Eleven Media Group

■ ချယ်လ်ဆီးနှင့်ပွဲတွင် အာဆင်နယ်အသင်းခေါင်းဆောင် အော်ဒီဂွါ ပါဝင်ကစားဖွယ်ရှိ

Photo: Getty Images

လေ့ကျင့်မှု ပြန်လည်ပြုလုပ်နေပြီဖြစ်သည့် အာဆင်နယ်အသင်းခေါင်းဆောင် အော်ဒီဂွါသည် ချယ်လ်ဆီးနှင့်ပွဲတွင် ပါဝင်ကစားဖွယ်ရှိကြောင်း သိရသည်။

အသက် (၂၅) နှစ်အရွယ်ရှိ အော်ဒီဂွါသည် စက်တင်ဘာလအတွင်း ကစားခဲ့သည့် နိုင်ငံတကာရက်သတ္တပတ်အတွင်း နော်ဝေးလက်ရွေးစင်အသင်းအတွက် ကစားရင်း ခြေချင်းဝတ်ဒဏ်ရာရရှိခဲ့ခြင်းဖြစ်သည်။

အော်ဒီဂွါသည် အဆိုပါဒဏ်ရာကြောင့် တစ်လကျော် အနားယူခဲ့ပြီး ၎င်း မကစားနိုင်သည့်ကာလအတွင်း အာဆင်နယ်တိုက်စစ်ပိုင်းမှာ ဖန်တီးမှုအားနည်းခဲ့ပြီး ရလဒ်များလည်း ဆိုးရွားခဲ့သည်။

အော်ဒီဂွါသည် လက်ရှိတွင် အသင်းနှင့် လေ့ကျင့်မှုများ ပြုလုပ်နေပြီး အင်တာမီလန်ကို ရှုံးနိမ့်သည့်ပွဲတွင် ပွဲပြီးခါနီး၌ ကိုင်ဟာဗက်ဇ်အစား လူစားဝင်ကစားခဲ့သည်။

အော်ဒီဂွါသည် ရာနှုန်းပြည့်ကြံ့ခိုင်မှုမရှိသေးသော်လည်း အသင်းအနေဖြင့် ရလဒ်ကောင်းရရှိရန် လိုအပ်နေသည့်အတွက် နည်းပြ အာတီတာက ၎င်းကို ချယ်လ်ဆီးနှင့်ပွဲတွင် ပွဲထွက်စာရင်း၌ စွန့်စားအသုံးပြုဖွယ်ရှိကြောင်း သတင်းထွက်နေသည်။

အာတီတာသည် နွမ်နယ်ရီကိုလည်း ယင်းပွဲတွင် အသုံးပြုဖွယ်ရှိကြောင်း သုံးသပ်နေကြသည်။

မူရင်းသတင်း — Eleven Media Group