ရန်ကုန်- မန္တလေးအမြန်လမ်းမကြီးပေါ်တွင် လူတစ်ဦးကို တိုက်မိပြီး ဆက်လက်မောင်းနှင်သည့် အဝေးပြေးယာဥ်လိုင်းတစ်ခုမှ ယာဥ်မောင်းကို ဖမ်းမိ

ရန်ကုန်- မန္တလေးအမြန်လမ်းမကြီးပေါ်တွင် လူတစ်ဦးကို တိုက်မိပြီး ဆက်လက်မောင်းနှင်သည့် အဝေးပြေးယာဥ်လိုင်းတစ်ခုမှ ယာဥ်မောင်းကို ဖမ်းမိခဲ့ကြောင်း အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ထံမှ သိရသည်။

ဖြစ်စဥ်မှာ စက်တင်ဘာ ၁၅ ရက် ၀၀:၃၀ နာရီခန့် ၊ ရန်ကုန် -မန္တလေးအမြန်လမ်း မိုင်တိုင် ၁၇၇/၇-၁၇၈/၀ကြား (နေပြည်တော်မှရန်ကုန်ဘက်သို့) (အပြန်လမ်း)တွင် ယာဉ်မောင်း ၊အမည်၊နေရပ်လိပ်စာ ယာဉ်အမျိုးအစား (စုံစမ်းဆဲ)ယာဉ်ဖြင့် တိုက်မိကာ အမည်၊ နေရပ်လိပ်စာ(စုံစမ်းဆဲ) အသက် (၄၅)နှစ်ခန့် အမျိုးသား တစ်ဦးမှာ အမြန်လမ်းမကြီးပေါ်တွင် ဖြတ်သန်းသွားလာစဉ် (စုံစမ်းဆဲ)ယာဉ်ဖြင့် တိုက်မိပြီး လမ်းအလယ်တွင် လဲကျ သေဆုံးလျက်ရှိရာ ၎င်းအားတိုက်မိသည့်ယာဉ်မှာ နီးစပ်ရာ အမြန်လမ်းမကြီးရဲတပ်ဖွဲ့စခန်း/ရဲကင်းသို့ သတင်းပို့ခြင်းမရှိဘဲ ရန်ကုန်ဘက်သို့ ဆက်လက်မောင်းနှင် သွားကြောင်း စစ်ဆေးတွေ့ရှိခဲ့ရပါသည်ဟု သိရသည်။

ထိုသို့ လူတစ်ဦးကို တိုက်မိပြီးနောက် ဆက်လက်မောင်းနှင်နေသည့်ယာဥ်ကို ဖြူးတိုးဂိတ်တွင် ဖမ်းဆီးရမိခဲ့သည်ဟု သိရသည်။

ဖြူးတိုးဂိတ်တွင် YUTONG အမျိုးအစား ဝါ/လိမ္မော်/အနီရောင် “စွမ်းထက်သာ” ခရီးသည်တင်(Express) ယာဉ်သည် ဖြူးတိုးဂိတ်အရောက်၌ သက်ဆိုင်ရာ အဖွဲ့များမှ ကားလေကာမှန်ကွဲ၊ ညာဘက်မီးလုံးကွဲနေသဖြင့် မသင်္ကာဖွယ်ရာတွေ့ရှိသောကြောင့် စစ်ဆေးရာ ယာဉ်မောင်းမှာ မိုင်တိုင် ၁၇၇/၇-၁၇၈/၀ကြား (နေပြည်တော်မှရန်ကုန်ဘက်သို့) (အပြန်လမ်း)တွင် လမ်းလျှောက်နေသော လူတစ်ဦးအား တိုက်မိခဲ့ ကြောင်း ယာဥ်မောင်း အောင်ချိုဆိုသူက ဝန်ခံထွက်ဆိုခဲ့သည်ဟု သိရသည်။

အမြန်လမ်းမကြီးများ ဥပဒေ အခန်း (၇) ၊ ပုဒ်မ (၁၃) အရ "တည်ဆဲဥပဒေ တစ်ရပ်ရပ်တွင် မည်သို့ပင်ပါရှိစေကာမူ အမြန်လမ်းမကြီးပေါ်တွင် မောင်းနှင်ခွင့်မပြုသည့် မော်တော်ယာဉ်၊ လှည်းနှင့် ဖြတ်သန်းသွားလာခွင့် မပြုသည့် အခြားယာဉ်များ မောင်းနှင်ခြင်း သို့မဟုတ် ရပ်နားခြင်း၊ လူ၊ တိရစ္ဆာန်များ ဖြတ်သန်းသွားလာခြင်းကြောင့် လူနှင့် ပစ္စည်းထိခိုက်မှု သို့မဟုတ် သေဆုံးမှုဖြစ်ပေါ်ပါက ဥပဒေနှင့်အညီ ယာဉ်စည်းကမ်းလမ်းစည်းကမ်းလိုက်နာ၍ မောင်းနှင်သည့် မော်တော်ယာဉ်၏ ယာဉ်မောင်းတွင် တာဝန်မရှိစေရ။" ဟု​ဖော်ပြထား​သော်လည်း အမြန်လမ်း​ပေါ်တွင်ယာဥ်တိုက်မှုဖြစ်စဥ် ဖြစ်ပွားပါက အမြန်လမ်းမကြီးရဲတပ်ဖွဲ့၏ စစ်​ဆေးမှုကိုခံယူအတည်ပြုရန် လိုအပ်သည်ဟု သိရသည်။

လူ/​စက်ဘီး/​ထော်လာဂျီ/လှည်းစသည်တို့ကိုတိုက်မိပါက ၎င်းအတိုက်ခံရသူများသည် အမြန်လမ်းမကြီးများဥပ​ဒေကို​ဖောက်ဖျက်သူ မှန်/မမှန် နှင့် ယာဥ်​မောင်းသည် ဥပ​ဒေနှင့်အညီ ယာဥ်စည်းကမ်း လမ်းစည်းကမ်းလိုက်နာ၍​မောင်းနှင်သူ ဟုတ်/မဟုတ်တို့ကို အမြန်လမ်းမကြီးရဲတပ်ဖွဲ့က စစ်​ဆေးအတည်ပြုမည်ဖြစ်ကြောင်း၊ စည်းကမ်းလိုက်နာပါလျက် မ​တော်တဆယာဥ်တိုက်မှုကျူးလွန်မိသူယာဥ်​မောင်းမှာ အမြန်လမ်းမကြီးများဥပ​ဒေ၏ အကာအကွယ်ကိုခံစားရမည်ဖြစ်ကြောင်း၊ ယာဥ်တိုက်မှုကိုတိမ်း​ရှောင်ထွက်​ပြေးပါက အမြန်လမ်းမကြီးများဥပ​ဒေ၏အကာအကွယ်ကို မရရှိ​တော့ဘဲ အခြားလမ်းများတွင်ဖြစ်ပွား​သောယာဥ်တိုက်မှုကဲ့သို့ ပြစ်မှုပြစ်ဒဏ်များ ကျခံရမည်ဖြစ်​ကြောင်းအထူးသတိ​ပေးအပ်သည်ဟု အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ထံမှ သိရသည်။

ထိုသို့ယာဥ်တိုက်မှုဖြစ်ပွားစဥ်ယာဥ်ကိုရပ်တန့်၍ အမြန်လမ်းမကြီးရဲတပ်ဖွဲ့သို့ သတင်းပို့အစစ်​ဆေးခံရန်ပျက်ကွက်ခဲ့​သော ယာဥ်​မောင်း ​အောင်ချိုအား ဥပ​ဒေပုဒ်မ ၃၀၄(က)/၂၀၂ ဖြင့် တရားစွဲဆိုခဲ့ကြောင်း၊အမြန်လမ်း​ပေါ်တွင် ယာဥ်တိုက်မှုဖြစ်ပွားပါက နီးစပ်ရာအမြန်လမ်းမကြီးရဲတပ်ဖွဲ့ရဲကင်း/ရဲစခန်းများသို့မဖြစ်မ​နေ အမြန်သတင်းပို့ရန် သတိ​ပေးတိုက်တွန်းအပ်ကြောင်း သိရသည်။