မန္တလေးမြို့တွင် MNBC ၂၀၂၅ ကို စတင်ကျင့်သုံးလျက်ရှိပြီး ယင်းစံချိန်စံညွှန်းသတ်မှတ်ချက်များအတိုင်း ဆောက်လုပ်နေသည့်အဆောက်အအုံများကို စစ်ဆေးနေကြောင်း မြို့တော်ဝန်ဦးခင်မောင်အေး၏ ပြောကြားချက်အရ သိရသည်။
မန္တလေးမြို့တော်စည်ပင်သာယာရေးကော်မတီ၊ မြန်မာနိုင်ငံအင်ဂျင်နီယာအသင်းချုပ်၊ မြန်မာနိုင်ငံအင်ဂျင်နီယာအသင်းခွဲ မန္တလေး(မန္တလေးတိုင်းဒေသကြီး) တို့ ပူးပေါင်းကျင်းပသည့် နည်းပညာနှင့်ဥပဒေကြောင်းဆိုင်ရာ ဟောပြောဆွေးနွေးပွဲကို အောက်တိုဘာ ၁၁ ရက်နေ့က မြို့တော်ခန်းမတွင် ကျင်းပခဲ့ခြင်းဖြစ်သည်။
ယင်းအခမ်းအနားသို့ မန္တလေးမြို့တော်ဝန်ဦးခင်မောင်အေး၊ မြန်မာနိုင်ငံအင်ဂျင်နီယာအသင်းခွဲ မန္တလေး(မန္တလေးတိုင်းဒေသကြီး)ဥက္ကဋ္ဌ ဦးရွှေဇင်တို့တက်ရောက်ခဲ့ကြပြီး ဒေါ်ခင်မေဌေး၊ဦးဇော်ဝင်း၊ ဦးကျော်သူဝင်းတို့က ခေါင်းစဉ်အသီးသီးဖြင့် ရှင်းလင်းတင်ပြခြင်းတို့ ပြုလုပ်ခဲ့ကြသည်။
အခမ်းအနားတွင် မန္တလေးမြို့တော်ဝန်ဦးခင်မောင်အေးက " MNBC ၂၀၂၅ ကို ကျင့်သုံးနေပါပြီ။ စံချိန်စံညွှန်းသတ်မှတ်ချက်တွေထွက်လာပြီးကတည်းက အဲဒီစံချိန်စံညွှန်းသတ်မှတ်ချက်တွေကိုင်ပြီး လက်ရှိဆောက်လုပ်နေတဲ့အဆောက်အအုံတွေကို စစ်ဆေးပြီးတော့ ဒီဟာနဲ့အညီဆောင်ရွက်ဖို့ လမ်းညွှန်ချက်တွေပေးနေပါတယ်။လောလောဆယ်တော့ ဥပဒေအရအရေးယူဆောင်ရွက်ဖို့ ကြီးကြီးမားမားဖောက်ဖျက်မှုတွေမရှိပါဘူး။ ကျွန်တော်တို့သတိပေးဆုံးမတယ်။လိုက်နာမှုမရှိတဲ့ဟာတွေကို ပြုပြင်ပေးတယ်။" ဟု ပြောကြားခဲ့သည်။
မန္တလေးမြို့တော်စည်ပင်သာယာရေးကော်မတီ၏ခွင့်ပြုချက်မရှိဘဲ အဆောက်အအုံဆောက်လုပ်ခြင်း၊ ခွင့်ပြုထားသည့် အဆောက်အအုံပုံစံဖြင့်ကွဲလွဲပြီး ဆောက်လုပ်ခြင်း၊ ခွင့်ပြုချက်မရမီ ကြိုတင်ဆောက်လုပ်ခြင်း၊ သတ်မှတ်ဧရိယာထက်ပိုမိုဆောက်လုပ်ခြင်းစသည်များကို တားမြစ်ထားရာ ခွင့်ပြုချက်မရှိဘဲဖြစ်စေ၊ ခွင့်ပြုချက်ပါ စည်းကမ်းချက်များနှင့် မညီဘဲဖြစ်စေ ဆောက်လုပ်ထားသည့် အဆောက်အအုံများကို ရပ်ဆိုင်းစေခြင်း၊ ပြန်လည်ပြုပြင်စေခြင်း၊ ဖျက်သိမ်းစေခြင်းစသည့် အရေးယူမှုများဆောင်ရွက်သွားမည် ဟုလည်း မြို့တော်ဝန်ဦးခင်မောင်အေးက ဖြည့်စွက်ပြောကြားခဲ့သည်။
ဟောပြောပွဲတွင် Soil Investigation , Public Safety, Environmental Safety နှင့် PE, RSE, RE များ၏ တာဝန်များနှင့်ပတ်သက်ပြီး ဆွေးနွေးရုံသာမက မန္တလေးမြို့တော်စည်ပင်သာယာရေးကော်မတီ နယ်နိမိတ်အတွင်းတည်ဆောက်ရေးလုပ်ငန်းများဆောင်ရွက်ကြသည့် အင်ဂျင်နီယာများ လိုက်နာ ဆောင်ရွက်ရမည့် ဆောက်လုပ်မှုကဏ္ဍဖွံ့ဖြိုးတိုးတက်ရေးဥပဒေ၊ မန္တလေးမြို့တော်စည်ပင်သာယာရေး ကော်မတီမှ ပြဋ္ဌာန်းထားသည့် အဆောက်အအုံဆိုင်ရာ ဥပဒေ၊ နည်းဥပဒေများနှင့် စည်းမျဉ်းစည်းကမ်းများ အပြင် Myanmar National Building Code (MNBC) 2025 ကို အဓိကထားပြီး မျှဝေပေးခြင်း၊ ဒေသအာဏာပိုင် အဖွဲ့အစည်းကထုတ်ပြန်ထားသည့် ဥပဒေ၊နည်းဥပဒေ၊စည်းမျဉ်းစည်းကမ်း၊ လုပ်ထုံးလုပ်နည်း၊အမိန့်နှင့်ညွှန်ကြားချက်များကိုလည်း အင်ဂျင်နီယာပညာရှင်များ အနေဖြင့် ပိုမိုသိရှိနားလည်ပြီး လက်တွေ့လုပ်ငန်းများတွင် ပိုမိုစနစ်တကျအကောင်အထည် ဖော်လိုက်နာ ဆောင်ရွက်နိုင်ရန်အတွက် ရည်ရွယ်ပြီး အခမ်းအနားကျင်းပရခြင်းဖြစ်ကြောင်း သိရသည်။
