Eleven Media Group

အက်သလက်တီကိုအား ရှုံးနိမ့်ပြီးနောက် ခြေစွမ်းကျဆင်းနေသည့် မိမိတို့အတွက် ဆောင်းရာသီနားရက်မှာ လိုအပ်ကြောင်း ဘာစီလိုနာနည်းပြ ဟန်ဆီဖလစ်ခ် ဝန်ခံ

Photo: Getty Images

ဘာစီလိုနာအသင်းနည်းပြ ဟန်ဆီဖလစ်ခ်က အက်သလက်တီကိုအသင်းအား ရှုံးနိမ့်ပြီးနောက် ခြေစွမ်းကျဆင်းနေသည့် မိမိတို့အသင်းအတွက် ဆောင်းရာသီနားရက် (Winter Break) မှာ လိုအပ်ကြောင်း ဝန်ခံပြောကြားခဲ့သည်။

ဘာစီိလိုနာအသင်းသည် ဒီဇင်ဘာ (၂၁) ရက်(စနေနေ့)က ကစားခဲ့သည့် လာလီဂါပွဲစဉ်တွင် အိမ်ကွင်း၌ အက်သလက်တီကိုအသင်းကို ပွဲချိန် (၃၀) မိနစ်တွင် သွင်းယူခဲ့သည့် ကွင်းလယ်ကစားသမား ပတ်ဒရီ၏သွင်းဂိုးဖြင့် ဦးဆောင်နိုင်ခဲ့သည်။ သို့သော် ဘာစီလိုနာအသင်းသည် အနိုင်ကို ထိန်းကစားနိုင်ခြင်းမရှိဘဲ ပွဲချိန် (၆၀)မိနစ်တွင် ချေပဂိုးပေးခဲ့ရသလို၊ ပွဲပြီးခါနီး နာကျင်အချိန်ပိုတွင် အနိုုင်ဂိုးပါ ခွင့်ပြုခဲ့ရကာ ပွဲအပြီးတွင် (၁-၂) ဂိုးဖြင့် ရှုံးနိမ့်ခဲ့ရသည်။

ဘာစီလိုနာအသင်းသည် ယင်းရှုံးပွဲကြောင့် လာလီဂါအ မှတ်ပေးဇယားထိပ်ဆုံးမှ ဆင်းပေးခဲ့ရပြီး တစ်ပွဲလျော့ကစားထားသည့် အက်သလက်တီကိုအသင်း(၄၁ မှတ်)နှင့် (၃) မှတ် ကွာဟသွားခဲ့သည်။ ဘာစီလိုနာအသင်းသည် လာလီဂါနောက်ဆုံး (၇)ပွဲတွင် (၁) ပွဲသာ အနိုင်ရခဲ့သည်။

လာလီဂါပြိုင်ပွဲမှာ ယခုတစ်ပတ်ပွဲစဉ်များအပြီးတွင် ဆောင်းရာသီနားရက် (Winter Break) အဖြစ် တစ်လခန့်အနားယူမည်ဖြစ်ရာ ခြေစွမ်းကျဆင်းနေသည့် ၎င်းတို့အသင်းအတွက် ယင်းနားရက်မှာ လိုအပ်ကြောင်း ဘာစီလိုနာနည်းပြ ဟန်ဆီဖလစ်ခ်က ဝန်ခံခဲ့ခြင်းဖြစ်သည်။

ဟန်ဆီဖလစ်ခ်က "အခု ကျွန်တော်တို့ ဆောင်းရာသီနားရက် ရခဲ့ပါပြီ။ ဒီနားရက်က လူတိုင်းလိုအပ်တယ်လို့ ကျွန်တော် ထင်ပါတယ်။ ဆောင်းရာသီနားရက်အပြီးမှာ ကျွန်တော်တို့ အနေနဲ့ လေ့ကျင့်မှာဖြစ်ပြီး ကျွန်တော်တို့ ဘယ်လောက်ကောင်းတယ်ဆိုတာကို ပြသသွားမှာပါ။ အက်သလက်တီကိုနဲ့ပွဲမှာ အကောင်းဆုံးကစားနိုင်ခဲ့ပေမဲ့ ရှုံးနိမ့်ခဲ့တဲ့အတွက် ကျွန်တော်တို့အားလုံး စိတ်ပျက်ရပါတယ်။ အခု ခရစ္စမတ်ကို ဆင်နွှဲမှာပါ။ ပြီးရင် ဒီဇင်ဘာ (၂၉)ရက်မှာ ပြန်လည်လေ့ကျင့်မှာဖြစ်ပြီး ဒုတိယရာသီဝက်အတွက် ပြင်ဆင်သွားမှာပါ"ဟု ပြောကြားခဲ့သည်။

ဘာစီလိုနာအသင်းသည် ဆောင်းရာသီနားရက်အပြီးတွင် ပထမဆုံးပွဲစဉ်အဖြစ် ၂၀၂၅ ဇန် နဝါရီ (၂၅) ရက်တွင် စပိန်ဘုရင့်ဖလားပွဲစဉ်အဖြစ် ဘာဘက်စ်ထရိုအသင်းနှင့် ကစားရမည်ဖြစ်သည်။

မူရင်းသတင်း — Eleven Media Group