Eleven Media Group

ခရစ္စမတ်အကြိုနေ့တွင် နာပိုလီကစားသမားများကို အသင်းနည်းပြ ကွန်တီ လေ့ကျင့်မှုနှစ်ကြိမ် ပြုလုပ်စေခဲ့

Photo: X

နာပိုလီနည်းပြ ကွန်တီသည် ခရစ္စမတ်အကြိုနေ့တွင် အသင်းကစားသမားများကို လေ့ကျင့်မှုနှစ်ကြိမ် ပြုလုပ်စေခဲ့ကြောင်း La Gazzetta dello Sport က ဖော်ပြခဲ့သည်။
နာပိုလီအသင်းသည် စီးရီးအေပွဲစဉ် (၁၇) အပြီးတွင် ရမှတ် (၃၈ မှတ်)ဖြင့် ဒုတိယနေရာ ရပ်တည်နေပြီး အမှတ်ပေးဇယားထိပ်ဆုံးမှ အတ္တလန်တာအသင်း(၄၀ မှတ်)နှင့် (၂)မှတ်သာ ကွာဟသည်။
နာပိုလီအသင်းသည် ဒီဇင်ဘာ (၂၉)ရက်(စနေနေ့)တွင် စီးရီးအေပွဲစဉ် (၁၈)အဖြစ် ဗင်နီဇီယာအသင်းကို အိမ်ကွင်းတွင် လက်ခံကစားရမည်ဖြစ်သည်။
ကွန်တီသည် ခရစ္စမတ်နေ့တွင် အသင်းကစားသမားများကိုအားလပ်ရက်ပေးခဲ့သောကြောင့် ခရစ္စမတ်အကြိုနေ့တွင် လေ့ကျင့်မှု (၂) ကြိမ် ပြုလုပ်စေခဲ့ခြင်းဖြစ်ကြောင်း သိရသည်။
နာပိုလီအသင်းသည် ပုံမှန်ဆိုပါက တစ်နေ့လျှင် လေ့ကျင့်မှုတစ်ကြိမ်သာ ပြုလုပ်လေ့ရှိသော်လည်း ခရစ္စမတ်အကြိုနေ့တွင်မူ နံနက်ပိုင်းနှင့် နေ့လည်ပိုင်းတို့တွင် နှစ်ကြိမ်ထိ လေ့ကျင့်ရေး ပြုလုပ်ခဲ့ကြကြောင်း သိရသည်။
ကွန်တီသည် စည်းကမ်းတင်းကြပ်သူဖြစ်ပြီး အသင်း၏ ကစားပုံကို အားမရသဖြင့် ယခုကဲ့သို့လေ့ကျင့်စေခဲ့ခြင်းဖြစ်ကြောင်းလည်း သိရှိရသည်။

မူရင်းသတင်း — Eleven Media Group