Eleven Media Group

ဒဏ်ရာရကစားသမားများနှင့် ပတ်သက်ပြီး ပြိုင်ဘက်နည်းပြများကို Mind Game ဆက်လက်ကစားသွားမည်ဟု အာဆင်နယ်နည်းပြ အာတီတာ ပြောကြား

Photo: The Guardian

အာဆင်နယ်နည်းပြ အာတီတာ က အသင်း၏ဒဏ်ရာရကစားသမားများနှင့်ပတ်သက်ပြီး ပြိုင်ဘက်နည်းပြများကို Mind Game ဆက်လက်ကစားသွားမည်ဖြစ်ကြောင်း ပြောကြားခဲ့သည်။

အာတီတာသည် လီဗာပူးလ်အသင်းနှင့် (၂-၂)ဂိုးဖြင့် သရေကျသည့်ပွဲတွင် ပွဲမတိုင်ခင်က ဒဏ်ရာပြဿနာကြောင့် ပါဝင်ရန်မသေချာဟုပြောကြားခဲ့သည့် တောင်ပံကစားသမား ဆာကာကို ပွဲထွက်စာရင်း၌ အံ့အားသင့်ဖွယ်အသုံးပြုသွားခဲ့သည်။

အာဆင်နယ်အသင်းအနေဖြင့် ပြိုင်ဘက်များထက် အသာရရန် အသင်းဒဏ်ရာရကစားသမားများနှင့်ပတ်သက်ပြီး အမှန်ပြောဆိုခြင်းမရှိကြောင်း ဗြိတိန်မီဒီယာများက ဖော်ပြနေကြသည်။

ယခုအခါ အာတီတာက ၎င်း၏ကစားသမားများနှင့်ပတ်သက်ပြီး ပြိုင်ဘက်နည်းပြများ ခန့်မှန်းရခက်အောင် ဆက်လက်လုပ်ဆောင်သွားမည်ဟု ပြောကြားခဲ့ခြင်းဖြစ်သည်။

"ဘယ်သူ့အတွက်မှ မလွယ်ကူစေချင်ပါဘူး။ ကျွန်တော်တို့နဲ့ ကစားမယ်ဆိုရင် ပြိုင်ဘက်တွေအနေနဲ့ အလုပ်လုပ်ဖို့၊ တွေးဖို့ လိုပါတယ်။ ပြိုင်ဘက်တွေအနေနဲ့ ကျွန်တော် အိမ်စာလုပ်သလို လုပ်ရမှာပါ။ ပြိုင်ဘက်အသင်းရဲ့ပွဲထွက်စာရင်းကို ကျွန်တော် သိချင်ပေမဲ့ မသိနိုင်ပါဘူး။ ခန့်မှန်းပြီး ပြင်ဆင်တာက ကျွန်တော်တို့အလုပ်ပါ။ ဘယ်သူကြံ့ခိုင်တယ်လို့ ကျွန်တော် ပြောနေမှာမဟုတ်ပါဘူး"ဟု ၎င်းက ဆိုခဲ့သည်။

မူရင်းသတင်း — Eleven Media Group