Eleven Media Group

နည်းပြဘဝတစ်လျှောက် အဆိုးရွားဆုံးအမှားကို ရီးယဲလ်နည်းပြ အန်ဆယ်လော့တီ ဖွင့်ဟ

Photo: Getty Images

ရီးယဲလ်နည်းပြ အန်ဆယ်လော့တီက ၎င်း၏နည်းပြဘဝတစ်လျှောက် အဆိုးရွားဆုံးအမှားမှာ ရီးယဲလ်အသင်းကို ပထမဆုံးအကြိမ် ကိုင်တွယ်စဉ်က လစာတိုးတောင်းခဲ့ခြင်းဖြစ်ကြောင်း ဖွင့်ဟပြောကြားခဲ့သည်။
အသက် (၆၅)နှစ်အရွယ်ရှိ အီတလီလူမျိုးဝါရင့်နည်းပြ အန်ဆယ်လော့တီသည် ၁၉၉၅ ခုနှစ်တွင် အီတလီကလပ် ရက်ဂျီးနားအသင်းကို ကိုင်တွယ်ကာ နည်းပြလောကသို့ စတင်ဝင်ရောက်ခဲ့သူဖြစ်သည်။
၎င်းသည် နည်းပြသက်တမ်းနှစ်ပေါင်း (၂၉)နှစ်ကျော်ကာလအတွင်း ဆုဖလားပေါင်း (၃၀) အထိ ရရှိခဲ့ပြီး ယင်းထဲမှ (၁၄) လုံးမှာ ရီးယဲလ်အသင်းနှင့်အတူ ရရှိခဲ့ခြင်းဖြစ်သည်။
အန်ဆယ်လော့တီသည် ရီးယဲလ်အသင်းကို ပထမဆုံးအကြိမ်အဖြစ် ၂၀၁၃ ခုနှစ်မှ ၂၀၁၅ ခုနှစ်အထိ ကိုင်တွယ်ခဲ့သည်။
၎င်းသည် ရီးယဲလ်အသင်းကို စတင်ကိုင်တွယ်သည့် ပထမဆုံးရာသီ ၂၀၁၃-၁၄ တွင် အသင်းအတွက် (၁၀) ကြိမ်မြောက် ချန်ပီယံလိဂ်ဖလားကို ရယူပေးနိုင်ခဲ့သည်။
သို့သော် နောက်ရာသီတွင် ရလဒ်မကောင်းသဖြင့် ရာထူးမှထုတ်ပယ်ခံခဲ့ရသည်။
ယခုအခါ အန်ဆယ်လော့တီက ထိုစဉ်က ရီးယဲလ်နည်းပြရာထူးမှ ထုတ်ပယ်ခံရခြင်းကို ပြောကြားခဲ့ခြင်းဖြစ်သည်။
၎င်းက ''နှစ်ပေါင်း (၃၀)အတွင်း အမြဲမှန်ကန်တဲ့ဆုံးဖြတ်ချက်တွေ ချဖို့ မဖြစ်နိုင်ပါဘူး။ ရီးယဲလ်ကို ပထမအကြိမ်ကိုင်ခဲ့တုန်းက ကျွန်တော် အမှားလုပ်ခဲ့ပါတယ်။ အသင်းနဲ့စာချုပ်သစ်ချုပ်ဖို့နီးစပ်နေချိန်မှာ လစာတိုးခဲ့တောင်းခဲ့လို့ ပျက်ပြယ်ခဲ့ရတာပါ။ အဲဒီက ကျွန်တော့်ရဲ့နည်းပြဘဝမှာ အဆိုးရွားဆုံးအမှား ဖြစ်ပါတယ်''ဟု ပြောကြားခဲ့သည်။

မူရင်းသတင်း — Eleven Media Group