လှိုင်သာယာ (အနောက်ပိုင်း) မြို့နယ်ရှိ Grand Hlaing Thar Yar တန်ဖိုးသင့်အိမ်ရာ စီမံကိန်းဖွင့်လှစ်ပြီး အခန်းများ အပ်နှံ

လှိုင်သာယာ (အနောက်ပိုင်း) မြို့နယ်ရှိ Grand Hlaing Thar Yar တန်ဖိုးသင့်အိမ်ရာ စီမံကိန်းဖွင့်လှစ်ပြီး အခန်းများ အပ်နှံကြောင်း သိရသည်။

ရန်ကုန်တိုင်းဒေသကြီးအစိုးရအဖွဲ့နှင့် MYANMAR ART COMPANY LIMITED တို့မှ ပူးပေါင်း အကောင်အထည်ဖော် ဆောင်ရွက်သည့် Grand Hlaing Thar Yar တန်ဖိုးသင့်အိမ်ရာစီမံကိန်းဖွင့်ပွဲနှင့် အခန်းအပ်နှံခြင်း အခမ်းအနားကို နိုဝင်ဘာ ၉ ရက် နံနက် ၁၀ နာရီက ရန်ကုန်တိုင်းဒေသကြီး၊ အင်းစိန်ခရိုင်၊ လှိုင်သာယာ (အနောက်ပိုင်း) မြို့နယ်၊ ဗိုလ်အောင်ကျော်လမ်းနှင့် ကျန်စစ်သားလမ်းကြား၊ ပေါင်းကူးလမ်းရှိ အဆိုပါဝင်းအတွင်းတွင် ကျင်းပခဲ့ကြောင်း သိရသည်။

အဆိုပါအခမ်းအနားသို့ ရန်ကုန်တိုင်းဒေသကြီး ဝန်ကြီးချုပ် ဦးအောင်နိုင်သူ၊ တိုင်းဒေသကြီး ဝန်ကြီးများ၊ ဌာနဆိုင်ရာ တာဝန်ရှိသူများ၊ Myanmar Art Construction And Development Co.,Ltd ၏ Managing Director ဦးကျော်စွာဟိန်း နှင့် တာဝန်ရှိသူများ၊ ဖိတ်ကြားထားသည့် ဧည့်သည် တော်များ၊ ပြည်သူများနှင့် တာဝန်ရှိသူများ တက်ရောက်ကြကြောင်း သိရသည်။

Myanmar Art Construction And Development Co.,Ltd ၏ Managing Director ဦးကျော်စွာဟိန်း က စီမံကိန်းဆိုင်ရာများကို ရှင်းလင်းတင်ပြခဲ့သည်။

ယင်းနောက် ရန်ကုန်တိုင်းဒေသကြီး ဝန်ကြီးချုပ် ဦးအောင်နိုင်သူနှင့် စည်ပင်သာယာရေးဝန်ကြီး ဦးမျိုးမြင့်အောင်တို့က အိမ်ရာစီမံကိန်းတွင် နေရာချထားမည့် အခန်းပိုင်းရှင်များအား နေထိုင်ခွင့်လက်မှတ်များနှင့် အခန်းသော့များကို ပေးအပ်ခဲ့သည်။

ထို့နောက် ရန်ကုန်တိုင်းဒေသကြီး ဝန်ကြီးချုပ် ဦးအောင်နိုင်သူ၊ စည်ပင်သာယာရေးဝန်ကြီး ဦးမျိုးမြင့်အောင် နှင့် Myanmar Art Construction And Development Co.,Ltd ၏ Managing Director ဦးကျော်စွာဟိန်း တို့က Grand Hlaing Thar Yar တန်ဖိုးသင့်အိမ်ရာစီမံကိန်းအား ဖဲကြိုးဖြတ်၍ ဖွင့်လှစ်ပေးကြောင်း သိရသည်။

ထို့နောက် ရန်ကုန်တိုင်းဒေသကြီး ဝန်ကြီးချုပ် ဦးအောင်နိုင်သူ နှင့် တာဝန်ရှိသူများက Grand Hlaing Thar Yar တန်ဖိုးသင့်အိမ်ရာစီမံကိန်းအတွင်း လှည့်လည်ကြည့်ရှုကြကြောင်း သိရသည်။