

ဘရာဇီးလ်နာမည်ကြီးတိုက်စစ်မှူးဟောင်း ရော်နယ်လ်ဒိုသည် ဘရာဇီးလ်ဘောလုံးအဖွဲ့ချုပ်ဥက္ကဋ္ဌ ရွေးကောက်ပွဲကို ပါဝင်ယှဉ်ပြိုင်ရန် စီစဉ်နေကြောင်း သိရသည်။

ရော်နယ်လ်ဒိုသည် ဥက္ကဋ္ဌအဖြစ်ရွေးကောက်ခံရလျှင် မန်စီးတီးနည်းပြ ဂွါဒီယိုလာကို ဘရာဇီးလ်လက်ရွေးစင်အသင်း၏ နည်းပြသစ်အဖြစ် ခန့်အပ်သွားရန် ရည်ရွယ်ထားကြောင်း သတင်းအချို့က ဖော်ပြခဲ့သည်။

ဘရာဇီးလ်ဘောလုံးအဖွဲ့ချုပ်ဥက္ကဋ္ဌ ရွေးကောက်ပွဲကို ၂၀၂၅ ခုနှစ် မတ်လတွင် ပြုလုပ်သွားမည်ဖြစ်ပြီး လက်ရှိဥက္ကဋ္ဌဖြစ်သူ ရိုဒရီဂတ်စ်မှာ ၂၀၂၆ ခုနှစ် မတ်လတွင်မှ ရာထူးသက်တမ်း ကုန်ဆုံးမည်ဖြစ်သည်။ ရော်နယ်လ်ဒိုက ဂွါဒီယိုလာကို ခေါ်ယူပေးမည်ဟု မက်လုံးပေးပြီး မဲဆွယ်ထားကြောင်းလည်း သတင်းထွက်နေသည်။

ဂွါဒီယိုလာ သည် ယခင်ကတည်းက တစ်ချိန်ချိန်တွင် ဘရာဇီးလ်လက်ရွေးစင်အသင်းကို ကိုင်တွယ်ဖွယ်ရှိကြောင်း ထင်ကြေးပေးခံခဲ့ရသူဖြစ်သည်ဟု သတင်းထွက်ခဲ့ဖူးသော်လည်း မကြာသေးမီက ဥက္ကဋ္ဌ ရိုဒရီဂတ်စ်က ယင်းသတင်းများကို ငြင်းဆန်ခဲ့သည်။ ဂွါဒီယိုလာအနေဖြင့် မန်စီးတီးနှင့် ၂၀၂၆ ခုနှစ်အထိ စာချုပ်သက်တမ်းတိုးဖွယ် ရှိနေသည်။

မူရင်းသတင်း — Eleven Media Group