Eleven Media Group

အာဒါဂူလာကို အငှားဖြင့် ခေါ်ယူရန် အာဆင်နယ် စီစဉ်

အာဆင်နယ်အသင်းသည် ရီးယဲလ်အသင်းတွင် ပွဲကစားခွင့်ရရန် ရုန်းကန်နေရသည့် တူရကီလူငယ်ကွင်းလယ်ကစားသမား အာဒါဂူလာအား အငှားဖြင့် ခေါ်ယူရန် စီစဉ်နေကြောင်း သိရသည်။
အာဆင်နယ်အသင်းသည် ယခင်က ရီးယဲလ်ကွင်းလယ်ကစားသမား အော်ဒီဂွါအားခေါ်ယူပြီး အောင်မြင်မှုရခဲ့ရာ ယခုအခါ အာဒါဂူလာကိုလည်း ယင်းကဲ့သို့ခေါ်ယူရန် စီစဉ်နေခြင်းဖြစ်သည်။
အာဒါဂူလာ (၁၉ နှစ်)သည် ယခုရာသီတွင် ရီးယဲလ်အတွက် ပြိုင်ပွဲစုံ (၃၀၇)မိနစ်သာ ကစားထားရကြောင်း သိရသည်။
ထို့ကြောင့် ၎င်းသည် ဒေါသထွက်နေပြီး ပုံမှန်ပွဲထွက်ခွင့်ရမည့်အသင်းသို့ ပြောင်းရွှေ့လိုနေကြောင်းသိရသည်။
အာဆင်နယ်အသင်းသည် ပထမအသင်းကစားသမားများဖြစ်သည့် ဂျေးဇူး၊ ဇင်ချန်ကိုနှင့် တီယာနေးတို့အား လာမည့် ဇန်နဝါရီတွင် ရောင်းထုတ်ဖွယ်ရှိနေကြောင်းလည်း သိရှိရသည်။
အာဆင်နယ်အသင်းသည် လာမည့်ဇန်နဝါရီတွင် ထိပ်တန်းတိုက်စစ်မှူးတစ်ဦး ခေါ်ယူရန် စီစဉ်နေပြီး ယင်းအတွက် အသင်းမှကစားသမားများကိုရောင်းထုတ်ပြီး ရန်ပုံငွေရှာရန် စီစဉ်လာခြင်းဖြစ်သည်။
ဂျေးဇူး၊ ဇင်ချန်ကိုနှင့် တီယာနေးတို့ (၃) ဦးစလုံးသည် အာဆင်နယ်အသင်းတွင် ပွဲကစားရရန် ရုန်းကန်နေရသူများ ဖြစ်သည်။

မူရင်းသတင်း — Eleven Media Group