Eleven Media Group

လူမှုကွန်ရက်မသုံးကြောင်း Ballon d'Or ဆုရှင် မန်စီးတီးကွင်းလယ်ကစားသမား ရိုဒရီ ဖွင့်ဟ

Photos: Man City FC

၂၀၂၄ Ballon d'Or ဆုရှင်ဖြစ်သည့် မန်စီးတီးကွင်းလယ်ကစားသမား ရိုဒရီက ၎င်းအနေဖြင့် လူမှုကွန်ရက်မသုံးကြောင်း ပြောကြားခဲ့သည်။

လူမှုကွန်ရက်များမှာ နာမည်ကျော်များအတွက် ငွေအလွယ်တကူ ရနိုင်ပြီး စီရော်နယ်လ်ဒို၊ မက်ဆီတို့လို ကစားသမားများမှာ Post တစ်ခုအတွက် ဝင်ငွေများစွာ ရရှိနေကြောင်း သိရသည်။

သို့သော် တစ်ဖက်တွင်လည်း ဘောလုံးသမားများမှာ လူမှုကွန်ရက်တွင် ပရိသတ်များ၏ ဝေဖန်ဆဲဆိုမှုများနှင့် ရင်ဆိုင်နေရကြောင်း သိရှိရသည်။

ယင်းအတွက် ရိုဒရီက "လူမှုကွန်ရက်တွေကို ကျွန်တော် ရှောင်ပါတယ်။ အဲဒါတွေကို ကျွန်တော် မလိုပါဘူး။ လူမှုကွန်ရက်တွေက အချိန်ဖြုန်းခြင်းပဲလို့ ကျွန်တော်နားလည်ထားပါတယ်။ ဒါပေမဲ့ တခြားလူတွေသုံးတာကို ကျွန်တော့်အနေနဲ့ မကန့်ကွက်ပါဘူး"ဟု ဆိုခဲ့သည်။

မူရင်းသတင်း — Eleven Media Group