၁၉.၂ .၂၀၂၅
Written by KL
ရန်ကုန်တိုင်းဒေသကြီး၊ လှိုင်သာယာမြို့နယ်၊ ရန်ကုန်-ပုသိမ်လမ်းမကြီး၊ အဝေးပြေးကားဝန်းအနီးတွင် ဖေဖော်ဝါရီလ ၁၉ ရက် နံနက် ၁၁ နာရီ ၃ မိနစ်ခန့်က ကားနှစ်စီး တိုက်မိရာမှ တရုတ်နိုင်ငံသားတစ်ဦး ကားခေါင်းတွင် ညပ်နေပြီး ထိခိုက်ဒဏ်ရာ ရရှိခဲ့ကြောင်း ကယ်ဆယ်ရေးဆောင်ရွက်ခဲ့သူများထံမှ သိရသည်။
ဖြစ်စဥ်မှာ လှိုင်သာယာမြို့နယ်မှ ထန်းတပင်မြို့နယ်ဘက်သို့ မောင်းနှင်လာသော တရုတ်နိုင်ငံသား Mr.Well မောင်းနှင်လာသော Toyota Harrier အမဲရောင် မော်တော်ယာဥ်က အရှိန်မထိန်းနိုင်ဘဲ တစ်ဖက်ယာဥ်ကြောရှိ မအူပင်မြို့နယ်မှ မရမ်းကုန်းမြို့နယ်ဘက်သို့ မောင်းနှင်လာသော Nissan Condor ကုန်တင်ယာဥ်ကို ဝင်တိုက်မိပြီး လူညပ်နေခဲ့ခြင်းဖြစ်ကြောင်း သိရသည်။
“ကားတိုက်မှုဖြစ်ပြီး လူညပ်နေတယ်လို့ ပြည်သူတစ်ဦးကသတင်းပို့လို့ သွားရောက်ကူညီခဲ့တာပါ။ ၁၀ မိနစ်လောက်အကြာမှာ လူနာကို ကယ်ထုတ်နိုင်ခဲ့ပါတယ်”ဟု ကယ်ဆယ်ရေးတွင် ပါဝင်သူ တစ်ဦးက ပြောသည်။
ယာဥ်တိုက်မှုကြောင့် အသက် ၄၁ နှစ်အရွယ် တရုတ်နိုင်ငံသား Mr.Well တွင် မျက်နှာဖူးယောင်ဒဏ်ရာနှင့် ညာခြေထောက်ကျိုးဒဏ်ရာတို့ ရရှိခဲ့ပြီး သာဓုဓ္မပရဟိတအသင်းမှ လူနာတင်ယာဉ်ဖြင့် လှိုင်သာယာမြို့နယ်၊ ပြည်သူ့ဆေးရုံသို့ ကူညီပို့ဆောင်ပေးခဲ့ရာ လူနာမှာ အသက်အန္တရာယ် မစိုးရိမ်ရကြောင်း သိရသည်။
