Eleven Media Group

UFC 310 ပြိုင်ပွဲမှ ဘီလားမိုဟာမက် ခြေချောင်းဒဏ်ရာကြောင့် နုတ်ထွက်ပြီးနောက် မက်ဂရီဂေါ်နှင့် အွန်လိုင်းတွင် အချင်းများခဲ့

Photo: AFP

UFC ဝယ်လ်တာဝိတ်တန်း ချန်ပီယံ အမေရိကန် MMA ကစားသမား ဘီလားမိုဟာမက်သည် ခြေချောင်း ဒဏ်ရာကြောင့် ဒီဇင်ဘာတွင် ကျင်းပမည့် UFC 310 ပြိုင်ပွဲမှ နုတ်ထွက် ခဲ့ပြီးနောက် နာမည်ကျော် MMA ကစားသမား မက်ဂရီဂေါ်နှင့် အွန်လိုင်း တွင် အချင်းများခဲ့ကြောင်းသိရသည်။

မက်ဂရီဂေါ်က စတင်ပြီးလှောင်ပြောင်ခဲ့ရာမှ အပြန်အလှန် စကားစစ် ထိုးခဲ့ကြပြီး မက်ဂရီဂေါ်သည် ယခင်ကလည်း ယခုကဲ့သို့ ဘီလားမိုဟာမက်ကို တိုက်ခိုက်ခဲ့ဖူးသည်။ အသက်(၃၆)နှစ်ရှိပြီဖြစ်သူ ဘီလားမိုဟာမက် သည် ပထမဆုံး ချန်ပီယံကာကွယ်ပွဲ အဖြစ် ရှုံးပွဲမရှိသေးသည့် ကာဇက်စတန် MMA ကစားသမား ရှက်ဗ်ခက်ရာမိုနော့ဗ်နှင့် UFC 310 ပြိုင်ပွဲတွင် ခေါင်တွဲဆိုင်းထိုးသတ်ရန် စီစဉ်ထားခြင်းဖြစ်သည်။

သို့သော် ၎င်းအနေဖြင့် ခြေချောင်း(ခြေခလယ်)တွင် အရိုးပိုး ဝင်မှုကြောင့် အနည်းဆုံး(၆)ပတ်ကြာ အနားယူရမည်ဖြစ်ကြောင်း ဘီလားမိုဟာမက်က လူမှုမီဒီယာ X မှတစ်ဆင့် အသိပေးပြောကြားခဲ့သည်။

"ကျွန်တော့် ခြေချောင်းမှာ အရိုးပိုးဝင်သွားတာပါ။ ပဋိဇီဝဆေးအတွက် လက်မောင်းမှာ ပိုက်တပ်ထားရပြီး နောက်ထပ် ခြောက်ပတ် ကိုယ်လက်လှုပ်ရှားမှုလုပ်လို့မရပါဘူး။ အလ္လာဟ်အရှင်မြတ်ရဲ့ အစီအစဉ်က အကောင်းဆုံးပါပဲ။ ကျွန်တော့်ကိုကြည့်ချင်လို့ လာကြမယ့် သူတွေအားလုံးကို တောင်းပန်ပါတယ်။ ကျွန်တော် မကြာခင်ပြန်လာမှာပါ" ဟု ၎င်းက ဆိုသည်။

UFC 310 ပြိုင်ပွဲကို ဒီဇင်ဘာ ၇ ရက်တွင် T-Mobile Arena ၌ ကျင်းပမည် ဖြစ်သည်။

မူရင်းသတင်း — Eleven Media Group