Eleven Media Group

Nike နှင့် ယူရို (၁.၇) ဘီလီယံတန် စပွန်ဆာစာချုပ်သစ် ဘာစီလိုနာအသင်း ချုပ်ဆို

Photo: Sky Sports

ဘာစီလိုနာအသင်းသည် အမေရိကန်အခြေစိုက် အားကစားပစ္စည်းထုတ်လုပ်ရေးကုမ္ပဏီ Nike နှင့် ယူရို (၁.၇) ဘီလီယံတန် စပွန်ဆာ စာချုပ်သစ် ချုပ်ဆိုခဲ့ကြောင်း သိရသည်။ Nike သည် ဘာစီလိုနာအသင်းကို ၁၉၉၈ ခုနှစ်မှစတင်ကာ စပွန်ဆာပေးခဲ့ခြင်းဖြစ်ပြီး ပြီးခဲ့သည့်စာချုပ်မှာ ၂၀၂၈ ခုနှစ်တွင် ကုန်ဆုံးမည်ဖြစ်သည်။

ဘာစီလိုနာအသင်းသည် အမေရိကန် အခြေစိုက် Nike အမှတ်တံဆိပ်နှင့် ၁၉၉၈ ခုနှစ်ကတည်းက လက်တွဲလာခြင်းဖြစ်ပြီး စာချုပ်သစ်မှာလည်း နှစ်ရှည်စာချုပ်ဖြစ်ကြောင်း ဘာစီလိုနာအသင်းက ကြေညာခဲ့သည်။ Nike နှင် ချုပ်ဆိုမည့်စာချုပ်မှာ ကမ္ဘာ့ဘောလုံးလောက၏ တန်ဖိုးအမြင့်ဆုံးစာချုပ်ဖြစ်နိုင်ကြောင်း ဘာစီလိုနာအသင်းဥက္ကဋ္ဌ လာပေါ်တာက ပြောကြားထားဖူးသည်။

ဘာစီလိုနာအသင်းအနေဖြင့် ၂၀၂၈ ခုနှစ်တွင် Nike နှင့် လမ်းခွဲကာ စပွန်ဆာကြေးပိုပေးသည့် Puma နှင့် စာချုပ် ချုပ်ဆိုမည်ဟု သတင်း ထွက်ပေါ်ခဲ့သော်လည်း Nike က Puma ပေးသည့်ကြေးကို ပေးချေရန် သဘောတူညီခဲ့သည့်အတွက် စာချုပ်သစ်ချုပ်ဆိုခဲ့ခြင်းဖြစ်ကြောင်း သိရသည်။

ဘာစီလိုနာအသင်း၏ထုတ်ပြန်ချက်တွင် "အားကစားလောကကို ဦးဆောင်နေသည့် ဘာစီလိုနာနှင့် Nike တို့သည် နှစ်ပေါင်းများစွာ လက်တွဲရန် သဘောတူညီမှု ရရှိခဲ့ပြီဖြစ်ကြောင်း"ဖော်ပြပါရှိသည်။

စပိန်မီဒီယာများ၏ဖော်ပြချက်အရ ဘာစီလိုနာအသင်းသည် Nike နှင့် ၂၀၃၈ ခုနှစ်အထိ စာချုပ်သစ်ချုပ်ဆိုခဲ့ပြီး ယင်းစာချုပ်အရ တစ်ရာသီ ယူရို (၁၂၇)သန်းနှင့် ဆုကြေးများ ရရှိမည်ဖြစ်ကာ စာချုပ်၏တန်ဖိုးမှာ ယူရို (၁.၇) ဘီလီယံရှိကြောင်း သိရှိရသည်။

မူရင်းသတင်း — Eleven Media Group