သမ္မတရှယ်ယာထည့်ထားတဲ့ဘဏ် ဒေဝါလီခံသွားလို့ ပါရာဂွေးသမ္မတ ရာထူးကနုတ်ထွက်သွား

နိုဝင်ဘာ- ၆ ( သောကြာနေ့ ) 

ပါရာဂွေးသမ္မတ ဆန်တီယာဂိုပီနား ဟာ သူနဲ့ အစိုးရအဖွဲ့တို့ ကျောထောက်နောက်ခံပြုပေးထားတဲ့ ငွေချေးလုပ်ငန်းကြီးတစ်ခု ပြိုလဲပျက်စီးသွားခဲ့ပြီးနောက် လူထုဆန္ဒပြပွဲတွေ ကျယ်ကျယ်ပြန့်ပြန့် ပေါ်ပေါက်လာခဲ့တဲ့အတွက် ရာထူးကနေ နုတ်ထွက်သွားခဲ့ပါပြီ။

သမ္မတ ပီနား ဟာ ကြာသပတေးနေ့က ဗီဒီယိုမိန့်ခွန်းတစ်ခု ပြောကြားပြီး ရာထူးကနေ နုတ်ထွက်ကြောင်း ကြေညာခဲ့တာဖြစ်ပြီး "နိုင်ငံရဲ့ တည်ငြိမ်အေးချမ်းရေး၊ လူမှုရေး ငြိမ်းချမ်းမှုနဲ့ ကျွန်ုပ်တို့ရဲ့ ဒီမိုကရေစီ အဖွဲ့အစည်းတွေကို ဆက်လက်ထိန်းသိမ်းဖို့ လိုအပ်ချက်တို့ကို ဦးထိပ်ထားလျက်" ရာထူးကနေ ဆင်းပေးတာဖြစ်ကြောင်း ပြောကြားခဲ့ပါတယ်။ ကြာသပတေးနေ့ အစောပိုင်းမှာတော့ ပီနား ဟာ သူရဲ့ လက်ယာစွန်း ကော်လိုရာဒို ပါတီရဲ့ ထောက်ခံမှုကို လက်လွှတ်ခဲ့ရပြီး အတိုက်အခံတွေရဲ့ စွပ်စွဲပြစ်တင်မှု ကိုလည်း ခံရမယ့် အန္တရာယ်နဲ့ ရင်ဆိုင်ခဲ့ရပါတယ်။

ပါရာဂွေးဗဟိုဘဏ်က ယူအီနိုဘဏ်ကို အုပ်ချုပ်မှုအောက် ထည့်သွင်းလိုက်လို့ သုံးစွဲသူ သုံးသန်းကျော် ငွေထုတ်လို့မရ ဖြစ်သွားပြီးနောက်၊ ဗုဒ္ဓဟူးနေ့မှာ အဆွန်စီယွန်  မြို့လမ်းမတွေပေါ်မှာ ဆန္ဒပြပွဲတွေကနေ အကြမ်းဖက်မှုအဖြစ် ပြောင်းလဲလာခဲ့ပါတယ်။ ယူအီနိုဘဏ်ဟာ ၂၀၂၃ ခုနှစ်ကတည်းက စတင်လည်ပတ်ခဲ့တဲ့ သက်တမ်းနု ကုမ္ပဏီတစ်ခု ဖြစ်ပေမဲ့၊ သူတို့ရဲ့ ဝဘ်ဆိုဒ် ဖော်ပြချက်အရ ပါရာဂွေးနိုင်ငံသား သုံးပုံနှစ်ပုံကို ဝန်ဆောင်မှုပေးနေတဲ့ ဘဏ်တစ်ခု ဖြစ်ပါတယ်။

အပ်နှံသူတွေကို ကာကွယ်ဖို့နဲ့ ငွေကြေးတည်ငြိမ်မှုကို ထိန်းသိမ်းဖို့ ဥပဒေအရ လိုအပ်တဲ့ အရင်းအနှီးရဲ့ တစ်ဝက်တောင် မရှိတော့ဘူးလို့ ဗဟိုဘဏ်က ကြေညာခဲ့ပါတယ်။ ဒါကြောင့် အကျပ်အတည်းနဲ့ ကြုံလာရပြီး အပ်ငွေတွေ ပြန်ပေးနိုင်မယ့် ဥပဒေကြမ်းတစ်ခုကို အမြန်ဆုံး တင်သွင်းခဲ့ရကာ၊ အဲဒီအစီအစဉ်က ထိခိုက်ခံစားရတဲ့ သုံးစွဲသူတွေရဲ့ ၉၈ ရာခိုင်နှုန်းကို အကာအကွယ်ပေးနိုင်လိမ့်မယ်လို့ သူက ပြောကြားခဲ့ပါတယ်။

ဒါပေမဲ့ ဘဏ်နဲ့ပတ်သက်နေတဲ့ သမ္မတ ပီနား ရဲ့ ကိုယ်ရေးကိုယ်တာ ပတ်သက်မှုတွေက ပြည်သူတွေရဲ့ ဒေါသကို ပိုပြီး တောက်လောင်စေခဲ့ပါတယ်။ သူဟာ ရာထူးစတင်ထမ်းဆောင်ပြီး နှစ်နှစ်အကြာ ၂၀၂၅ ခုနှစ်အထိ ယူအီနိုဘဏ် ရဲ့ မိခင်ကုမ္ပဏီမှာ ရှယ်ယာရှင်တစ်ဦး ဖြစ်ခဲ့ပြီး၊ ပါရာဂွေးနိုင်ငံရဲ့ နိုင်ငံတော် ပင်စင်နဲ့ ကျန်းမာရေးရန်ပုံငွေနဲ့ ဆက်စပ်နေတဲ့ ဒေါ်လာ သန်း ၃၈၀ ခန့်အပါအဝင် ခန့်မှန်းခြေ အများပြည်သူရန်ပုံငွေ ဒေါ်လာ သန်း ၈၀၀ ကနေ ၈၅၀ ကြားကို ဘဏ် ရဲ့ အကောင့်တွေထဲမှာ ထည့်သွင်းထားခဲ့ပါတယ်။ ရာထူးစတင်ပြီး နှစ်ပတ်တောင် မပြည့်ခင်မှာပဲ ယူအီနိုဘဏ် ရဲ့ ရှေ့ပြေးကုမ္ပဏီဟောင်းရဲ့ ဥက္ကဋ္ဌဟောင်းဖြစ်တဲ့ ကားလို့ကာဗယ်ဟို ကို ဗဟိုဘဏ်ရဲ့ အကြီးအကဲအဖြစ် ပီနား က ခန့်အပ်ခဲ့ပါတယ်။

ဆန္ဒပြသူတွေနဲ့ အတိုက်အခံ လွှတ်တော်အမတ်တွေကတော့ ပီနား ဟာ အကျိုးစီးပွားချင်း ပဋိပက္ခဖြစ်မှုတွေ ရှိနေတာ၊ ပြည်သူ့ရန်ပုံငွေတွေကို အလွဲသုံးစားလုပ်ခဲ့တာနဲ့ ယူအီနိုဘဏ် ရဲ့ ငွေကြေးဆိုင်ရာ အခြေအနေ သတိပေးချက်တွေကို ဖုံးကွယ်ခဲ့တာတွေ လုပ်ဆောင်ခဲ့တယ်လို့ စွပ်စွဲခဲ့ကြပါတယ်။

REF: RT

#News #Myanmar