နိုဝင်ဘာ - ၇ ( စနေနေ့ )
ရုရှားသမ္မတ ဗလာဒီမာ ပူတင်က ယူကရိန်းပဋိပက္ခကို ဖြေရှင်းဖို့အတွက် သုံးပွင့်ဆိုင် ညှိနှိုင်းဆွေးနွေးပွဲ အသစ်တစ်ခုကို လာမယ့်တစ်ပတ်မှာ ယူအေအီးနိုင်ငံ အဘူဒါဘီ မှာ ကျင်းပဖို့ ရှိတယ်လို့ ဆိုပါတယ်။
ဒီအကြောင်းအရာတွေကို ပူတင်က သောကြာနေ့တုန်းက ရုရှားလုံခြုံရေးကောင်စီဝင်တွေနဲ့ တွေ့ဆုံစဉ်မှာ ထည့်သွင်းပြောကြားခဲ့တာပါ။ အမေရိကန် အထူးကိုယ်စားလှယ် စတိဗ် ဝစ်ကော့ဖ် ကလည်း ရုရှား၊ အမေရိကန်နဲ့ ယူကရိန်း ကိုယ်စားလှယ်တွေဟာ နိုဝင်ဘာ ၁၀ ရက်နဲ့ ၁၁ ရက် မှာ တွေ့ဆုံကြမယ်လို့ ဒီတစ်ပတ်အစောပိုင်းကတည်းက ကြေညာထားခဲ့ပြီးသား ဖြစ်ပါတယ်။
"အင်္ဂါနေ့မှာ ယူကရိန်းဆိုင်ရာ သုံးပွင့်ဆိုင် ဆွေးနွေးပွဲတွေကို ယူအေအီးနိုင်ငံမှာ စတင်ဖို့ ရှိတယ်" လို့ ပူတင်က ပြောကြားခဲ့ပြီး၊ အဲဒီ ညှိနှိုင်းဆွေးနွေးပွဲတွေမှာ ပါဝင်ကြမယ့် တာဝန်ရှိသူတွေကိုလည်း ကြိုတင်ပြင်ဆင်မှုတွေ ဆွေးနွေးဖို့ ဖိတ်ကြားထားတယ်လို့ ဆိုပါတယ်။
ကရင်းမလင်း အစိုးရ ဝက်ဘ်ဆိုက် သတင်းထုတ်ပြန်ချက်အရ သောကြာနေ့ အစည်းအဝေးကို တက်ရောက်လာကြသူတွေထဲမှာ သမ္မတအကြံပေးတွေဖြစ်တဲ့ ဗလာဒီမာ မီဒင်စကီနဲ့ ယူရီ အူရှာကော့ဖ်၊ ဒုတိယဝန်ကြီးချုပ် ဒီမီထရီ ပက်ထရူရှက်၊ ဒုတိယ နိုင်ငံခြားရေးဝန်ကြီးတွေဖြစ်တဲ့ မီခေးလ် ဂาရူကာဇင်နဲ့ ဆာဂျေ ရစ်ယာ့ဘ်ကော့ဖ်၊ စစ်ဘက်ဆိုင်ရာ ထောက်လှမ်းရေးအကြီးအကဲ အီဂོ ကော့စကျူကော့ဗ်နဲ့ စစ်ဦးစီးချုပ်ရုံးရဲ့ အဓိက စစ်ဆင်ရေးဌာန ဒုတိယအကြီးအကဲ ယူရီ ဇီဂါလိုဗ်စကီးတို့ ပါဝင်မယ်လို့သိရပါတယ်။ ဒါပေမဲ့လည်း ဒီဆွေးနွေးပွဲတွေအတွက် ရုရှားဘက်က ကိုယ်စားလှယ်အဖွဲ့ဝင် အပြည့်အစုံကိုတော့ ကရင်းမလင်းက အပြီးသတ် ထုတ်ပြန်ကြေညာတာမျိုး မရှိသေးပါဘူး။
ကရင်းမလင်း ပြောရေးဆိုခွင့်ရှိသူ ဒီမီထရီ ပက်စကော့ဖ်ကတော့ ဒီတစ်ပတ်အစောပိုင်းကတည်းက မီဒင်စကီဟာ ရုရှားကိုယ်စားလှယ်အဖွဲ့ကို ဦးဆောင်သွားမယ်လို့ ပြောကြားထားခဲ့ပါတယ်။ မီဒင်စကီဆိုတာကတော့ ၂၀၂၂ ခုနှစ်တုန်းက တူရကီနိုင်ငံမှာ ကျင်းပခဲ့တဲ့ ယူကရိန်းနဲ့ ပဏာမ ဆွေးနွေးပွဲတွေအပြင် ၂၀၂၅ ခုနှစ် အစောပိုင်းမှာ သမ္မတ ဒေါ်နယ်ထရမ့် အိမ်ဖြူတော်ကို ပြန်လည်ရောက်ရှိလာပြီးနောက်ပိုင်း စတင်ခဲ့တဲ့ အမေရိကန်ရဲ့ ကြားဝင်စေ့စပ်မှုပါတဲ့ ငြိမ်းချမ်းရေး ညှိနှိုင်းဆွေးနွေးပွဲ အဆင့်ဆင့်မှာလည်း ရုရှားကိုယ်စားလှယ်အဖွဲ့ကို ဦးဆောင်ခဲ့ဖူးတဲ့ ဝါရင့်ညှိနှိုင်းရေးမှူး တစ်ဦး ဖြစ်ပါတယ်။
အမေရိကန်သံတမန် ဝစ်ကော့ဖ်ကတော့ အလုပ်သဘော ဆွေးနွေးပွဲတွေဟာ "စစ်ပွဲအလွန် လုံခြုံရေး စီမံချက်တွေ၊ ပဋိပက္ခ လျှော့ချရေး၊ လူသားချင်းစာနာထောက်ထားမှုဆိုင်ရာ ကြိုးပမ်းအားထုတ်မှုတွေနဲ့ ငြိမ်းချမ်းရေးဆီသို့ နောက်တစ်ဆင့်တက်လှမ်းဖို့" စတာတွေကို အဓိကထား ဆွေးနွေးသွားမှာ ဖြစ်တယ်လို့ ပြောကြားခဲ့ပါတယ်။
REF: RT
#News #Myanmar
