ဒေတာနှင့် သတင်းအချက်အလက် လုံခြုံရေး (IT Security) ကို အကြောင်းပြ၍ ဂျာမနီစစ်တပ်သည် လေ့ကျင့်ရေးအပါအဝင် တရုတ်နိုင်ငံထုတ် ဒရုန်းများကို အသုံးပြုခွင့် လုံးဝပိတ်ပင်လိုက်ပြီဖြစ်ပြီး ဥရောပထုတ် မော်ဒယ်များဖြင့် အစားထိုးလဲလှယ်သွားမည်ဖြစ်ကြောင်း ဂျာမနီကာကွယ်ရေးဝန်ကြီးဌာနက နိုဝင်ဘာလ ၁၁ ရက်နေ့တွင် ထုတ်ပြန်ကြေညာခဲ့သည်။
တရုတ်လုပ်ဒရုန်းများသည် စစ်ရေးလေ့ကျင့်မှုများ၊ လေ့ကျင့်ရေးကွင်းများနှင့် လက်နက်စနစ်များဆိုင်ရာ အချက်အလက်များကို တရုတ်ထောက်လှမ်းရေးဌာနများထံ ပေးပို့နိုင်သည်ဟူသော စိုးရိမ်ပူပန်မှုများကြောင့် ယခုကဲ့သို့ ဆုံးဖြတ်ခဲ့ခြင်းဖြစ်ကြောင်း Der Spiegel သတင်းမဂ္ဂဇင်းက ပထမဆုံး ဖော်ပြခဲ့သည်။
တပ်မတော် (Bundeswehr) အနေဖြင့် ယခင်က စစ်ရေးလေ့ကျင့်မှုများအတွက် "ဈေးနှုန်းချိုသာပြီး ဈေးကွက်ဝယ်ယူရလွယ်ကူသည့် ဒရုန်းများကို ဗျူရိုကရေစီယန္တရား လုပ်ထုံးလုပ်နည်း အနည်းငယ်သာသုံး၍" ဝယ်ယူသုံးစွဲခဲ့ကြောင်း ဝန်ကြီးဌာနက ဆိုသည်။
"ဂျာမနီစစ်တပ် (Bundeswehr) ၏ ကိုယ်ပိုင်ရပ်တည်နိုင်စွမ်းနှင့် နည်းပညာပိုင်းဆိုင်ရာ အချုပ်အခြာအာဏာကို ပိုမိုခိုင်မာအားကောင်းစေရန်အတွက် တရုတ်လုပ် မော်ဒယ်များကို ပစ်မှတ်ရှာဖွေရေးနှင့် လေ့ကျင့်ရေးကိစ္စရပ်များတွင် လုံးဝဆက်လက်အသုံးပြုတော့မည် မဟုတ်ပါ" ဟု အဆိုပါ ထုတ်ပြန်ချက်တွင် ဖော်ပြထားသည်။
Ref:AFP
