
အာဆင်နယ်အသင်းသည် တံကောက်ကြောဒဏ်ရာကြောင့် ရက်သတ္တပတ်များစွာ အနားယူရမည့် အသင်းတိုက်စစ်ကစားသမား ဆာကာ၏နေရာတွင် အစားထိုးရန်အတွက် PSG တိုက်စစ်မှူး မူအာနီကို အငှားဖြင့် ခေါ်ယူရန် စီစဉ်နေကြောင်း သိရှိရသည်။
ဆာကာ(၂၃ နှစ်)သည် ခရစ္စ တယ်ပဲ့လေ့စ်ကို (၅-၁)ဂိုးဖြင့် အနိုင်ရသည့်ပွဲတွင် တံကောက်ကြောဒဏ်ရာရရှိခဲ့ပြီး ယင်းဒဏ်ရာကြောင့် ရက်သတ္တပတ်များစွာ အနားယူရမည်ဟု အာဆင်နယ်နည်းပြ အာတီတာက အတည်ပြုထားသည်။ Daily Mail က ဆာကာအနေဖြင့် (၂) လကျော် အနားယူရဖွယ်ရှိနေပြီး မတ်လတွင်မှ ပြန်ကစားနိုင်ဖွယ်ရှိကြောင်း ဖော်ပြခဲ့သည်။
အာဆင်နယ်အသင်းသည် ဆာကာ၏နေရာတွင် ကာလတိုအစားထိုးရန်အတွက် လာမည့်ဇန်နဝါရီတွင်ကစားသမားတစ်ဦးခေါ်ယူရန် စီစဉ်နေကြောင်း သိရသည်။ ယခုအခါ The Standard က အာဆင်နယ်အသင်းသည် ဆာကာ၏နေရာတွင်အစားထိုးရန်အတွက် PSG တိုက်စစ်မှူး မူအာနီကို ပစ်မှတ်ထားနေပြီး လာမည့်ဇန်နဝါရီတွင် အငှားဖြင့် ခေါ်ယူရန်စီစဉ်နေကြောင်း သိရသည်။
မူအာနီသည် PSG အသင်းတွင် ပုံမှန်နေရာရရန် ရုန်းကန်နေပြီး နည်းပြ အန်နရီကေးနှင့်အဆင်မပြေသဖြင့် အသင်းပြောင်းရွှေ့လိုနေကြောင်း သိရှိရသည်။