
ဘာစီလိုနာအသင်းသည် စပိန်တိုက်စစ်ကစားသမား အော်လ်မိုကို လာမည့် ဇန်နဝါရီအပြောင်းအရွှေ့စျေးကွက်တွင် ပြောင်းရွှေ့ကြေးအ လွတ်ဖြင့် ဆုံးရှုံးရဖွယ်ရှိနေကြောင်း သိရသည်။
ဘာစီလိုနာအသင်းသည် အော်လ်မို(၂၆ နှစ်)ကို ပြီးခဲ့သည့်နွေရာသီတွင် လိုက်ပ်ဇစ်အသင်းထံမှ ယူရိုသန်း(၆၀)ဖြင့် ခေါ်ယူကာ (၆)နှစ် စာချုပ် ချုပ်ဆိုထားသော်လည်း ဘဏ္ဍာရေးပြဿနာကြောင့် ပြောင်းရွှေ့ကြေးအလွတ်ဖြင့် ဆုံးရှုံးရဖွယ်ရှိနေခြင်းဖြစ်သည်။
ဘာစီလိုနာအသင်းသည် ၎င်းကို ၂၀၂၄ ပြက္ခဒိန်နှစ်အတွင်းသာ ယာယီသဘောဖြင့် စာရင်းသွင်းနိုင်ခဲ့ခြင်းဖြစ်သောကြောင့် ဇန်နဝါရီလတွင် လာလီဂါအဖွဲ့ချုပ်မှ သတ်မှတ်ထားသည့်အတိုင်း ငွေကြေးစာရင်းရှင်းတမ်း ပြသနိုင်ခြင်းမရှိပါက ၎င်းအား စာချုပ်ချုပ်ဆိုမှုမှာ ပျက်ပြယ်သွားမည်ဖြစ်သည်။
ထို့ကြောင့် ပြောင်းရွှေ့ကြေးအလွတ်ဖြင့် ခေါ်ယူနိုင်ဖွယ်ရှိနေသည့် ၎င်းကို မန်စီးတီးအသင်းက ချိန်ရွယ်နေကြောင်း သိရသည်။
မန်စီးတီးအသင်းသည် တိုက်စစ်ပိုင်းကို အားဖြည့်ရန် စီစဉ်နေရာ အော်လ်မိုကို ပစ်မှတ်ထားနေခြင်းဖြစ်ပြီး လက်ရှိအချိန်၌ ၎င်း၏ အေးဂျင့်ဖြစ်သူမှာ မန်ချက်စတာမြို့တွင် ရောက်ရှိကာ ဆွေးနွေးမှုများ ပြုလုပ်နေကြောင်း ဗြိတိန်မီဒီယာများက ဖော်ပြခဲ့သည်။
သို့သော် အော်လ်မိုကမူ ဘာစီလိုနာအသင်းတွင်သာ ဆက်နေလိုပြီး ဆုဖလားအောင်ပွဲများစွာ ရယူသွားလိုသည်ဟု ပြောကြားခဲ့သည်။
အော်လ်မိုသည် ယခုရာသီတွင် ဘာစီလိုနာအတွက် (၆)ဂိုး သွင်းယူပေးထားသည်။