Eleven Media Group

ဆော်ဒီပရိုလိဂ်တွင် မပျော်ရွှင်သဖြင့် အသင်းပြန်ပြောင်းရန် နေမာ ကြိုးစားနေသည်ဆိုခြင်းကို အေးဂျင့်ဖြစ်သူ ငြင်းဆန်ပယ်ချ

Photos: Getty Images

နာမည်ကျော်ဘရာဇီးလ်ဘောလုံးသမား နေမာ၏ အေးဂျင့်ဖြစ်သူက ၎င်း၏ ကစားသမားသည် ဆော်ဒီပရိုလိဂ်တွင် ကစားရသည်ကို မပျော်မရွှင် ဖြစ်နေသဖြင့် အသင်းပြန်လည်ပြောင်းရွှေ့ရန် စီစဉ်နေသည်ဆိုသည့်သတင်းများကို ငြင်းဆန်ပယ်ချခဲ့သည်။

နေမာသည် ဆော်ဒီပရိုလိဂ်ပြိုင်ပွဲ၏ လက်ရှိအမှတ်ပေးချန်ပီယံ အယ်လ်ဟီလာအသင်းထံ ရွှေ့ပြောင်းခဲ့ပြီးနောက်ပိုင်းတွင် ဒဏ်ရာပြဿနာကြောင့် ကာလရှည် အနားယူခဲ့ရပြီး မကြာသေးမီကမှ ပြန်လည်ကစားနိုင်ခဲ့သူဖြစ်သည်။

၎င်းသည် ဆော်ဒီပရိုလိဂ်ပြိုင်ပွဲတွင် ထိပ်တန်းလစာငွေ ရရှိနေသော်လည်း အသင်းတွင် မပျော်မရွှင်ဖြစ်နေသည့်အတွက် ငယ်ဘဝ မိခင်ကလပ် ဆန်းတို့စ်အသင်းထံ ပြန်လည်ပြောင်းရွှေ့လိုနေသည်ဟု သတင်းထွက်နေခြင်းဖြစ်သည်။

ယင်းသတင်းများနှင့်ပတ်သတ်ပြီး ၎င်း၏အေးဂျင့်ဖြစ်သူက "အယ်လ်ဟီလာကနေ နေမာ ထွက်ခွာဖို့ စီစဉ်နေပြီဆိုတဲ့ သတင်းတွေက အခြေအမြစ်မရှိပါဘူး။ အခုအချိန်မှာ နေမာက ဒီအသင်းမှာပဲ ပျော်ရွှင်နေပြီး အသင်းက ထွက်ခွာဖို့ အစီအစဉ်လည်း မရှိပါဘူး"ဟု ပြောကြားခဲ့သည်။

မူရင်းသတင်း — Eleven Media Group