ရေဘေးသင့် လေးမျက်နှာမြို့နယ်ရှိ အိုင်သပြုအ.ထ.က ၌ တက္ကသိုလ်ဝင်တန်းဖြေဆိုမည့် ကျောင်းသား/သူများအား နေ့ညစနစ်ဖြင့် ကျောင်းပြန််လည်စတင်ဖွင့်လှစ်ပြီဖြစ်ကြောင်း သိရသည်။
တစ်လကျော်ကြာ ယာယီကျောင်းပိတ်ခဲ့ရပြီးနောက် စက်တင်ဘာ ၁၅ ရက်နေ့တွင် ပြန်လည်ဖွင့်လှစ်ခဲ့ခြင်းဖြစ်သည်။
“၁၅ ရက်နေ့ကစပြီး grade-12 ကျောင်းသားကျောင်းသူများအတွက် နေ့ရောညရော ကျောင်းပြန်ဖွင့်ပေးနေပါပြီ။ ကျောင်းသား/သူဦးရေကတော့ ဒီနေ့(စက်တင်ဘာ ၁၆)ဆိုရင် (၁၄၁)ဦးရှိပါပြီ။ သင်ကြားတဲ့ဘာသာပြ(၁၇)ဦးနဲ့ တာဝန်ပေးထားတဲ့ နောက်ထပ်(၁၀)ဦး စုစုပေါင်း(၂၇)ဦး အလှည့်ကျတာဝန်ယူဆောင်ရွက်ပေးနေပါတယ်။ ကျောင်းအကျိုးတော်ဆောင်တွေ၊ ဒီမှာရှိတဲ့အဖွဲ့အစည်းတွေနဲ့အတူပူးပေါင်းပြီး ချက်ရေးပြုတ်ရေးကအစ အကုန်လုံးစီစဉ်ဆောင်ရွက်ပေးလျက်ရှိပါတယ်။ နေထိုင်ရေးရော စားသောက်ရေးပါ ဆောင်ရွက်ပေးထားတာပါ။ ပညာရေးအထက် ဌာနတာဝန်ရှိသူတွေကလည်း ကူညီထောက်ပံ့ပေးပါတယ်။ ကလေးတွေ ရေဘေးအန္တရာယ်ဖြစ်မှာစိုးတဲ့အတွက် ပြန်မလွှတ်တော့ဘဲ Day ရော Night ရော ကျောင်းအကျိုးတော်ဆောင်တွေနဲ့ အားလုံးစုပေါင်းပြီး တာဝန်ယူဆောင်ရွက်ပြီး ဖွင့်လှစ်ပေးနေခြင်းဖြစ်ပါတယ်”ဟု အိုင်သပြု အ.ထ.က မှ ကျောင်းအုပ်ဆရာကြီးက ဖြေကြားသည်။
ရေကြီးနစ်မြုပ်မှုကြောင့် အိုင်သပြု အ.ထ.က ၌ ကျောင်းအုတ်တံတိုင်း ပေ(၃၀၀) ကျော်နှင့် ကျောင်းတွင်းလမ်းများပျက်စီးမှုရှိခဲ့ကြောင်း သိရသည်။
“တာအခြေအနေကို (၃၀)ရက်နေ့က သတင်းကြားတယ်။ မြို့နယ်ပညာရေးမှူးက (၃၁)ရက်နေ့မှာ ကျောင်းတွေကို ယာယီပိတ်တဲ့အကြောင်း ကြေငြာပေးခဲ့တယ်။ ကလေးတွေ အားလုံး ဘေးကင်းခဲ့ပါတယ်။ ယာယီကျောင်းပိတ်ခဲ့ရတာ (၃၄)ရက်လောက်ရှိခဲ့တယ်။ တက္ကသိုလ်ဝင်တန်း အောင်ချက်မြင့်မားရေးကို ဦးတည်ပြီး စတင်ပြန်လည်ဖွင့်လှစ်ပေးခြင်းဖြစ်ပါတယ်။ ကျန်တဲ့အတန်းတွေကိုလည်း ရေဘေးအန္တရာယ်ကင်းတာနဲ့ အဆင့်ဆင့်ဆက်လက်ဖွင့်လှစ်ပေးနိုင်ဖို့ စီစဉ်နေပါတယ်”ဟု ကျောင်းအုပ်ဆရာကြီးက ဆက်လက်ဖြေကြားသည်။
အိုင်သပြု အ.ထ.က ၌ Grade (6)မှ Grade (12)အထိ ကျောင်းသား/သူဦးရေ (၁၀၅၉)ဦးရှိပြီး ယခုအခါ တက္ကသိုလ်ဝင်တန်းကျောင်းသား/သူများအား စတင်ဖွင့်လှစ်ပေးခဲ့ခြင်းဖြစ်ကြောင်း သိရသည်။
