အရှေ့အလယ်ပိုင်းစစ်ပွဲအတွင်း လက်ရှိအချိန်အထိ ထိခိုက်ပျက်စီးခဲ့သော လက်နက်စနစ်အားလုံးကို ပြန်လည်တည်ဆောက်ထားပြီး စနစ်အသစ်များကိုလည်း နိုင်ငံအတွင်းသို့ တင်သွင်းထားသည်ဟု အီရန်စစ်တပ်က ဩဂုတ် ၂၆ ရက်တွင် ပြောကြားသည်။
အီရန်နိုင်ငံပိုင်ရုပ်သံ၏ ဖော်ပြချက်အရ "ပျက်စီးသွားတဲ့ စနစ်တွေအပါအဝင် စစ်တပ်ရဲ့ တပ်ဖွဲ့ခွဲပေါင်းစုံမှ လက်နက်စနစ်တွေကို ပြန်လည်တည်ဆောက်ပြီးဖြစ်သလို၊ စနစ်သစ်တွေကိုလည်းတင်သွင်းထားပြီး ဖြစ်ပါတယ်" ဟု အီရန်စစ်တပ်ပြောရေးဆိုခွင့်ရှိသူ မိုဟာမက်အာခရီမီနီယားက ပြောကြားခဲ့သည်။
၎င်းက "အမျိုးသားကာကွယ်ရေးစက်မှုဇုန်နဲ့ စစ်တပ်ကနေ စနစ်သစ်တွေ ရရှိထားသလို၊အချို့ကို ပြည်ပကနေတင်သွင်းထားတာကြောင့် ဒီစက်ပစ္စည်းကိရိယာတွေဟာ ကျွန်တော်တို့ရဲ့ တိုက်ခိုက်ရေးစွမ်းရည်ကို မြင့်တက်လာစေပါတယ်" ဟု ပြောကြားခဲ့သည်။
အမေရိကန်နှင့် အစ္စရေးတို့သည် ဖေဖော်ဝါရီ ၂၈ ရက်တွင် အီရန်အား အပြင်းအထန်ဗုံးကြဲတိုက်ခိုက်ခဲ့သဖြင့် အရှေ့အလယ်ပိုင်းစစ်ပွဲ စတင်ဖြစ်ပွားခဲ့ပြီး၊ အီရန်ဘက်ကလည်း ဒေသတွင်းလက်စား ချေတိုက်ခိုက်မှုများ ပြုလုပ်ခဲ့သည်။
ဧပြီ ၈ ရက် အပစ်အခတ်ရပ်စဲရေး သဘောတူညီချက်ကြောင့် ရက်ပေါင်း ၄၀ နီးပါး ကြာမြင့်ခဲ့သည့် ပြင်းထန်သော တိုက်ခိုက်မှုများ ရပ်တန့်သွားခဲ့သော်လည်း၊ မဟာဗျူဟာမြောက် ဟော်မုဇ်ရေလက်ကြား အနီးတဝိုက်တွင် ပြင်းထန်သောတိုက်ခိုက်မှုများ မကြာခဏ ဖြစ်ပွားနေသဖြင့် ရေရှည်ငြိမ်းချမ်းရေးစာချုပ် သဘောတူညီချက်ရရှိရန် မျှော်လင့်ချက်များ မှေးမှိန်လျက်ရှိသည်။
"ရန်သူ့လက်ချက်ကြောင့် ပျက်စီးသွားတဲ့ စနစ်တွေကို ပြန်လည်ပြင်ဆင်တာ၊ပြန်လည်ဖြန့်ကြက်တာတွေနဲ့ ပတ်သက်လို့ ကျွန်တော်တို့ အလေးအနက် ဆောင်ရွက်ခဲ့ပါတယ်" ဟု အီရန်စစ်တပ်ပြောရေး ဆိုခွင့်ရှိသူက ပြောကြားခဲ့ပြီး လက်ရှိတွင် မိမိတို့နိုင်ငံ၏ စစ်ရေးမူဝါဒကို ခံစစ်မှ ထိုးစစ်ဆင်သည့် မူဝါဒသို့ ပြောင်းလဲလိုက်ပြီဟုဖြည့်စွက် ပြောကြားခဲ့သည်။
"နိုင်ငံတကာဥပဒေနဲ့ ကုလသမဂ္ဂ ပဋိညာဉ်တို့ကို အခြေခံပြီး ကြိုတင်ကာကွယ်တဲ့အနေနဲ့ စတင်တိုက်ခိုက်တာဟာ တရားဝင်တဲ့ လုပ်ဆောင်ချက်တစ်ခု ဖြစ်ပါတယ်။ ဒါပေမဲ့အဲဒီလိုလုပ်ဆောင်ရာမှအချိုးအစား ညီမျှမှုနဲ့ လိုအပ်ချက်ဆိုင်ရာ စည်းမျဉ်းတွေနဲ့ အညီလိုက်နာဆောင်ရွက်ရမှာဖြစ်ရပါမယ်" ဟု ၎င်းက ဆက်လက်ပြောကြားခဲ့သည်။
■ Ref:AFP
■ AFP photos
